Wedellichu mittu anniwa mare “Anna’ya reya hasi’reemmo” yii. Geerchuno feeffate ofolle; “Reyo hasi’ra hoogittorono ise atewa dagganno, hasi’ra hoogittoro kayinni atewa daggannokkiri batinye dancha coyibba noona mayira insa dihasi’ratto? Yaannosi. Arrishshote yanna haranchote. Mitto barra nafa diwo’mitanno. Mereerohono gomichunna limixe dibbannose. Ikkollana lemiina shoole saate nafa wo`mannokki arrishshote yannara haammata macciishshamme kalaqantanno. Ikkirono haranchoho. Mannuno uulla heeshshosi giddo lowo coye lairono tenne baatto aana noosi keeshsho kayinni lowo geeshsha shiimatena makkaraara dinosi.
Lamalawunna settawu diri yaa shiima keeshshooti. Maganu laonni kumu diri mittu barri gedeeti yaanno Phexiroosi qullaawu maxaafi giddo. Kumu barri mittu barri gede ikkiro ontu xibbi diri tonaalame saate gedeeti. Lame xibbenna ontawu kayinni lee saate gedeeti. Xibbuunna lemiina ontu diri kayinni sase saate gedeeti. Leyaana lamu diri kayinni mitte saatenna bocu gedeeti yaate.
Konni daafira settawo diro hee`nummoro nafa tenne uulla aana sayinseemmo diri Kaaliiqi kiironni lame saate nafa wo`mannokkiho. Kuni mittu horophili mitte gobba aana nadaaje wonshi’rara fooliishshi`re ka’’ate adhannosi saateeti. Lowo geeshsha haranchoho. Manchi beetti tenne uulla aana sayisanno diri hegerehuu ledo heewisiinsiro mitto barra nafa diwo’manno. Hegerehuu ledo hewisiinsiro keeshshonke allammurchu maala lae buqqi asse kayisa geeshsha noo yanna geeshshitella. konni daafira lowo geeshsha makkaraaranna yaada dihasiissannonke.
Bakkalcho Ella 10, 2013 M.D
