Addis Ababa:- Musliime daga Id Al Adiha (Arafu) ayyaana ayirrissanno woyte qarramino manna hedatenninna noonsaha beehatenni ikka hasiissannota Itophiyu isliminnu hajubba xaphoomu amaale mini egensiisi.
Amaalete mini baalante isliminnu amma`no harunsaanora hawalle 1 kumi 446ki diri hijiru Id Al Adiha Arafu ayyaana iillishi`ne yaatenni sokka sayisino.
Id Al Adiha mimmito kaa`late ayyaanaati yiinohu amaalete mini pirezidaantichi Sheek Haaji Ibrahiim Tufa; musliime daga ayyaana ayirrissanno woyte qarramino manna qaagatenninna noonsaha beehatenni ikka hasiissannota odeessaanote uyno xawishshinni qummeessino.
Isliminnu rosiishshi garinni Arafu barri waagisi jawa ikkasinni baalanti musliime daga qoorretenninna huuccattotenni sayissanno gede Sheek Haaji Ibrahiim sokkasi sayisino.
Gorro gumu`la dandiitannokki anga ajjinorenna lossannohu noonsakki qaaqquulle hattono kaa`lo hasi`ranno manna baala dhuku fajji bikkinni irkisatenni ayirrissanno gede woshshatto shiqishino.
Itophiyu babbaxxitino amma`no harunsaano haammatu sanira mittimmatenninna ayirrisamatenni heedhino gobba ikkasenni ammanaano woloota amma`no harunsaano ledo mittimmasinna roduuwimmasi roore kaajjishatenni ayyaana sayisa hasiissannota lede qummeessino.
Abbebech Maatewoos
Bakkalcho Onkoleessa 28, 2017 M.D
