Itophiyu gargarooshshu olanto dagate ooso ikkansanni duuchanka woyte dagatenna gobboomitte sokko amadde millissanno. Gobbate ayirrinye agarsiisatenna qansootu keerenna hobbaate buuxisiisate kakkalantanno. Dubboho galtanni mundeensa duntanno; miqichonsa hiiqqitanno.
Gargarooshshu olanto albaannino, xaano albirano gobbate ayirrinyenna dagate hobbaateeti. Itophiyu gargarooshshu olanto bareendenni duuchunku mittimmaternni sumuu yaannoha; keeru yannara latishshu loosaasine; hedeweelcho ikkitubba kalaqantanno woyteno bareendetenni sharrantannoreeti. Olantonke koshose kinsoonni diishsho gede mittimmatenni gargartannore; doobbiichu gede qooxeessansa meexisiissannokkire ikkansano sumuu yitannori loworeeti. Olanto qeelle adhitannore; reyo qeeltannore; hedeweelcho ikkitubbara angansa uytannokkire; hasattonsa illachansa calla ikkitinori; wolambinatu waagi mageeshshaatiro seekkite affinorenna tunsicho qeelte xawaabba fula dandiitanno wodanaammaati.
Aliyye hajajo 20 dirrara dubbohonna yeedalate balera galtanni Tigirayete daga agartino. Woxunnino 33 miliyoone ale birra fushshatenni 1km ale doogo loossino; 65 rosu minna 4 miliyone ale ikkanno woxe fushshatenni wedellu gangalattanno mereershubba loossino. Loosidhe galtinori gate 23 kumi ale hekitaare baatto aana winxoonniha shuqunatenninna laalcho gamba assatenni halammensa leellishshino. Ikkollana, kuri bareedda olantora agarinonsahu baraarsha ikkikkinni kakkachuullu barsheeti. Baraarshu hasiisannonsa bareeddara barshe iillishshu HWHT gaamo assooti Itophiyu daga wodani giddonni mamooteno diba’’anno.
Cancishaanchu HWHT massagaano Birra 24/2013M.D Aliyye hajajo aana hedeweelcho yannara goxxinowa heedheenna badhensaanni heedhe qasatenni dhagge gatona yitannokki barshe assitino. Cancishaanchu HWHT gaamo gobbannita jawa gargarooshshu wolqa amaddinota Aliyye hajajo aana hedeweelcho barshe iillishate assooti hendenna seeda yannara mixi’ne assinoonniha ikkanna kunino hajajo amaddinoha jawa olu uduunne angara adhite gobba qasate hasattonsara hosiisi’rate illachishinohonkanni.
Ikkeennano, bareedda gargarooshshu olanto dagatenni ledo qinaabbe cancishaancho HWHRT gaamo aana jawa qaafo adhatenni gobba diigate hasattonsa diiggino. Cancishaano sase doyichora fantino olira rabbisatenni Itophiyu ayirrinye agarsiisa dandiitino.
Olantonke sa’u lame dirrara cancishaano gaamo duuchu ragaanni fantino ola sharrantanni jawa waaga baattino. Olu xawubbara bareendetenni qasantanni ama gobbansara kakkalantino. Gobbatenna dagate noonsa halamme hasaawunni ikkikkinni loosunni leellishshino.
Xaano ikkeenna gobba diinunni gargarate dubbohonna boonna bobbooddate ubbanni ka’anni afantanno. Konninni, gargarooshshu olanto baattino kakkalonni Tigirayete daga kadotenna borojjimmatenni wolaphitara iillitino yannara hee’noommo.
Bareedda gargarooshshu oalnto baattanni noo waaginni sa’u ontawo dirrara cancishanchu HWHT kadote gashshooti hundaanni shettote giddo keeshshitinoti Tigirayete daga wolambinatu xawaabba la’ara shiima yanna calla gattino. Ikkinohura, techo barrinni ‘’Mamooteno Dihambeemmo’’ yaanno massagote qaalinni Birra agana 24/2013M.D Aliyye hajajo aana Cancishaanchu HWHT gaamo iillishshino barshe laynki diro qaaggote barra ayirrinseemmo woyte gargarooshshu olanto baattino kakkalamooshshira afanshanna ayirrinye aatenninna iillinshoonni ganonna barshe gobba diigate sokkonna mixo biso ikkasi qaagatenni ikka noosi.
Bakkalcho Birra 24, 2015 M.D
