Itophiyu mootimma fakkana miinju heellicho ikkitino Gibrinnu,Industire,Shiilotenna ICT handaarubba mereero Turizime leddino. Handaaraho hala’ladda loosu kaayyo kalaqanna, kaajjado miinju safo tuga dandiinannita ammanne sa’u lame dirrara hala’ladda loossa loonsanni keeshshinoonni. Kuri mereerinni albisunni kullannihu haaruudde Turizimete iillo gatamara,alba noore haaroonsanna latisa hattono agaratenni kalqete turizime dikko hiiqqine eatenni Industiretenni qeecha beeqqate.
Mootimmannihu qaru illachi, amandoonni turizimete jiro agarooshshenna latishsha,turizimete iillo,hattono turizimete owaante fullankenna uurrinshate dhuka kaajjisha ikkinota mootimma loosunni leellishshanni afantanno.
Itophiyu mayimma kalqete leellishate,kalqoomu deerra agadhitino turizimete iillo aatenna Turizime goshooshshanno qooxeessuwa egensiisate baca loossa loosantanni afantanno. Turizimete seyooranna latishshira qarunni mashalaqqe uyinanni hayyo tekinoloojetenni dijitaale assa hasiissanno. Kunino xaa yannara loosunni leellanni dayino.
Tenne gobbanke amaddino ajuuja kaima assatenni soorrote gashshooti adda ikki tayixe layikki dirinni hanafe, kalaqamu jironke egennatenni,la’’atenni,badatenninna latisatenni hattono horoonsi’ratenni illetenni leellanno guma maareekkisiinsoonni.Korkaatuno turizimete baqqeenya loosunni leellinshanni hee’noonnita buuxissanno jajjabba pirojekituwa xaphi yitanni afantanno.
Baxxinohunni Xaphoomu ministirichi Abiy Ahimed (DR) hedo burqiseennanna massagooshshinni handaaraho uyinoonni baxxino illachi jawaachishannoho. Xaphoomu ministirichi Hurbaate Sheggerira,Hurbaate gobbatenna Hurbaate ilamate yaanno adawarshinni gobbankera leeltanno Turizimete injiitino qooxeessuwa yannaasinchu garinni lattanno gedenna wolootta kalqera egennantanno gede jajjabba pirojekituwa quxatenni loosu giddora e’noonni.
Hurbaate Sheggerira Turizimete iillo gatamarshi mittimmate,Baxillunna Inxooxxo Paarkuwa Addis Ababaho biinfille ikkitino. Hurbaate gobbate pirojekiteno Gorigora, Koyishanna Wonci Turizimete iillo Itophiyaho Turizimete lophora ledote kaayyo kalaqqino.
Hurbaate gobbate pirojekite biso ikkino Xaphoomu ministirichi Abiy Ahimed (DR) hedo burqisatenni Badheessa 2013 MD faajje assinoonni gatamarshi Oromote qoqqowira galchimi Shewa zoone Addis Ababunni 127 KM xeertinyi aana afamanno Wonci Dendi garbi IKO-Turizime Looje Itophiyu Turizime lopho deerra gotti assannonna qooxeessu dagoomira hegersino eote bue kalaqannoho.
Pirojekite qooxeessa Itophiyaho hattono Afrikaho baxxino Turizimete goshoosho assate gobbaanni; Miinju horonna gobbate akata soorrate widoonni horose luphiimate. Wonci Dendi Iko-turizime pirojekite dagate beeqqonni loosantinota ikkasenni qooxeessu dagooma horaameeyye assatenna 560 mannira loosu kaayyo kalaqqannote.
Iko-Turizimete pirojekite 39 Ikoloojuwanna wolootta ledote boohaarshu base hanqaffinote. Pirojekitete onte beeddahe Hoteella,budillaancho loojjanna Restooraantuwa,Atileetikisootu qacha,Golf-kilabe hee’ransa gobbaanni;hala’ladunni lophitino gobbuwara afantanno jajjabba boohaarranninna wayi paarkubbano hanqaffino.
Wonci dendi Garbi Yannaasincho Iko-Turizime loojja Itophiyu noosenna cibbantino kalaqamu jiro ragunni egennatenni;horoonsi’ratenninna agaratenni ilamate gattanno loossa loosa dandiinannita leellishannoho. Itophiyu cibbantino jiro noose gobba ikkasenni xixxiiwamatenninna giwamatenni fulle jironke latisa dandiinummoro harancho yanna giddo buximatenni gatisa dandiineemmota Wonci-dendi garbi Yannaasinchu Iko-Turizime looje naqaashete.
Wonci-dendi garbi yannitte Iko-Turizime looje baalanti wolootta Turizimete jironke jiroo’manke safo ikkitanno gede dandiisate Turizimete handaarira guffa ikkitino kiphonna gaance hunatenni Itophiyu noose cibbantino jiro horoonsidhanno gede assa hasiissanno. Xa iillinoonni Turizimete latishshi miinju safooti. Wiliile nookki Industire lame kaayyo abbitannote. Kawaanni jiro;ka’aanni diilallote gade agartannote.
Bakkalcho Sadaasa 18, 2016 M.D
