Gashshaanni ayra ha`la noosiro coy raga giwannosi geeshsha minaamasinna amasi giwantanno. Gashshaannise amasira kaa`le aye coyeno coyi`riro minaama lowo yanna hanqite fuugganno. Amano beetu minaamasira kaa`liro godowa bushshe galtanno. Koffi yitanno.
Mitto barra minaama mittu hayyichiwa hadhe gashshaannise ama shaanno xagicho aannose gede xa`mitu. Hayyichuno “Gashshaannikki ama shaate mayira hasi`ritta?” yee xa`mi minaamano, “Gashshaanni`ya ama’aya woyiteno ane ledo gibbo hasidhanno asseemma coy duuchunku isera di coommannose, qoleno assa nooerenna nooekkiire hajajjaera wo`naaltanno, ko garinni sunfummoro
mini`yano ooso`yano diigante ba`anno. Konniraati gashshaanni`ya ama reyitanno gede hasirommahu” yitusi.
Hayyichuno shiima geeshsha hedinohu gede ikke darcho mito haa`re daye konne darcho mittu agani geeshsha shaete ledo karsitanni uyise” yiise. Minaamano “Aganu geeshsha keeshshannoha ikkikkinni rahe shaanno xagicho uyie” yitu.
Hayyichuno “Mittu barrinni shaannoha uummohero gibbo noo`ne daafira mannu ateeti shoottasehu yee huluullamanno. Konne eemmohe xagicho ballokkira aattase woyteno yitannohere baala baxillunni, heeshshi yaatenninna ayirrisatenni qoltanninna assitanni ikkona. Aganu gedensaanni fooliishshi’rattasena yiise.
Minaamano hayyichuwiinni xagicho adhite minisera hadhu. Gashshaannise ama ledo gibbono uurrissu. Yitannosereno assa hanaffu. Gashshaannise amano ise heddanno gede busha ikkitukki dancha ballo ikkituse. Minennisenno keeru e“i. Hakkiinni minaama wirro higge hayyichunniwa marte “Gashshaanni`ya ama lowo geeshsha dancha mancho ikkitinno eeggatena reyitannokki gede assanno xagicho uyie” yitusi. Hayyichuno “Qarri`ne baxilleho. Oommohe xagichi digawajjannoho” yiise. Minaamano hayyichu hayyonni maala`lite minisera higgu. Gashshaannise ama ledono keeraanchimmatenni, baxillunni hee`ra hanaffu.
Guulcho hedo:- Winxoommohalla mixxineemmo! Danchumma wixinohu danchumma mixxanno!
Abebech Maatewoos
Ella 3 , 2013 M.D
