Gobba Diigate Dayino Allaamurchi Aana Assinoonni Gaadi Mittimmanke Kaajjilli Malaateeti!
Mittimma wolqate. Mittimma dhuka kalaqqanno. Doogono mittimmatenni gamba yine hasaambanna ta’anno. Gooddono mittimmatenni gooddi’niro daafuru dileellanno.
Diina mittimmatenni shorrate gaada Itophiyu dagara wosincho dikkitino. Xaaleenu mittimmate jirsinni qeelamino. Yannaasinchu olu uduunni di noonke yannaati hatti. Tenne dago assi’rino diini horrankera dayi wote Itophiyu daga afoonsa mitto foolensa shitto assite diina shorritino. Konniraati mittimma qarru baga gooddissanno yinannihu.
Tayixe Itophiyaho baca jifo xaaddino. Koroonu fayya miinjanke gawajjitino;lubbono qocci assitino. Daddalu doogo cufanteenna buxanete kottimmate aana boddimma,bagu aana bakakka kalaqqu wote noosihu hoongohura beehatenni
halame sayisino. Hiddaasete kofatto aanano kalaqantino jifo mittimmatenni qeelle guma la”ate iillinoonni. Cancishaanchu HWHT junta gobba hunate kakkaooshshe mittimmatenni diingoonni;diingannino hee’noonni.
27 diorira babbadamooshshu guffa sirchunna gosatenni wixanni keeshshino HWHT cancishaanchi togoore kalaqate qixxaawosi techoo mixo calla ikkitinokkita buunxe anfannihu wixino babbadamooshshe qaddo amadisiise mannu lubbonni dadda’la hanfi wote xawoho huwantoonni.
Itophiyu daga busulete; diinanna baxillaancho bade afate yanna di adhinonsa. Diinu gamba di yitanno yee hexxe hee’reenna saalfachiishshanno ikkito honsu qoqqowi mittimmatenni yaano Tigirayete qoqqowa agurranna mittu afiinni diina shorrate gaadi. Kalqe afoo amaxxitu. Itophiyu daga keeru yannara mimmitoho muffi yitara dandiitanno;kayinni gobba kisanno diini daanno wote giddo babbadamooshshenna koffeenya qacce qolatenni diina gaaddanno. Kuni tayixe xawoho leellino halaaleeti.
Sase saada mitteenni galtanno hoowete. Mitte saa waajjote,mitte xoxxorraamete,sayikkiti kolishshote. Amboomi saada kuri saada gawajjate hasi’rirono injaa giwisi. Korkaatuno mimmito agartannoyya! Gamba yite nooyya! Tenne huwatino amboomi barrunni mitto barra kolishsho saa woshshe ki’ne gawajjishiishshannotinna amboomira heedhinoonniwa xabbe leellishshannoti woojjo saatina shorritine huntine keerunni di heedhinanni yaanno. Insano adda laweennansa hawarro waajjo saa shorriteenna ite huni. Layinki barrano hattonni xoxxorraame saa shorrite huntanno gede kolishshiiditera kuleenna shorrite callise gattu.Xaate callicho gattinota diddisha shotateya!
Diinu hattolla babbadenna billaalise diige hunanno. Mittimmatenni hee’niro diinu di gawajjanno. Ameerikuno tenne dago kalaqi’rateeti HWHT kaa’linoha lawe billaallise eate hayyo kalaqi’ranni Tigirayete dagara kaa’lannoha lawannohu. Babbadammiro diinu faro afi’ranno. Itophiyu dagara kayinni luphiimu galati hasiisanno. Mittimmansa sayisse uyitukkinni diina saalfachishshino daga Itophiya!
Itophiyu sheemaatu noose gobbaati. Shotunni diigantannota dikkitino. Ee! Jifote giddo kaaliiqi sa’nanni doogo fananno. Lamunna sasu mittimma gamba yitinoponniwa maganu no yaanno qullaawu maxaafi. Mittimmate giddo kaaliiqi anga no! afoonke mitto foolenke shitto assinohu maganu galatamo. Xaano mittimma diiganno sheexaane kaaliiqi xeertiso. Juntahono wodana fanosi di yeemmo. Beebbinosina beeshshi’re sioole dirranno gede assitino seeda Itophiyu daga cigile maassanto. Xa kalqe naqqassino mittimma kaajjinsho. Diigara daanno diina konni ka’a duqqitanno haxo Itophiyu dagara nookkita huwatate dandiissino yannaatina qaagooshshu wirro layinki Adiwa ikke borreessamo.
BakkalchoMaaja 29 / 2013
