Itophiyu giddonna gobba diinna mittoo’mitenna halante duucha ragaanni ola fantino tenne qarraataame yannara;Wocawaaro agani hanqafe dayino atootinni budunna amma’note ayyaanna xawohonna mine mine keerunni ayirrisse gumultu. Itophiyu daga konni garinni mittoo’mite mittimmate ayyaanna gudumaaleho xabbenna wora’a yite ayirrisa dandiitanno yaatenni addaxxatenni hasaawannohu hee’riro miteekke hakku Itophiyu jawimma,Itophiyu daga ayimmanna gottinye huwatinonna dagasi baxanno qansichaati. Korkaatuno Itophiyu Olu xawira qawwe goshooshshe olantannoserinni hanaffe dagitte,miinjunna polotiku hattono Dippiloomaasenna kaphu duduwi aana safantino jaddonni diinnasenni ka’ino fannoonni urdenni kuttumbe amandoonnise yannara;Wocawaaru aganira nooti bacanna kiirotenni kullannikki daga xawo flute ayirrissanno ayyaanna keerunni ayirritannokki gede diinnatenni mixi’noonni cancishate gano hee’ransaati.
Masqalu ayyaananna Irreecha duuchunkunni roorino garinni cancunna gaancete xawo assate kuri gobbatenna dagate diinna luphi yitino mixonna qixxaawo noonsa. Konnira kayinni mito woyte amma’no,wole woyte gosanna sircho qa’matenni huluullisatenna lawisiisatenni hunote loosonsa konneno ko’ono itiichitanni keeshshansa naqaashete. Faarso togo yitanno,
“diinu hedinoti lowote; Maganuyiti kayinni Roorete” insa hedo gede ikkoommero masqalu xawi mundeenniha;Irreechu ayyaani gaancennihonkanni. Kayinnilla kaaliqiti roorteennanna Itophiyu daga diinu hedo irraawisate Afoonsa mitto,foolensa shitto assidheenna ayyaanna baala keerunni ayirriti;diinuno saali. Mittimma jawaantete;mittimma gobbate tuuqooti. Ee;mittimmatenni Wocawaaru agani budunna amma’note ayyaanna keerunni gumulantu.
Aliyyenni Wodiidi geeshsha,Soojjaatinni Galchimi geeshsha duuchunku qooxeessira ayirrinsoonni Wocawaaru agani ayyaanna kilansa giddo hanqaffe amaddino Itophiyu daganna dagoomi ayyaanna;mamootinnino roore mittimmatenni,rodiimmatenninna duuchunku aneho yitanno hedonni mittimmatenni xawo fultenna biiffe sayissinoha ikke sai. Lawishshaho,Yaahode Hadiyyanniha,Yoo Masqala Gaamonniha,Gifaata Wolayittannihanna wolootta ayyaanna konni albaanni diinnate gano dagoomu mereero kalaqaminoha huluullamatenna koma amada diiginoha;rodiimmatenni daga baxillunninna gatona yaatenni mittimmatenni uurrite diinu gano diiga dandiitinoha ikke sai. Sidaamu Wolayittatenni ledo,Wolayitta Gaamotenni ledo,Gaamo Hadiyyatenni ledo;… duuchunku budisinna wogasi garinni mittu wolunniha iibbadu garinninna aneho yaatenni addaxxitannore ikkite leeltino aganaati kuni wocawaaru agani.
Masqalu ayyaanira baxxinohunni Damaru hawarro la’noonnihu konne halaale ikkanna, Masqalu ayyaani mitte amma’no woyi dagaha ikkikkinni wo’mante Itophiyu daga dona, kalqete jiro ikkinota wole yannanni aleenni baxillaanono diinuno huwattanno gede assite mitteenni ayirrisse sa’ino. Irreechu ayyaanano hattonni Hora Finfinneno ikko Hora Harsede Itophiyu daga ragu ragunkunni gamba yite badooshshu mereero noonke biinfille, mittimmate giddo noonke jawaantenna qeelaanchimma leellishshinore ikkitino.
Tenne ayyaannanni roorenkanni mittimmatenni gotti yine hosatenna ayirrisamate loosi kayinni Itophiyu daganna dagoomi mittu wolu ledo ikkatenni woloottu budenna balchoomi daafira egenno afidhanno gede dandiisannonsahonna Itophiya konni aleenni gotti assitannoseha ikkanna Itophiyu dagano roore mittimmansa egennamate aana safantinota ikkitanno gede assitannore ikkinnina xeissannore ikkitinokkita xawisse leellishshannoreeti.
Kuri batidhinori Wocawaaro agani ayyaanna Itophiyu gashshootise mittimma xiiwisiissukkinni dirrate mereero ayirrinsenni keeshshiishshannoseta worba daga afidhino gobba ikkasenni aleenni mageeshshi geeshsha jawanna jawimmase leellishshannore budillaancho, miinju, poletikunna kalaqamu egenno nooseta leellishshinore ikkite sa’ino.
Itophiyu dagano ikkituro diinu duduwiranna sharrera bayicho uytannokkire, yannate geeshshi qarri gufisannonsakkire, diinu bati’rannonsa woyte roorenkanni gamba yitannore, sharre batidhannonsa woyte roorenkanni mitteenni ikkite diinunniha sharrete looso gumiweelsitannore, mittimmansanna keerensa hunannoha horontanni hasidhannokkire ikkansa buuxisiissino.
Togo assansanni Itophiyu daga ayirrinyinsa bikkinni, adawu wolqano loosinsa bikkinni galatama hasiissannonsa!!
Bakkalcho Wocawaaro 26, 2015 M.D
