Altirasawundete buuxo seeda yannara assitanno fayyimmate ogeeyye qoropha noonsata babbaxxitino mashalaqqubba leellishshanno. Fayyimmate ogeeyye xiwamaanote woy buuxiraanote keeraanchimma agarate altirasawundete buuxo assitanno yannara uminsa keeraanchimma agadhate deama dinonsa.
Altirasawunde manchi beettita giddoydi bisi keeraanchimma la`neemmo maashineeti. Xaa yannara gobbankera saeno kalqenkera hala`ladunni horonsi`neemmonna shiimu waaginni afi`nanni lowo geeshsha kaa`litanno udiinnichooti.
Baxxinohunni otoottotenna godowishshsu rosu kifile giddo lekka ayirrate woy lekka ayirra hoogate, godowamino yannanna kalaqamino darga, godowamino qaaqqi keeraanchimmanna lopho afatenna harunsate, godowate ledo amadisiisante kalaqantanno addi addi fayyimmate qarrubba buuxatenna harunso assate hattono meyaa beettoha sirote biso gawajjitannore haammata fayyimmate mitiimmubba buuxatenna harunsate ragaanni lowo horo uytanno.
Altirasawundete maashine “CT scan”nna raajete maashinenni baxxino garinni carare noosekkita ikkasenni xagisiraanoteno ikko ogeeyyete aana iillishshanno gawajjo dibatidhinote.
Ikkollanna ikkado qoropho nookkiha seeda yannaranna batinye hinge altirasawundete buuxo assa buuxo assanno ogeessi aana babbaxxitino mikitatenna miqichu xaadanno dargi ledo amadisiisantino qarrubba iillishshara dandiitanno.
Konni ragaanni assinoonniti mitte xiinxallo leellishshanno garinni 70% ikkitanno altirasawundete buuxo assitanno ogeeyye loosu ledo amadisiisantino addi addi mikitatenna miqichu xaadanno dargi aano qarrubba leeltinonsa.
Ikkinohurano konne qarra ajishate altirasawundete buuxo assineemmo yannara aantino qoropho harunsa hasiissannonke:-
1 Xagisiraancho buuxote daallasi aana ninkewiinni shiima geeshsha xeertinse wora noonke.s
Kunino cigilenke wole bisinke kifilera shiqqinota ikkitanno gede, qotinke 30 digire ale diriirannokki gede assanno. Jawiidi qubbichinkeno iimira diriira noosi.
2 Cigilenke xagisiraanchu afollino daallasi ledo taalo (parallel) ikkitanno gede barcimanke woy daallasa biddi assa.
3 Badheenni irko noosi barcima horonsi`ra, xagisiraanchu widira woy iskiriinete widoonge haawaa agura, lekkanke koatte fooliishshiinsheemmore horonsi`ranna woriidita lekkanke mikitta era hooga woy diriirsa hooga (support your feet, and keep ankles in neutral position).
4 Misile la`neemmo iskiriine ofollinoommo barcimi aana hee`ne mittu widira wirri assa, iimillitte la“a woy wororritte heeshshi yaa hasiissunkekkinni shotunni leellankera dandaanno bayichi aana wora.
5 Buuxo assineemmo yannara bisonke duuratenni, wororrite heeshshi assatenni woy wirramatenni qoropha.
6 Loosu mereero fooliishsho assiranna babbaxxitino bisu guunte millimillubba assa.
Bue:- D/r Habtaamu Awulew XiqurAnbessu ispeeshalayzidete hospitaalenni
Abbebech Maatewoos
Bakkalcho Badheessa 26, 2016 M.D
