– Amaarunna Affaarete qoqqowubbara 3 kume 598 keeraano qansoota shitino
Cancishaanchu HWHT amma`note minna olu goda asse diigatenni honote loososi gumule daga giwannota faajjete leellishino.
Cancishaanchu HWHT gargarooshshu olanto aana jaddo iillishi gedensaanni, cancishate loososi kaajjishe Amaarahonna Affaarete qoqqowubbara ola fane keeraano daga aana mannihimmate qoossonna jajju aana gawajjo iillishinoti qaangannite.
Dagate aana ola fante hunote gamba yitinnoti Cancishaanchu gaamo, illituwa baala dagate jajja moortanninna huntanni hattono giirtanni amma`notenna dhaggete minna goda assidhe diigge giwisanno looso loosse dagate noosi kakkachimma xawoho leellishino.
Cancishaancho gaamo masgiidaho agatto adhite e`e agatenninna dimbatenni kaaliiqi mine hasiissannokkiricho saalu coyee loosatenni bunshensa deerranna dagate diina ikkitinota xawisno.
Qullaawa Quraananna Maxaafa daddare giiratenni hattono hunatenni dhaggetenninna ayyaanaame heeshshonni gatona yinannikki barshe loosino.
Cancishaancho gaamo miilla Soojjaati Amaari Debire Siinu quchumira Qiddisti Maaryaami amma`note minenna Mezezo Qiduusi Gebirieeli amma`note minna giddo goda loosse ishinshite loossinohu bainchu loosi lawishshaho kullanniho.
Amma`note mini qullaawa uduunne moortenna amma`note mini massagaanchonna kaahinaateno gantenna utteessite amma`note minira uynoonni woxe horritino.
Tigirayete Qoqqowirano amma`note minna xiiyyitenna ola fante diigge olu kaampe assite saalsiisanno looso loossino.
Konneno leellishannohu, Tigirayete Qoqqowira Wuqiro quchumira 11km xeertinyi aana afamanno Alinejaashshi dhaggetenna ayyaanaamu masgiidi mule goda woy olu base unte donna diiggino.
Alinejaashshi qooxeessi’ra muli baycho afamannoha Amaanueel amma`note mine kaajjadu olu uduunninni gante diiggino.
Amaaru Aoqqowira shoolki sanira ijaaroonniha Cecceho Medaanialem amma`note mine jawu olu uduunninni gante diiggino.
Cancishaanchu HWHT gaamo akati xintantunkunni kaayisse daganna dhagge gibbanore ikkitinota xaano leellishshanni suffanni afantanno.
Konninni calla diqiiddino; Amaarunna Affaarete qoqqowubbara seeru gobbaanni 3 kume 598 keeraano qansooti lubbo huna lede olu jaddonni xa’misiissannota babbaxxitino mannoomittete qoosso xiiwo iillishansa kulloonni.
Itophiyu mannihimmate qoosso komishiinenna halantino mangistuwa uurrinsha mannihimmate qoosso jawiidi komishinete borro mini, gutu buuxo guma harunse Itophiyu mootimmanni uurrinsoonni ministirootu wolqa buuxotenna kissete komite iillitinota mannoomittete qoosso xiiwo filtanni keeshshitinota egensiissino.
Uurrinsoonni wolqa buuxotenna kissete komite Affaaretenna Amaaru qoqqowubbara afantannore honse qooxeessubbara iillitino gano buuxote guma umi fooliishsho rippoorte hedo fushshitino.
Kunninnino Woldiyaho, Laalibelaho, Seqoxaho, Jama, Woreilu, Desenna Kombolchu qooxeessubbara hattono Aliyye Shewa Zoonera, Oromo Biheraawe Zooneranna Affaarete qoqqowira faranjootunni Wocawaaro 15-Arfaasa 30 2021 geeshsha iillitinota mannoomittete qoosso buuxxino.
Buuxotenna kissete komite assitino filonni kalqoomu mannoomittete seera xiibbannota olu jaddonni xa’misiissannota batinye huno cancishaano HWHTna Shene iillishansa buuxxinota xawissino.
Kunninnino cancishaano HWHTna Shene seeru gobbaanni 3 kume 598 mannoota shitino, 1 kume 315 qansooti aana bisu xe’ne iillishshinno, 2 kume 212 meento gadachishshe siyattino; hattono 452 mannooti mannoomittete ayirrinyinsa kisamino yaatenni rippoorte xawissanno.
Tini shigiggissannoti mannihimmate qoosso xiiwo cancishaano HWHTna Shenenni iillitinota ikkase buunxoonni.
Seeru gobbaanni iillinshoonnita lubbo shaa lainohunni rippoorte xawissino garinni, Woldiyahonna qooxeessaho calla 1 kumi 181 mannooti cancishaano HWHTni lubbonsa hoogginore ikkansa xawinsoonni.
Aliyye Shewanna Oromote daga Zoonnara cancishaano HWHTna Shene iillishshino ganonni Aliyye Shewa Zoonera 257 mannooti hattono Oromote daga zoonera 162 daga lubbonsa hooggino. Affaarete qoqqowira luphiima gano iillishshinori cancishaano HWHT 263 daga lubbo huntinota rippoorte kultanno yite Itophiyu Odoote Owaante odeessitinno.
Amadaminohunni Aliyye gobbate kifilera Tigrayete, Amaarunna Affaarete qoqqowubbara kalaqantino gaancenni ; manoomittete qoosso xiiwo ledo amadaminohunni iillitino jaddo filate, gawajjantino daga agaratenna irkisate widoonni noo loossa qineessate uurrinsoonnitinna Farcote ministirshi dokter Gedeon Ximorewosihu gambisaanchinni massagantannoti ministirootu gaamo wolqa tenne lamala giddo Shoolki doyicho gambooshshe assitinno.
Gaancete yannara Affaaretenna Amaaru qoqqowubbara mannoomittete qoosso xiiwonna koo-tee ledo amadaminohunni iillitino jaddo lainohunni harinsanni keeshshinoonni buuxo roore anga jeefantinotanna kissete giddora e’’ate qixxaambanni hee’noonnita uurrinsoonni wolqa borro mini sooreessi dokter Taaddese Kaasihu xawisino.
Gaamo buuxote yannara addi addi taje milli yitanno misilenna dokmentetenni amaddinota xawinsoonni. Olu yannara haammata keeraano qansooti aana seerimale iillitino lubbote ba’’ara, bisu xe’neranna addi addi diru deerri giddo noo meenti aana iillitino gadachine siyatate gano hattono gadachinshe maaxate jaddo iillitinota rippoortete aana xawinsoonniha ikkanna jajju aana iillitino gawajjo buuxote gumi aana amandoonnita kulloonni.
Uurrinsoonni wolqa halantino mangistuwa mannihimmate qoosso jawiidi komishiinenna Itophiyu mannimmate qoosso komishiine waaxote buuxo gaamo; reekkote farco doorsha la’’anna gumula hasiissannota uytino hedo garinni; reekkote farco Poolise kaimu hedo taje qixxeessine Sayikki uurrinshu gambooshshi aana hasaawa assinoonnita kayise; harinsoonni gambooshshino poolisete e’’o ikkitanno hedo aana hasaawa assatenni e’’o gamba assate ikkinota egensiisino.
Abrahaam Saamueelihunna Qiddist Gezzaheny
Bakkalcho Wocawaaro 12, 2015 M.D
