Baalunku gobbate qooxeessira, dagoomu widoonni adhamooshshe afi`rino budunni gaance tirranni yooaanchimmate amuraati horosi shiima dikktino. Itophiyu konninni dihemantanno. Ikkirono, ilamate yannite egennora kaima ikkitinota budillite gaance tirate amuraate, horynanna ha`nura ikkitino egenno xiinxallotenni irkinse agarre dagganno ilamara saaysa hasiisanno.
Gobbate mereero addi addi hasatto korkaatinni ka`anni noo gaanceno qiissate togoohu budunni gaance tirate amuraati kaajje sufa noosi. Roorimankanni “Affini” gedee budi. Mootimmanno muli yanna kawa uurrissinoti Gobboomu Amaalammete Komishiine togoota budunni gaance tirate amuraate horoonisidhe keerenna hobbaate buuxisiisa hasiisannonsa yine ammannanni.
Tenne lamalara Sidaamu qoqqowi budu festivaale qixxeesse budillaancho egennonna dona gobbate leellishanni afamanno. Affini kayinni uduunnu gede assine reqecci assinanniha ikkikkinni loosunninna Affini budinni araarsinanni,gibbo giwansho tirranni caaleho ofolline mallanninna fallanni leellinshanniho.
Sai agani giddo Araarso Gerremew (Dr) “Affini” kalqete egensiisanno maxaafa Amaaru afiinni borreesse baraasinonke. Adda coyi’rate kuni maxaafi tenne yannara attamame fulasi yanna agadhinohonna Amaalammete komishiine loosira faro fanatenni badhe ikkannoho.
Maxaafu “Affini,kipho tirranni,araara dirrinsanni hattono keere diriirsinanni uduunnichooti” yaanno. Keeru dirrinonna woyyaabbino Itophiya la’’ate halchanno baali konne bude Sidaamu halaale agare xa hananfoonni amaalammete komishiine seyoora mitte hayyo asse shiqisha hasiissanno.
Wolootta daganna dagoomino togoohu gaance tirranni ha’nuru budi hee’rannonsata dihuluullammanni. Duuchunku caalisiranna qae qamattesira nooha araaru bude fushshaato assatenni gobba hursa kaaliiqi baxanno coyeti.
Wole widoonni “Affini” filme Ammajje 2/2016 MD Sidaamu budu harira maassiinse kalqete leellishate qixxaambe hee’noonni. Filmennire bacare yaate techo guuta ikka hoongirono kayinnilla Sidaamu Affini budi,geerru caaleho ofolle malanna amaalanna, qarra, gibbo gaance tiranna leellishshonnota ikkase dihuluullammanni. Tenne Filme qixxeessate jawa qeecha Fulino Sidaamu daga dagoominna manni qoqqowi mootimma addintanni naandannite. Xaano albira.
Xaa yannara Filme gibbonna giwansho,moranna raaqa,hattono haqaqqaalle rosiissannotella baalanti yaa dandiinanni. Tenne yannara yanna hedote giddo wortino Filme gobbate baraassinoonni daafira Sidaamu qoqqowi Woga Turizimetenna Isipoortete Biiro ilama naaxxitanno’ne.
Ee, tenne Filme giddo godo’laanchimmatenni beeqqitinirinna hedo burqissiniri dhagge habbannokkitena galatamme. Amaalammete komishiine gobba hursate, araara karate hedo gamba assitanni noo yannara togoo kaayyo afi’ra eltote.
Affini sirnyi giddo “Amaale annanna beetto baddanno” yineenna mitu widi geerraho amaalantara fajjannotinna kae, xeerti’re ha’re amaale guddanno woyte woshshineenna higannoti anfoonnite. Kuni yaa amaalamate yaate. Affini kaimunni koo/tee dibadanno. Aja akkala diyaanno. Gosa sircho dixinqanno; duuchunkura taalo malenna fale halaale gorsikkinni yoo aanno. Affini fiixaho mare halaalu noowa badironna buuxiro allaggaho yoo aanno. Kuni halaaleho.
Konne Affini bude, konne dhagge ikkanno budu balchooma Sidaamunni sae gobboomu deerrinni afamanno gedenna ilamatenni ilama reekkamanno gede yannansa uyite Filme loossure,loosiisate hedo burqissure ilamate ikkannoreetina galatu ikkonsa. Dancha bude umme fushshinanni komanna rabba ilamate iqqinikkinni togoo halaale iqqa gobba sufisate ilama woxxate.
Kalqete aana maahoyyaancho hekko kalaqatenna keeru duuchunku qooxeessira dirranno gede hasiissanno egennonna rosicho hattono egennonna,dandoo beehate Filmete,Sirbunna baalunku Artete ogeeyye uminsa qeecha fula hasiissanno. Konnira lawishshu Affini Filmenna Affini Maxaafaati. Gobba hursate Artete ogeeyye qeechi luphiimaho. Affini hardo hala’lo!
Bakkalcho Arfaasa 23, 2016 M.D
