Kiirotenni lamala gowwuudde ooso noonsa minaamanna gashshaanni noonka. Ama togo yitanni huuccidhannonka “Magano’ya gowwuudde ooso lamala mayira uyittoe? Eeggatena mitto busule qaaqqo uyie” yitanni xa`nitu. Jeefoteno mitto busule qaaqqo iltu. Qaaqquno lowo geeshsha harancho ikkino daafira su`masi Sinziirro yite woshshitu. Magani-shiima ikkinohura meyaate gede tee yite woshshitannosinka.
Amasino kuni qaaqqi gowwa ikkannokki gede hedatenni busha ayyaana so’risiisate yite qaaqqo “Tee” yite woshsha hanaffu. Ikkollana lowo geeshsha busule ikkinohura roduuwisi dibaxxannosi. Saalsiisannonke yiteno heddanno.
Barrunni mitto barra saada moortara hadhanno. Lalo, me’’e, gereewo moortara hasidhurono didandiitino. “Sinziirro ledonke hee’reemmero maa assa noonkero kulannonkehu baino” yitu. Sinziirrono togo yite coyidhanna macciishshe “Noommo kaa`leemmone” yiinsa. Hakkiinni Sinziirro togo yitusi, “Hasi’ritto widoonni higge hadiro e`e lame dummaadda gorrine intanni bootta haadhe abbi”. Sinziirro “Maahoyyena qarru dino abbeemmo” yii. Hakkiinni Sinziirrono ruukkado xullo widoonni luuxe e’’e hadiru saanqa fane lame bootta abbinsa. Bootta massagganni hadhanna Sinziirrono badheenni hoodensa ha’raanna hedeweelcho boottate annuwi daggu.
Yannano leeshshi yitinohura Sinziirro boottate anna lawatenni huuro gotti asse
togo yii “lamenta bootta afi`noommo, higgino, haa`ne abbinanni hee`noommo”. Tenne macciishshituti bootta agartara fultino annuwi mininsara higgu. Hakkiinni bootta massagganni hadhanni doogo heedheenna wo`mino xashshi mulira iillitu. Gowwuuddu lamalunku roduuwi konne xashsho hiitto ikkite sa’annoro malu bainsa. Sinziirro hee’reemmero sa’neemmo gara leellishshannonkehu baino” yite insa insaneetiwa hasaabbu.
Sinziirrono siiwo haa’re abbi. xashshono daahanni sai gedensaanni mittiido siiwote qacce xashshu gamira noo haqqicho aana usure layinki qacceno wole qacce widoonni noo haqichi aana usuri. Konni garinni waa daaha dandiitannokki roduuwi siiwote aanaanni rarra’e sa’u. Hakkonni gedensaanni mitto booto gorrite maala bebbeeqqitanna Sinziirrono qeechasi uyitasira xa`manno woyte di-uyineemmo yitu. “Ati lowo geeshsha shiimaho! Maalu dihasiisannohe” yitu. Togo yii “Ciigga maala nafa aa hoogginiero ufuuffa uuyye’’e”. Hakkiinni ufuuffa uyitusi. Sinziirrono ufuuffa ufuufe haqqichote aana gidde haxaasinchunni gananno woyte halangete gede macciishshantanno. Togo yaanni raara hanafi “Bootta adhoommohu dianeeti, roduuwa’yaati”. Konne macciishshituri roduuwisi boottate annuwi dagginoha lawinonsahura maala agurte xooqqe ba`u. Sinziirrono baalanka maala harrichote aana hogowe minisira adhe ha`ri. Qaqquulle, ceichote gede shaqqado, galashshu gede busule ikke.
Bakkalcho Ella 10, 2013 M.D
