Korkaata hasidhanni geexaanote aana duhano leddanno. Woxe gamba assi’ra ikkinniina buxichu hiikkiinni abbanno? yite duumbaranna badhera qolte dihuwattanno. Daddalaano noohu geexaano noo daafiraati.
Bashshoo waro woraqatu birri woy womaashshu nookki yannara gide uyine hinqaato adhinanni;hinqaato woy qaamatto uyine gide soorri’nanni. Hakku gateenna woxunni hidhinanninna hirranni yannaasincho hayyo daggu woyite manchi beetti woxe baxannoha ikki.
Daddalaano loosidhe galtinori woxe hoogganno yanna agarte gate noore bunano ikko babbaxxino jajja uurre hee’reennanni hidhite iillanno woyte ataachidhannore ikkitu. Arru goofeenne hawadu daanno woyte wirro insawiinni erote eronni hidhitanno busullete hayyo kalaqqanna buxichu lede buxanni dayi.
Gide mittu dureessi buxanetewiinni shochu waaginni gamba assi’re gidu iibbanno gede huuccatto assi’ranno diro ikki. Gide mine maaxe daga hudidhanna waagu lexxanno gede yanna agaranno. Sassaqama daddalaano jajja mine maaxatenni olliinsara hudi’rinoha abbaa kana yitukkiinni insa ooso ittanna buxichu ooso afidhuro moola xoxxoo ittanni yanna fultara agartanno;mararro ba’ino dirootina kaaliiqi baattonke hurso yaate gobbaanni mayyiinanni!
Bero hidhinoonni uduunne techo marre xa’miniro erote ero lexxinoha afa Itophiyu dagara haarore ikka agurtunkunni yanna seeddino. Tini daga cacceessitinotanna poletiku hembeelammera tuggannoti miinju gano huwachishshinohu IFDR xaphoomu ministirichi Abiy Ahimed (DR) “Miinju gano,Mooranna Laalcho Maaxa hunate baalinke sharro hasiissanno” yaanni xawisino. Ee;mootimma calla togoo gano taashshate didandiitanno. Miinju aana gano gantannori,mooraanonna laalcho maaxxannori heeshshote sutamaranna muxximmara xa’mamaano ikka noonsa. Mootimmano illacha tuga hasiissannohu konne sharramate ikka noosi.
Xaphoomu ministirichi dagittete qoolisira sayisino sokkanni;jireenyu widoogge assinanni gugguunfe subbinota ikkitanno gede qarunni giddoyidi dhukinke aana kaima assi’nummorooti. Togo yaano giddonke dhuki daganke ikkinota buuxisateeti. Lophonke waawanchu angankera no. gobbanke kalaqamunna dhaggete jiro hattono haaroo ilama kalaqate egennooti
Qarrissanno jifo giddo hee’nenna nafa qarra dandaanno miinji hee’rankera dandiino. Konnira qaru korkaati bikkadono ikkiro noonkeha giddooyidi dhukanke mucuqqi assine horoonsi’rate ka’’ankeeti. Hiittenne dagannino assinanninke irko giddoyidinke dhuki aana ledonniha ikkinniina qara lophote bue dikkannonke.
Giddoyidi dhukanke horoonsi’ne jireenyu widira assineemmo harinsho guffatenni co’o yitinota dikkitino. Miinju gano,moorunna laalcho maaxa qara qara jifo ikkitino. Gobbara soya hasiissanno laalcho maaxa,seerimale gobbayidi woxu soorro doyichonna baatto ganotenni horra murci’ne rakkino qaafo adhinara hasiissanno lophote guffaati.
Dr. Abiyi yaatto garinni ikkiro aantete babbaxxitino jifo sa’’a dandaanno miinja gatamarate dandiineemmo gede lamu dani sharro hasiissanno;hunanna latisa.
Suta Shottannonsanna Daga Caacceessitanno Daddalaanora Bixaala Qixxeessa Hasiissanno! Konnira kayinni miinju gano gantannore,moorahonna laalcho maaxate bobbakkinore hunate baalinke sharrama hasiissanno.
Soorrote gashshooti su’ma hunate sa’u 27 dirra giddo surkinoonni miinju gano harunsitanno honqooqootu daddalaano,gide ataachi’ra ikkinniina beeha egentinokkiri,dikkote waagi sutamanno gede gide maaxxe huuccatto assitanno bissa eemarama hasiissannonsa. Konne assate kayinni daga mootimmate qote uurranna mootimmano togoo honqooqooti aana qaafo adhite leellisha hasiissanno.
Xa waagu lexxanna ikkinniina dirranna la’ne diegenninoommo. Noowano uurranno woy dirranno gede mootimmate kaajjadu mini loosinna dagate irko hasiissanno. Xa gobbankera poletiku hembeelamme ikko miinju qarra tirate olammannihu daddalu giddo noo gano diigatenniiti. Hudenna baashe kortanno bissa eemaranto. Mootimmano togoo bissa aana qaafo adhite bixaala qixxeessito!!
Birra 17, 2015 M.D Hamuse
