Mitto barra mitte mancho yowoletennni hadhanni heedheenna danbalu daye yowolose hiiqqaqqe hunise. Konni gedensaanni, manchono, danbalu xiiweenna mitte giddicho widira lubbotenni fultanno. Manchono, kaa`lannoseha afidha geeshsha, giddichote aana shiima hayissote mine fengo mi`nite shiima yannara hakkiicho keeshshitu. Hakko heedhe qulxu`me amadde ita hanaffu.
Mitto barra, qulxu`me amaddara garbu widira hadhanni heedhenna mitturichi hedeweelcho buqqeese giddo qummi yaannose. Hakkuno, minise giddo qulxu`me du’rishate giirtino giira minese giirtanna buqqeesse giddo dayse. Lowota massu; kaajjadu garinni minese gatissara wo`naaltuna minise kayinni hayissote mine ikkino daafira giirame buluulo ikki.
Manchono, lowota yaadde, illese iimira qolte, ‘’Magano, shiima yowolo`ya danbalunni hiiqqaqqite gudde tenne shiima giddichora calla`ya tugitoe; masseemma hige yee sammi yuumma. Xaano, lowo shettonni reyootenni gatissannoe yee loosi`roommata fengo`ya buluulo assitto. Halaale yeemmahe, lowota masoomma; atenni hexxo assi`ra mudhoomma. Ati hada togohoni yite hururante wi`litu. Konni ka`a ikkootoe’’ yite Maganu widira giirante coydhu.
Boode yanna gedensaanni, qooxessisera illese dancha hexxo aanno coye la`u. Mitte yowolo ise widira dagganna huwattu. Yowolo isewa iillitu gedensaanni, giddichotewiinni haadhe alba heedhanno olliisera minisewa massituse. Hakonni gedensanni, giddose mittu coyi millisanna qarrante mitte xa`mo xa`mitu; “Yowolete Oofaancho, hiittoo xaadooshsheeti kuni? Ani noomma base geeshsha giddichonniwa daggine ane gatisa dandiitinihu?” yite xa`mitu.
Yowolote Oofaanchi, kuni hedeweelchu xaadooshshe di-ikkino; ati nootta giddichono ninke doogo di-ikkitino. Ikkollana, xeertote hee`ne la`nummo woyte giddichote aana wiliile wiliiltanna la`nummo. Hakkonni gedensaanni ikkinno manni kaa`lo hasi`re wiliishshanni noona yine daa dandiinummo yee qolise.
Tenne yannara ise hindiiddo kaadete gede giggishidhu; ‘’Magano ati manchu beetti buqqee aleenni ikkoottohu, Kaaliiqa`ya, hada shiima mine`ya giiroottohu jawu mi“ni`yara iillishattoera hasidheeti’’ yite baalunku coyi danchummateeti yaatenni Maganose gatona yiie yite huucidhu.
Konnira, hanni mitte higgine huwatte; tini mancho yowolose hiiqqaqqe gudino danbalinni Maganu lubbotenni gatise hee`reenanni galatami di-yitino. Sufeno “Magano`ya, fengo`ya giiritto” yite magano lowota coydhanna la`noomo. Ise magano hanqisse ka`uta Manchu gede hedannoyikki Kaaliiqi alba coydhinore koma asse amaddikkinni balaxe iillise; qarriseeno fushshise. Mite yannara qarru iillannonke woyte Maganono mannano iillinammora dandineemmo. Qarru badheenni kayinni danchu coyi noota afa hasiissannonke.
Bakkalcho Onkoleessa 26/ 2013
