Addis Ababa:- Lamalkiha gobboomu doorsha worantino yannanni harisate hasiissanno qixxaawo assinanni hee’noonnita Itophiyu Doorshu Boorde egensiissu. Aanino diro assinanni doorshi dijitaaletenni harisamanno gede hanqafo qixxaawaseno leellishshu.
Itophiyu Gobboomu Doorshu Boorde Gambisaancho Meelaatiworqi Haylu 7kihu gobboomu doorshi balaxote qixxaawonna amadantino hajubba aana tuqu xaadooshshira uytino gaazeexu xawishshinni egensiissino garinni; 2018 M.D harinsanni gobboomu doorshira boorde hasiissanno qixxaawo assitanni no.
Doorsha harisate amanyooti balaxote doorshi, doorshu yannanna gedensi doorshi fooliishshuwa no yitinoti doorshu boorde gambisaancho; leekki gobboomu doorshinni afi’noonni rosichuwa keenatenninna xiinxallo assatenni boorde hasiissannota balaxote qixxaawo assitanni noota xawissino.
2013M.D harinsoonni doorshi gaangaawira hajo la’annonsa bissanna siviilete maamarra ledo hasaawa assini gedensoonni boorde ontu diriti istiraateejike mixo hasiissannoseta kaajjishshaho iillineenna loosu widira ease egensiissino.
Gobbate xaa geeshsha assinanni doorshuwa manuwaaletenni harisamansa kayisse; aanino diro assinanni doorshi dijitaaletenni harisamanno gede hanqafo qixxeessamase qummeessitino. Doorshu gumulsiisaano filate harinsho lainohunni konni albaanni onilayinetenni (online) borreessante loosunniwa e’anno ha’rinsho noota xawisse; aanino doorshira doorshu gumulsiisaanohu umisiha ikkitino keenishshu xa’muwa qixxeessatenni onilaynete fonqolo adhiteenna dandoonsa buunxeenna loosu widira e’annoha ikkanno yitino.
2018 doorsha dijitaalete amanyootinni gumula konni albaanni dooraano borreessateno ikko doorsiisaano komite borreessate fultannota luphiimma fulo ajishannoha ikkasi leellishshe; poletiku paartuwa hattonni miillansa borreessitannonna boordete uytanno amanyooti diriirsamasino xawishshunni buuxissino.
Boorde 2018M.D harinsanni doorsha bayiriidi seerira ofollino yannate saleedi garinni harisate doorshu xaawubba tantano, huuriweelo ikka, meentoho, geerrahonna bisu musamaanora noosi injo keenate loossa loossanni noota xawissino. Konninnino gobboomu deerrinni afantanno 50 kumi doorshu xawubbanni xaa geeshsha 12 kumi doorshu xaawubba towaanyo assinoonni.
Doorsha seyino garinni harisate loosantanno loossanni mittu mittunku doorshu beeqqaanchinna gumulsiisaanchi loosu kifilensa affe loossanno gede dandiissanno maanuwaale qixxaawase buuxissinoti gambisaancho; mitte mittenti loosu kifile konni biddissi kaiminni loossannoha ikkanno; maanuwaale mimmitunniwa amaalama dandiissannota ikkaseno xawissino.
Dooraano doorshunniwa hadhanno woyte Fayda ayimmate badooshshe amaddara doodhinanni yitinoti gambisaancho; kunino gumaamu doorshi harisamanno gede kaa’lanno. Togo yaa Faydu ayimmate badooshshi noosikki manchi dooraanchimmatenni hoolamanno yaa ikkitinokkita egensiissino.
Doorshu konni albaanni assinanninte gede dandiissanno akatubba noonsa doorshu xaawubbara harinsannita xawisse; gobbate giddoydi daramaano afantannonsa bayichuwara doorshu xaawubba kalaqatenni caa`linanniwa heedhanno qansooti dooraano calla ikkitukkinni filamaano ikkitanno gedeno; doorshu xaawubbawa ha’rannohu doorshu uduunni garunni tuqqannore ikkitanno gedeno loojistiikete handaari aana illachunni loonsanni hee’noonnita xawissino.
Demmellaash Demmeqe
Bakkalcho Onkoleessa 28, 2017 M.D
