Addis Ababa:- Laalchonna laalchimma lossa duuchu qarrira malaho yiino layinkihu xaphoomu ministirchi kalaa Temesgen Xiruneh. 100 kumi hektaare ale asiidaa’mitino baatto xagisate millimillo hananfoonni.
Layinkihu xaphoomu ministirchi; heeshshote oolto ajishate hedo ka’anno woyte laalchunna laalchimmate aana illacha tuga xa’mannota qummeesse; xaphoomunni gobbate miinjinna lopho daggannohu laalchonna laalchimma buuxisa dandiinirooti yee; laalchunna laalchimma gobbate heeshshote hajo ikkase coyi’rino. Laalchimma buuxinsiro konni ledo amadante ka’anno qarrubba gatisa dandiinannita egensiisino.
Laalchimmate hajo gobboomu illachaati yiinohu layinkihu xaphoomu ministirchi; buximate giddonni fulle umonke dandiino yinanni woyte laalchonna laalchimma buuxisatenniiti yiino. Konnira qole bushshu keeraanchimma buuxisa hasiissannota xawisino.
Layinki xaphoomu ministirchi xawishshi garinni; bushshu keeraanchimma buuxinsikkinni laalcho afi’ra didandiinanni; noora labbino doorshuwanni bushshu asiidaa’ma gargara dandiinanni. Nooru shiimu baatooshshinni qooxeessaho afi’ra dandiinanniha ikkasinni; wolootu gobbuwano horonsidhe gummaa’mitinota buunxoonni daafira laalcho ledate balaxo uyine noora asiidaame baattora xaginaateho horonsi’ratenni laalchimma buuxisa hasiissanno.
Konne gumulateno macciishshamatenni loosa, wo’ma mixo qixxeessanna looso danchu akatoominni loosatenni ogeeyyenna loosidhe galtino dagawa iillinota buuxisatenniiti yino.
Gibrinnu ministirchi kalaa Girmi Amentehu isi widoonni; sa’u dirra giddo xiinxallote uurrinshuwara gibrinnu ekistenshiinenni loonse leellishate hattono babbaxxitino pirojektuwa gumulantanni keeshshitino loossanni asiidaa’mino bushsha gubrinnu noorinni xaginse laalchonna laalchimma lossa dandiinoonnita egensiisino. Hanafisiisate millimillote bareno gibrinnu noorinni 100 kume hektaare baatto xagisate illachishshinota ikkase xawisino.
Gibrinnu noora worroonni baatto luphi yino deerrinni laalcho leddinnota xawisinohu ministirchu; lawishshaho; Qamade 71 xibbuunni, Hayixe 100%, Badala 28 anga, hattono Baaqeela 88 angara lossa dandiinoonni yiino.
Itophiyaho asiidaa’mino bushsha xagisate dandiissannoti luphiima Nooru kuuso noota shiilote ministere widoonni buunxoonnita qummeessino. Nooru shiqisho woyyeessate widoonni qoqqowubba noonsa bikkamino dhukira qoteho ijaarra laashshite shiqisha dandiitanno gede sumimmete aana iillinoonita qummeessino.
Gibrinnu ministere mashalaqqe leellishshanno garinni; wiinsanni hee’noonni baattonni 43 anga bushshu asiidaa’manni ganantinote. Konni giddonni 28 anga kaajjado asiidaa’manni ganantinota ikkitanna; kunino xaphoomunni wiinsanni baattonni 3.1 Miliyoone hektaare dibbanno.
Qiddist Gezzaheny
Bakkalcho Badheessa 19, 2016 M.D
