Hawallalle 2017/18 bayira Sidaamu daga diru soorro Fichee Cambalaallate ayyaanira keere iillishini’ne;iillishinke.
2017/18 yoommohu mulla dikkino. Sayinsitte doogonni borreessine faajje assa hoongirono; Sidaamu ayyaanto kalaqamu fullankenni buuxxe uyitinonke eltootina meessinsa barru kiiro afidhino gobbuwa giddo hee’noommota naqqasannohona ee 2017/18 yuummoro kapho di ikkanno. Konneno Hawaasi Yuniversite Sidaamu Xiinxallo uurrinsha muli yanna giddo Ayyaantotenni ledo halantenna xiinxallite kalaandara qixeessitannota ammaneemmo.
Fichee cambalaalla baca hornyuwa hanqaffinota assannohu umihu meessi ha’nura egennonni beeddahe la’ne akkalu diri haaru dirira soorraminota kula dandiissanno egenno annuwa ikkankeeti. Konnira hundinni kayisse butukkukkinninna sayinsitte egenno ledantukkinni techora iillishshu akkaakkankenna awurrankera galatu nooe.
Annuwinke di barra kiirre la’nanni gara calla iqqitinonke. Ficheete giddo baxille, araara, ayirrisama, kalaqama baala agaranna mararro shooshanqe eltinonke. Kuri hornyuwa kayinni 2008 MD Naamiibiyaho Windi Hok Sidaamu daga kalqoomu deerrinni egennantannonna woshshantanno gede assatenni “UNESCO” amammandannikki doninni borreessiissu. Ee;techo angankera nooha shutunni la’ne shotisa di hasiissanno. Konne yoommohu di haafa yeti. “Fichee cambalaalla polotiku hekko ubbinose,barrano murtannori motimmate” yaatenni dagittete qooli aana ayirrado hornya hoshooshannore laeeti.
Konne buuxateno Hawaasi Yuniversitera Sidaamu xiinxallo uurrinsha Dayirikitericha ikkinoha Siyyum Yunkura (Dr) bilbilunni xa’minummo. Dagittete qoolira dudumbanniri mageeshshi geeshsha halaaleho? yineennasino Siyyum (DR);“Togoo hasaawi sorote duduwooti. Ninke Ficheete mitto barra balanxe ayyaanu daafira Yuniversitete giddo simpooziyeeme harinseemmo.
2006 MD hanafe harunsotenni xiinxallo assino manna hasaawisoommonkanni. Barra qaddo assino coyino ayyaanto murtino barraati. Fichee Cambalaalla hossanno barri shota xiiwonni soorramannoha di ikkino. Ayyaantotenna sayinsetenni buunxanniho ikkinnina; kawa ka’a qollanni barra di ikkino” yaanni naqqasino. Togoo duduwi UNESCO borreessamate iillishino hornyuwa hoshooshannohona meessi bude meessi agarro.
Wole widoonni UNESCO riqibbinori konne ayyaana keenate eeli geeshsha dirritannori nootano huwata hasiissanno. Eela dirrinanni woyte baadiyyete geerru beeddahe la’’anno doogo,amuwu qixxaawo,saadanna kalaqamaho uyinanni ayirrinyenna duucha hornyuwa keena digattanno. Hattenne yannara mittono Fichee Cambalaallate hornyuwa hoshooshannori leella di hasiissanno.
Wolu kayinni Fichee cambalaallate hornyuwa mereerinni keerenna baxilleho;araaraho. Koma amande haaro diro sa’’a ficheete hornya dikkitino. Ayirradu Sidaami daga gudumaalira danganni woyte baxillu siqqonna biifado qeexaala adhine daa hasiissanno. Gudumaalu halaalu baychooti; Ficheete halaali kayinni koma akkalu dirinni ledo hayishshi’ne haaru dirira hulluuqate.
Biifadu qeexaali kalqe daa’’attannoho. Heeeee’ri yine guluphinannihu bayiru Sidaamu budi jajjabba massagaano guluphishiishinohonna halaale hawaqisinoho. Miteekke gidu giddo gardaamu dihoogannona Sidaamu akatooma afidhinokki mite mite mishiishaano qeexaalu yannara assitanno busha akatooma ha’nura budu annuwwi agara hasiissanno.
Mitte kayinni hawanna deama hasiissannokkiri no. Ficheete barra saadate uyinanni agarooshshinna ayirrinyi korkaatinni maala di intanni. Mine hee’riro nafa Ficheete hashsha gobba gashshinannita annuwu naqqassanno. Ikkollana kalqe daa’’attanno ayyaanira Adonna buuro agurranna mayi kisi’ranno? Ficheete hornyi konneetina hoshooshannore baala makki’ne budenke hardinso!
Wirro Hawalle Sidaamu daga diru soorro Fichee cambalaallate ayyaana keerunni iillishi’ne; iillishinke! Ayidde cambalaalla!
Yaared geetaachew
Bakkalcho Badheessa 18, 2017 M.D
