Abbebech Maatewoos
Addis Ababa:- Itophiyu hanaffino giwirinna luphiimu deerrinni lossate wo`naalshi gumaamo ikkasi Mootimmate komunikeeshiine owaante ministirchi Dr Leggese Tullu xawisi. nMootimmate komunikeeshiine owaantenna Federaaletenna qoqqowubbate tuqu xaadooshshi massaganoonna ogeeyye giwirinnu sayinse reqecco Maakisanyote barra towaattino.
Dr Leggese Tullu towaanyote yannara tuqu xaadooshshuwara uyino xawishshinni; Itophiyu giwirinnu hiikkinni kae xa noo deerrira iillino gede; Itophiyu giwirinna laashshine meessi kokkera hosiisatenni sae dikkote shiqishatenninna tirfe laalcho laashshate widira tareessinota leellishshanno loossa leeltanni noota reqecco towaati yannara buuxa dandiinota egensiisino.
Giwirinnu Itophiyu miinji giddo qara baycho amadannoho yiinohu Ministirchu; kalqete deerrinni jiroo`mitino yinanni gobbuwa kaiminsa giwirinna ikkasi kule; konne gumultinohu hasiissanno reekko abbansanni ikkino gede coyi`rino.
Giwirinnu industirete safo tuginohu laashshine “Kokkete” calla ikkinohunni dikkote soorratenninna atootino laalcho laashshatenniiti yee; ikkinohura, Itophiyu hanaffino giwirinna luphiimu deerrinni lossate wo`naalshi gumaamo ikkinotaati buuxisinohu.
Ministirchu yiino garinni; Itophiyu giwirinni hooffaydi laalshshote rosichinni fule qasiisote irshinni; addi addi tekinoloojubba haronsi`ne tirfe laalcho laashsha dandiisiisanno laalchimmate deerrira iillitino. Kuni gobbate gede naaxxisanno, gobbayidinni e`anno laalchubba riqiwatenni hattono ataakiltetenna babbaxxitino laalo gobbaydira soyatenni gobbaydi woxu soorro afi`ra dandiinoonni.
Gobba noose hala`lado baattonninna bushshu dani, noose kalaqamu diilallote gadi kaiminni xaano baca gattino loossa noota xawise; diilallote gadi soorro ledo amadisiisaminohunni xaaddanno bushshu hoshooshama, giwirinnu ikkadu garinni yannoo`ma hooga jawa qarra ikkinotano towaanyotenni buunxoommo yiino.
Qarra tirate daa“attote shiqqino haaruudde tekinoloojubba dagoomaho shiqishate loosi kaajje sufannotano coyi`rino. Miidiyunna komunikeeshiinete handaarinni noo bissa konne egensiisate ragaanni yawonsa fultanno gedeno qummeessino.
Itophiyu pireesete uurrinsha qaru loosu gumulsiisaanchi kalaa Geetinnet Taaddesse isi widoonni; towaanyotenni giwirinna yannoonsate looso mageeshsha loonsanni hee`noonniro lainota xawisino. Giwirinnu ministere giwirinnu loosira yannaasincho tekinoloojubba horonsi`rate mageeshshi illacha uyite loossanni afantannoro buunxoommoho yiino.
Kalqe iillitinowa giwirinnu tekinoloojenna albi hayyo yannaasinchotenni soorranni nooha Itophiyu giwirinna qansootu reqeccote afante la“a noonsa yiino. Reqeccote giddonna baattote aana noota giwirinnu loossa mittu mittunku Itophiyu qansichi egenna hasiisassannosiho yeeno coyi`rino.
Konne assa dandiinannihu tuqu xaadooshshuwa widoonni ikkinohura mashalaqqe duuchunku dagoomiwa iillitanno gede jawaantetenni loosa hasiissannotano huwachishino. Giwirinnu seeda yannara gobbate miinju xinta ikke keeshshinota kayisatenni; gobboomu gumi hala`ladunni daanno gede tuqu xaadooshshuwa uminsa qeecha fula hasiissannotano kalaa Geetinnet coyi`rino.
Giwirinnu ministirchi Dr Girma Amente towaataanote xawishsha uyi yannara; reqeccote giwirinnu quchumu deerrinni boode bayichubbara gumulama dandaannota haammataho huwanyoote kalaqinoho yiino. Reqeccote Itophiyu giwirinnu handaarinni yannoo`mitanni dagginota leellishannota towaanyote aana beeqqitino massagaano xawissino.
Giwirinnu ministere qixxeessonni “Wo`naallote mininni wixu geeshsha” yaanno massagote hedonni sayinsete muuzeemera faajje ikkinohu giwirinnu sayinse reqecco sa`u lamalara Xaphoomu ministirchi Dr Abiy Ahimedinni fanamase qaanganni.
Bakkalcho Onkoleessa 10, 2015 M.D
