Abrahaam Saamueel
Budu ispoorte daninna feestivaale amadose agurtannokki gede assate qansootu dilaalansa fula hasiissannonsata Budunna Ispoortete Ministeere Woshshatto assitino. Sayikki Doycho Sidaamu Qoqqowi Budu ispoorte heewonna feestivaale Sidaamu Dagoomi Qoqqowi Qaru Quchumira Hawaasa hananfoonni.
Budunna Ispoortete Ministeere Deetichi Ambasaadder Mesfiini Cherinetihu, “Itophiyu giddoseenni amadinota duuchimma qoleno biiffannoti baayra budu ispoortenna feestivaale no gobbaati” yiino. Budu ispoortenna feestivaale garunni xiinxallinironna lattinsiro dagoomu xaaadooshshe kaajjishatenna turizimete owaantera hosiisate noose dilaali jawa ikkinota caakkeessino.
Itophiyu nooseta hala`lado budu ispoortenna feestivaale latisatenni dagate xaadooshshira, ispoortete heewora hattono gobbate su`ma gotti assine kaajjishate loonsanni hee`noonni yiino. Ambassadder Mesfiini, “Sidaamu Dagoomi Qoqqowi Mootumma budesinna yannite ispoortete millimillo gobbate ispoortete latishshira umisi haruma worate assanni noo wo`naalshi jawahaho” yiino. Dagoomu, Itophiyaho nooseta haammata jiro hattono budu ispoorte dananna feestivaale budu suudese agadhitino garinni suffanno gede qoleno suudise hakko hee`reennanni yannitte assine latisate looso loosara umisi dilaala fulanno gede Ministeere Deetichu woshshatto assino.
Sidaamu Dagoomi Qoqqowi Mootimma Ispoorete Komishiine Komishiinerichi Firewu Areerihu isi widoonni; heewote hasiishshi albankeenni noo yanna giddo Wodiidi Galchimi Itophiyi Dagoomi Qoqqowira gobbate deerrinni assinanni budu ispoorte heeworanna feestivaalera qoqqowa riqibbanno ispoortete gaamo filate ikkinota xawisino. Komishiinerichu Firew, Qoqqowu, budu ispoortenninna feestivaalenni heewisamanninna beeqqaancho ikkanni budesi egensiisanni qoleno ispoortete handaara kaajjishe horaameessa ikkanni daynota kulino.
Sidaamu Dagoomi qoqqowi Mootumma sayikki doycho yannara budu ispoortenna feestivaale qixxeesse harisanni no. Tini ispeertetenna feestivaalete heewo albankeeni lame lamala geeshsha keeshshitanno. Techonni kaayise 11 barri geeshsha budu ispoortenna feestivaalete heewo qoqqowu budi ispoortete godo`laanoonni iibbite suffanno. Heewotenna feestivaalete aana mittu kumi ali heewisamaano beeqqitanni nooha ikkanna, qale, qollee, sharro, duuqqonna wolootuno budu ispoortete dana bdu ispoorte giddora karsinonnita xawinsoonni
Arfaasa 25, 2015 M.D Hamuse
