Kaaliiqi manchi beetti hee’rannonna loose itanno baatto kalaqe baatto mulla ikkitinota huwatiti addi addi kalaqama kalaqino baattote aana. Manchi beetti loose daafurenna dafe itara kalaqino baatto duuchare bayidhinote. Mannu,saada,haqqenna gaxigalu shiimunni tenne baatto badooshsheeti. Kuri giddonni manchi beetti duuchankare massaganno gede biilloonya baxxitino egennoo ledo eennasi tenne baatto danchummatennino ikko bunshetenni lossanninna gicishanni afamanno.
Balaxxe kalaqantinoti baattote manchi beettinni. Tini baatto babbaxxino korkaatinni manchi beetti beeheenna beehante heedhanno. Poletiku Danni kuri giddonni mittoho kalaqamu Danni bada hoogirono. Konniraati Awuroppa,Eezhiya,Afrika…. Yinanni babbandoonnihu.
Ila ille lossi’ne sunqinannihu gobba heedhurooti,keeru hee’rirooti. Daddalle jiro maareekkinannihuno gobba heedhurooti. Minu nookkiha jiro hiikko maareekkinanni? Hoowe nookkiha kaameelanna saada mama gashshinanni? Koniraati balanxe hoowe hoophinannihu;mine mi’ninannihu. Minu hoogiro duuchuri afimale gede ikkano.
Xa gobba amanke diigara giddonna gobba diini goxikkinni galanni noo yannaati. Minenke yemakku gede mine galanni qonxooranno moyichi gobbayidi diinira sayise aara dodamanni afamanno yannaati. Lukkichote quuphi caacurre ikke fulannohu amate qooli giddo hanqafame iibbille afi’rirootiwe! Amate qooli ganame hiiqqamiro caacurru mamiinni dadhame luo afi’raoyya? Giddo hee’re bowannowe. Ama reyituro giddohu mullawe reyaanno! Xa ama gannanni hee’noonnihu ilama ciirtannokki gede assateetiwe!
Konniraati ille sunqinannihu gobbanna balaxxe ama heedhurooti yoommohu;loosi’ne maareekkiannihuno goba heedhurooti. Tenne baatto aana mittu mitto riqiwannalla hee’nanni.manchi eetti atiray batireenna 80-100 diri geeshshaatilla hee’ranohu. Hakkuyi gedensaanni riqiwino oosolla ragidhe heedhanno baattooti.
Konne duucha coyi’roommohu tayixe Itophiyu diina qasate assitanni noo sharro assoe bushshu yiisiissannota ikkase huwateeti. Eewnni assoe bushshu! Ilamoe anera! Diina saalfachishshanno cigile diriirteenna deerru deerrunkunni doo daga gobba gatisate gaaddanna kuneeti illenkenni la’nummo. Alba xaaleenu oli waro Itophiyu daga hiittoonni mitto ikkite Adiwa gaaddinoro dhaggetenni nabbawoommohunni roore tayixe Cancishaancho Juntu gaamo gobba diigara dayino futakko kalaqamasi hawanno gede assate diriirsitino cigile ane ka’a ayi naqqasannoya?! Ane ka’a tenne dhagge ayi borreesse ilamate sayisannoyya?!
Tenne yanna Aliito”oo ille”yanni la”oommo! Techo barru Maaja 22/2013 M.Dirooti. dhagge habbannokki maalale loossino Itophiyu daga Aliyyeenni kaino gobba horrate harinsho diinu Amaarunna Tigirayete qoqqowi hajooti yee mittimma diigate wo’naalirono Itophiyu daga diina saalfachishshino. Tini di hambanni dhaggeeti. Tenne dhagge loossanno ilama umonsa kakkalte sa’annona tenne borro nabbabbanno ilama Gobbankle annuwinke,oosonkenna amuwinke mundeenna miqichinni ikkitinota habbinannikki gede kuneeti!
Xaaleenu oli waro Shewaregged Gedile Olantote sinqe shiqishshinota dhagge odeessitanno. Xa kayinni Sidaamu Qoqqowi amuwwi gaadaanote Sinqe qixxeessanna,mundee aanna illenkenni la’noommore dhagge affona. Meyati ille sunqinannihu gobba heedhurooti yitino. Qaccetenni qaccete geeshsha amuwu Sinqe qixxeessatenni biqamino.
Woxu noosihu woxunni,wedellichu dhukunni,meentu hayyotenna Sinqunni Itophiya gatisate qodhite ka’inoti kalqe maalalsanno mittimma leellishanno. Itophiyu amuwi Otootto maassantinote. Ilamannohu duuchunku gobba kisantanno wote noosi xirchi baatto milli assanno. Ani wolere mayyeemmo! Itophiyu daga mittimmara Itophiyu baatto teesso’ne iltine sunqe,ce’ine xuudhe,loosidhine duubbe yaanni;
“Hirphi’ne baatto milli assanno
Xirchi’ne allagga gudanno
………………..” yoommo. Keerunni.
Maaja 22 , 2013 M.D
