Keere hegersate hananfoonni loossa kaajjite suffara hasiisanno. Gobbate giddo keerunna ga’labbo ge’anno gede hananfoonniti haammata loossa no. Gobbate mootimma massagganni afantannoti Jireenyu paarteno sa’u muli barrubba giddo assitino layinki songonni gobbate keere hegersitanno loossa kaajjishshe sufisiisate dandiisiissanno uurrinsha amadatenni xawishshunni kaajjishshino.
Paarte “Qaalunni budu geeshsha” yaanno adawarshinni amandoommo Arfaasu agani 23-25,2017M.D geeshsha sase barrubbara harissino 2ki songonni fushshitino xawishshinni; hegeraamu keeri gobbanke keeri tiianna safo hattono duuchu handaari Jireenyira wowe ikkasi paarte huwattannota kulloonni.
Konni kaiminnino, paartete songonni hananfoonnihu duucha beeqqisiissanno gobboomu amaalamme seyooteni gumulantanno gede, gobbate giddo duucha yannara ka”anni dagoomu mereero huluullamme, babbadamooshshenna xixxiwama kalaqqanno hajubba tirantanno hayyo kalaqatenni malu dogga injeessate, dandaamirono gutu ajuuja amande sumimmete iillate harinsho paarte wo’mu wodaninni irkissannota kulloonni.
Hananfoonniti reekkote farco loosu aana hossannonna seyootenni gumulantanno gede agarranni yawo garunni fulateno paarte murcidhe loossannota xawinsoonni. Gobbate hegeraamu keeri hee’rannokki gede gufissannori qodhite sharrantanno wolqubba ledo assinanni hasaawi kaajje sufanno gede raga worroonni.
gaancubba gargaratenna ga’labbo geisate ragaannino miillanna massagaano illachunni loosa agarantannota sumuu yitino. Annimmatenni yawonsa fulatenni gobboomu keeri daafira loossanno gede hattono gobboomu mittimma kaajjitanno garinni qinaabbe loossannota gutunni sumuu yitino.
Daga halaalaancho farco afi’rate qoossonsa guuta ikkino garinni buuxantanno gede, farcote amanyoote yannicha assa, handaarunni ikkadda ogeeyye kalaqa, lifixa owaante aa dandiinanni garinni murci’ne loosa agarranni.
Songotenni sa’u umikki uurrinshu songonni babbaxxitino handaarranni dagooma horaameeyye assitanno loossa gumulate worroonni faasho garunni gumulamase keennoonni. Addi addi wodho haaroonsinoonni. Loossate hayyonna gumulshu seyootenni maareekkamanno garinni faasho worroonni. Xaa geeshsha afi’noonni seyoo kaajjinshe sufisiisate dandiinanni ragano hattonni. Roorenkanni kayinni gobboomu mittimmanna keeru hajo jawa mini looso ikkinota faasho worroonni.
Ikkinohura, gobboomu keere hegersatenni duuchu handaari Jireenya buuxisiisate yawo kayinni paartete miillanna massagaano hajo calla ikkitukkinni baalunku qansooti hajooti.
Dagate gede ikko gobbate gede geatenna teense hee’rate keeru gutu afoonkenna hedonke hattono gutu sumimmenke ika noosi.
Gobbate yaa mannu dagoomitte xaadooshshinni mittimmatenni hee’rate yaate. Kuni dagoomitte xaadooshshi qansootu mereero kalaqamunni ikko mannu kalaqino assootubbanni babbadamooshshu kalaqamara dandaannohu keeru hoonge heedhurooti. Keeru manchi beettira barru barrunku heeshshosi giddo qarunni hasiissanno hajubba giddonni mitto ikkinota seekkine huwata hasiissanno.
Keeru wolunniwiinni agadhinanniha ikkikkinni mittu mittunku manchiwiinni agarranniho. Rosichunni, keere wolowiinni afi’nanniha assine la’nanninna agadhinanni laooshshi gara dikkino. Hakkiinni sairo, hedote badooshshe kalaqqino hajo tirate qodhine dubbo e’ne sharramantenni woy qaccete uurrine yekkeeramantenni gamba yine hasaambe tidha dagateno ikko gobbate jawa horo noose ikkinnina kisaara diafidhino.
Keeru halchineenna woy hexxo assi’noonni daafira calla daannoha dikkino. Wolootuwiinni agadhineennano daannoha ikkinokki daafira mittu mittunku manchi woy qansichi umisi, maatesi, qamattesinna gobbasi keeri daafira yawo adhanna balaxe umisi hedo keerabbinota assi’ra agarranni.
Keeru nookkiwa hegertanno gobba dino. Dagate latishshunna hobbaatu hasatto dawaro afidhannohuno keeru hee’rirooti. Xa’mubbankenna hasattonke baala dawaro afi’ra hasiissannohu sharrotenni ikkikkinni keeru doogonni calla ikka hasiissanno.
Keeru wolootta bissawiinni agadhinanniha assine heda jawa so’rooti. Dagate gede mittimma kaajjishi’ne hobbaate latishshanna dimokiraase buuxisiisate ragaanni keeru wonqote. Keeru heeriro mittimma, baxillu, hagiirru, latishshunna lopho amadisiisante daggannote.
Hedote badooshshi kaiminni gobbankera babbaxxitino gaamo addi addi qooxeessubbara qodhite sharrantanni afantanno. Mootimmano kuri bissa eemarantanno gede assatenna hasaabbe qarrubbansa tidhitanno gede jawa wo’naalsha assitanni keeshshitino. Saeno, seera agarsiisate qaafo adhitanni afantanno. Mite mite qooxeessubbara qodhite sharrantanni keeshshitinori keeru woshshatto adhite dagoomu ledo karsama hanaffino.
Gattinorino xa’monsanna hasattonsa keeraatunni hasaabbe tirtannonna gutu sumimme widira dagganno gede agarranni. Tenne yannara Tigirayete qoqqowira seerimale ikkino garinni biilloonye amadate gaamotenni sharrantanno bissa dagate aana jawa shetto kalaqqinota kaima assatenni Xaphoomu ministirchi Abiy Ahimed (Dr) kuri bissa dagate keere hembeeltannokki gede sa’u muli barrubba giddo Tigirayete afiinni sokkanna amale saysinoti qaangannite.
Ikkinohura, dagate gede ikko gobbate gede teense heerate keeru gutu afoonkenna hedonke ikka dandiiro gutunni loonse lophineemmo. Keeraancho gobba ilamate ragisiinseemmo. Sa’u ilama kalaqqino hedote badooshshubabni duumballicho yekkeerammanni albillicho dagganno ilamara ikkitanno gobba danote tuga dihasiissanno. Konnira, gutu keerinkera yawo adhine mittimmatenni uurratenni gutunni loosa ga’ara yine dinye amandanni hajo ikka noose.
Amsaalu Felleqe
Bakkalcho Arfaasa 29, 2017 M.D
