Addis Ababa:- Aantete hananfanni goyirete loosira balaxote qixxaawo assinoonnita Aliyye Sidaamu zoone Wondogennetete Woradi Irshunna Kalaqamu Jiro Latishshi Borro mini egensiisino.
Badheessu yanna loosinni iillino gide ataachinanni baseno qixxeessinoonnita borrote mini qummeessino.
Woradu Irshunna Kalaqamu Jiro Latishshi Borro mini Sooreessi Kalaa Kaasahun Birhaanu Itophiyu pireesete uurrinshara xawisanni; aantino goyirete yanna looso hanafate dandiisiissannota balaxote qixxaawo gumulloonniha ikkanna; latisate mixi’noonni baatto, wixunna harishsha qixxaabbinota coyi’rino.
Konninni, 3 kume 450 hektaare baatto goyirete wixinni diwate mixo amandoonnita kulinohu Sooreessui; xaphooma 1.5 miliyoone kuntaala laalcho gamba assinannitanna mitte hektaarenni 35-40 kuntaali geeshsha laalcho kayisateno mixo amandoonnita coyi’rino.
Konni mereerinni 935 hektaare baatto qara qara ikkino gidinni dimbanniha ikkanna; Hayxu, Badala, Gaashe, Wahe, Qamadenna Baaqeelu woradaho goyirete yannara latinsanni qaru gidi mereerinni afantannoreeti.
Kalaa Kaasahuni xawishshi garinni; woradaho afantanno 13 olluubba mereerinni 8 olluubba Gammoojjaame diilallote akata
afidhinore ikkitanna gattinori 5 olluubba Alichaamu diilallote akati noonsareeti. Konni garinni goyirete looso roorsine loonsannihu Gammoojjitte diilallote akati noonsa olluubbaraati.
Konni daafira goyirete yanna loosira sirchunna bushshu harishsha shiqqo qixxaawo assinanni hee’noonni yee; Itophiyu dooramino sirchi uurrinshanni, Hawaasinna Wodiidi sirchu qixxaawo uurrinshuwanninna babbaxxitino sirchu shiqishaano uurrinshuwa ledo qinaambe sirchu shiqqo qarri hee’rannokki gede ikkado qixxaawo assinoonnita buuxisino.
Amadisiiseno, sa’u badheessu yanna gide gamba assa dihananfoonni yiinohu Sooreessu; iillino gidi ba’’annokkinna hafanfarannokki gede ataachinanni base qixxeessinoonnita buuxisino.
Loosidhe galtinorino laalchonsa dikko fushshite hirtanno gede dikkote mittoo’ma kalanqanni hee’noonnitano hattonni.
Loosidhe galtino daga iillino gidi baikkinni balaxxe foorarchu noo yannara kayissanno gede lede huwachishino.
Maatete jireenyi loosidhe galtino daga baqqi assannoha ikkasinni fano galtanno baatto heedhannokki garinni loosidhanno gede sokkasi sayisino.
Qiddist Gezzaheny
Bakkalcho Onkoleessa 28, 2017 M.D
