“Diini hedinoti Roorete,maganuyiti kayinni roorete Isi hedinoti rewotena maganu sayinso”e heeshshote”
Tayixe 6ki gobboomu doorshi harannokki gede kellesha fane duuchu diini hunara sharraminoho. Gobbayidi gobbuwa lendanna gobba giddo hemaanchino doorshu harannokki gede qeechansa fultino. Doorshu hara hoogiro lame kaayyo noonsankanni; umiti Itophiya diigate,layinkiti reekkote gashshoote kalanqe olanto massagganno gede assate. Itophiyaho dimokiraase hala’litaranna gobba hudetenni wolaphitara hasidhannokki diinna bacate.
Ikkollana wolaphosira anga aannokki Itphiyu qasichidii diia saalfachiishanno garinni timbiliqqe 6ki doorsha doortu;diinu irraawi. Diini Itophiya cancishate jile qixxeessino jili irraaweenna,diinaho Itophiyu umbe dudubbara daggino gobbayidi gobbuwa odeessaano halaalu noowa illensanni la’u. konni albaanni doorshaho daga borreessantannokki gede diinu bacare assino;sakaalino. Kayinnilla halaale fiilte buuxxanno Itophiyu daga kaardensa anga amaxxite gobba soorranno,massagannonke yitannoha doodhitulla.
BBC, Biritaaniyunnihu kalqoomu odoote uurrinsha amadosi aana “Itophiyu xaphoomu ministrchi Abiy Ahimedihu biilloonye amadi kawa umi doorsha harinsanni hee’noonni.” Yite odeessitinoha ikkanna;
Yuro News kayinni; “Itophiyu mootimma umiho yitinno xawadu doorshi aana Itophiyu daga doortanni afantanno”yaanni odeessi.
CGTN kayinni; “doorshu boorde taalo doorsha harisate e’ino qaali garinni Itophiyu daga doora hanaffino yaatenni albiidi qoolinsara borreessino.
Diigantanno yinanna gamba yine,maniidhanno yinanna bowirre,hembeelanranno yinanna ge’ne, 6ki gobboomu doorsha keerunni gumulliti diinu hallo hiiqqite Itophiyu haxo gotti assitinote.
IFDR xaphoomu ministirchi dr.Abiy Ahimedihu doorshu soodo Addis Ababu quchumira latishsha towaatanni,xe’inore wonshate loosu aana hosino. Barri yannara ilaminowa Jimma Aggaaro-Bashaahsa horophilunni buuwe huurosi oye higanni mitte sokka sayisino. “doorshu dooramanno;gobba kayinni suffanno; heeshsho di uurritanno. Kawaanni doorsha harinsanni wole widoonni gobba latinso” yaanni techo geeshsha loosu aana leellanno.
Diina irraawissu Itophiyu dagarano galatasi shiqishinohu Dr.Abiy,duucha doogonni Itophiyu doodhitinotanna qeeltinota buuxisino.
Itophiyu qeelannotanna wirro kalqete sumase lallambannita buuxissinorinna addintanni hagiirsiisannori; ilaancho mundeentenni,anna shii’re madaadhinohu dadillunkunni,lame lubbonni nooti daafurisenni,geerchu siqqotenni irki’re doorshaho la”annoe; ilamate gobba sufisannoha dhoodhineemmo yite timbiliqqe fultinoti naqaashete.
Qiida qiidaho,arrishsho arrishote,hashsha xi’mote yitukkinni Itophiyu haxo gotti yitanno gede assitu Itophiyu qansooti dhagge habbannokki haruma wortinona daafuronsa dhagge lallabbo; Itophiyu baatto sontonsa yaate gobbaanni mayinanni?!
Xa daafuru barri mitte fooliishsho sa’ino yine wo’mu afiinni coyi”ra dandiinanni. Kayinnilla dooramannohu wiinni daga maa hasidhannoyya? Yinummoro, I P U hedonsa uyitino dooraano:- “mooranna mussinna,baincho looso,hudenna buximate aana gaade doorrummosihu ninke ririwinohu loosa hasiissanno” yitino.
Eewa,ale noohu loosu biddissa dirrisanno. Daga meexanni noohu eeliidi loosu qeechi noosi soqqamaancho ikkinota aliidi gashshooti eeli geeshsha dirre buuxa hasiissannosi.
Ollaaho marre ayimmate kaarde adhate hurudhi yinanni waajjinanni dangoonni. Agarina berra kiisete amande Hoteelete sagale hajaccate anga ganganne,lekka sarraaqi’ne hajaccinanni. Ikkina togoonni qiida ange hudi’ne diramme doodhinoonni mangiste hundaanni owaante afi’rate marranni wote waajjishiishshannori mamiinni fultino mooraanootiyya? Eenni xa doodhinoommo; owante kayinni ragunni afi’ra hasiissannonke.
27 diri giddo sirchonna gosa yinanni mimmito itammanni gede uticho qansoonni. Xa kayinni qansootu doodhitino gobbara hasidhino basera loosi’ratenna lophate qoosso agara hasiissanno.
Ikkireno ikkeenna Itophiyu haxo gotti yitino. Diinu haxo heeshshi! Lasso haadhe hadhara daggino gobbaayidi gobbuwa odeessaano hagiirrenna keere dudubbanni afantanno.
Xa kayinni albankeenni mitturi gatannonke; isino Hiddaasete kofattooti! Abbayi hajo aju akkalu,meyaa labbaahu,buxichu dureessu hajooti. Albankeenni gatinonke dinyi loosi konneeti. Buximanke odeessitannori jireenyanke,umbenke lallabbannori ka’nenke,shollinyenke dudubbannori ayirrinyenke dudubbanna la’nummo!!!
Yaareed Geetaachew
Bakkalcho Ella 17/2013 M.D Hamuse
