Mittu dureessu anni beettisira buxane hiittoo heeshsho heedhannoro afara yee baatto loosidhe galtanno ollaa massisi. Mittu baatto loosi`re galanno buxichi mineno mitto barra sayisse mininsara higgu. Mininsara higganni doogote aana heedheenna, annu beettosi, mageeshsha buxane ikkitinnotanna buximatenni hiittoo heeshsho heedhanno gede laitto? maa wodanchitto? yee xa`misi. Beettuno lainnohanna wodanchino coye togo yee xawisi “Ninkera mittu woshichi noonke insara kayinni shoolu woshshi noonsa, ninkera huxxaminnohu daankanni wayi noonke insara kayinni xashshuwanna garbuwa noonsa, ninke hashsha hashsha horonsi`neemmo ampoole noonke insara kayinni gordo wo`mitino beeddahe noonsa, ninke sagale dikkotenni hidhine afi`neemmo insa kayinni gatinsanni afidhanno, ninke umonke gargadhate huxxa loosinoommo insara kayinni huxxa ikkikkinni baxillaanonna jaalla noonsa, ninkera insayklopidiya noonke; insara kayinni qulaawu maxaafi noonsa. Ninke mageeshsha buxane ikkinoommo gede leellishootoe daafira galateemmohe” yiino yinanni.
Dureeyye ikkineemmo gede assannonkehu di-gamba assinoommo uduunneeti yitanno sokka kultannonke tini borro. Egennotenni buxane ikkine uduunne calla gamba assi’nummoro duhalla ikkanno. Woxu calla atootaamo di-assanno. Woxunni kalanqeemmo danchu coy ikkinnina. Konni daafira uduunnunni huxxammoommo mannooti wolootu ledo hee`neemmo woyite maa tirfi`noommo? Hee`renanke nafa mageeshsha buxane ikkinoommo? Yitannota hendeemmo gede qaagiissate baxeemma.
Ella 3 , 2013 M.D
