Yesuusi gobbaanni keere, mittimma, baxillenna araarunnire tenne kalqe aana rosiisannonkehu wolu nookka? Mayira huluullamummo? Dino! Isi ninke woxxara, ninkera lawishsha ikke rosiisara tenne kalqe Manchu beetto ikke hadiro ilamino.
Kiristinnu amma’no rosiissanno garinni luphiima base uyinanni ayyaanna mereerinni amma’note hanafonna gumulo ikkinohu Mootichinkenna xagichinke Yesuusi ilama qaangannihu Gannu ayyaani mittohonna albisa ayyaanaati. Ilamasi korkaati gatote sokka amaddinote. Ilamannotano albi Nebiyaatooti himantinote; konnira ilama hexxotenninna qalli yite agartanni keeshshitino Yesuusaati ilaminohu. Konne barra “Ganna” yine ilamino barra qaangeemmo.
Kalqete nugusa Yesuusa ayirrisanna qaaga xaa yannara “ilamishsha” yine qaqquullinkera ayirrinseemmo gedeeha dikkino. Kuni mootichu ilamishshaatina.
Mootichu Yesuusi ilamishshi umisi tenne kalqera haa’re dayino kalaqamu hexxonni kainohunni bacu tenne ikkito gotti assite hagiirrunni adhiturono; isi ilamasi haadhe daggino hexxo halaale ikkitannokki gede jawa gede hunotenna baote loosi aana dirantinori hee’ransa dhaggete ikkito giddonni mitto bisooti. Togo yaa Mootichu ilamino yinita mootimma hasidhannori manchi beetti ilama giddonni addintanni giwisidhinosiri noonkanni. Isi kayinni kalqete mootichaati ilaminohu.
Manchi beetti illetenni leellannokkiha Yesuusa nafinni giwisidhinowe biilloonyenke adhankeraati yite. Tenne baatto aana ikkanni noorinna mimmito cancishannorino mittu wole giwisi’ratenna meessaneeto baxate. Konne isinni Yesuusi baxillisinninna shooshanqeinni eemaro.
Kuni mootichu biilinke Yesuusi manchi beettira baalaho gatote hexxo ikke xawinohu Kaaliiqi gatote hexxo qaali ilamannokki gede,ilami gedensaannino hegereha ikke xawannokki gede, konninni gatote hexxo ikkitannokki gede cincunna kakkachu beetti noosi dhukinninna egennosi geeshshinni dandaannore baala assatenni badhe dihigino.
Hexxote qaali ilaminota hagiirru duduwo jawu masillinni macciishshinohu hunote beetti Mootichu Heerooddisi widoonni ilamasi adda ikkitinota meessisi biilloonyi yortonni ledo amadisiise co’ontanni macharaarrete kakkachimmanni Beteliheemete quchuma qaaqquullu mundeenni hayishshasi tenne dhagge biso ikkite sa’ino. Isitero labbaa qaaqqi kalqete mooticha ikkanno yine himannoonnihu ilaminohura hiikkonneetiro bade afa hooge hattenne yannara ilantino qaaqquulle shee guda Yesuusano hakkaanni shaateetinkanno. Kayinnilla dikkinosi.
Mootichinkenna xagichinke Yesuusi Kiristoosi ilama techo manchi ilame lophatenna hee’rate Isinte gedee akata: keere, mittimma, hagiirre — afi’re mimmitu ledo sumuu yee hee’ranno gede daggino ayyaanaame kayyooti yinummona konnne ayyaana ayirrinseemmo woyte kuriuu gumulate widoonni ninke hala’ladunni Itophiyu daga maa lambeemmo yitannote widira hinge la’’a gadachitannonkete.
Itophiyu daga babbaxxitinota haammata budunna balchoomu qoleno amma’notenna ayyaanna afidhino daga ikkitannna; kuri ayyaanna aaniidonsa la’nanni woyte mittu woluyiwiinni baxxinoha lawolla ikkinnina gidiidonsa xunse hegersinohura biifado mittimma leellishanno akati noonsa.
Ninke Itophiyu daga mittimmankenna danchummate halammenke xawisi’neemmo haammata ikkitubba mereerinni ayyaanu yanna mittette.
Kuriuu ayyaanu yanna baraarshuwa giddonni gobbankera hala’lado kiristinnu amma’no harunsaanonni baaliiqe ayirrisamannohu Gannu (Mootichu Xagichu Iyyesuusi ilama) ayyaani mittoho.
Kuni ayyaani, wolootunninte gede, danchummate balchoomma gumula qara amma’note akata asse ayirrisamannoha ikkanna; amma’note badooshshe agurranna wolu mittu badooshshino nookkiha fiixaho allaggicho yinikkinni mitte mannimmanni, fafinohu gamba yeenna, giwammohu araarame maaro adheenna, hexxo mudhinohu haaroo’me xaweenna, hagiirru baqqeenyi kalaqameenna ayirrinsanni ayyaanaati.
Kuni ayyaani beeqqisiisaanchimmasinna hanqafaanchimmasi widoonni danchummatenna mimmito irkisate woy qixxaawote baci beeqqo assatenni afaminoha ikkanna; hagiirre mereersasi bikkini hagiirrunna keeruno baci beeqqaano hasidhannore ikkansanni, kuri baala gamba asse aaneessatenni keeru guma ikkitinori giddonni hagiirre tuqisannohu mitii’minoha(anga hara’mitinosiha) irkisatenninna kaa’latenni ikka noosi.
Hudi’noha calla ikkikkinni olliichunnino sae ayee mannano hagiirsiisate daafira hajame doogaanchu nafa gatikkinni ‘’mannu mine no, buna siine adhiinannina eeggatena e’’e’’ yaatenni; bullinoha buurre, kallinoha uddisiinse, yaadinoha hagiirsiinse, ilaancho itinse haykise, xissammohano towaante itinse, dadillinoha jawaachinshe, wolu oosicho mallaandikkinni taashshine la’ne ayirrinsanni balchoomi noonke daga ikkanke techo kayinni ayyaanunni roore baaliqinseemmoha ikka noosi. Kuni Yesuusi ninkera yee ilame kakkalamino baatooshshe meddi di yaannoho.
Ikkinohurano, jeefote kuni Gannu ayyaani wo’ma Kiristinnu amma’no harunsaanonna Itophiyu hattono Sidaamu Dagara keeru, mittimma, baxillu, araarunnihanna gatonniha ikkankera dancha halcho’ya xawisanni
Dancha Gannu Ayyaana!!
Demmellaash Demmeqe
Bakkalcho Sadaasa 24, 2017 M.D
