Mitte yannara, mitte baadiyyete qooxeessira leellanno kinnaammu ilaalira mittu saadate woy ge’reewu allaalaanchi saadasi bobbaassi`re seekke agadhanno. Umosi hagiirsiisa hasi’re hattono osolo baxanno daafo oso`lara yee mitturi noyikki basera, Moyichu, moyichu dayi, ge’reewo`ya itara shorri’’ yee raare olluu manni fulanno gede assanno.
Olluu mannino halaale laweennansa allalaancho kaa`late, ge’reewo moyichu afiinni tugisiisate doddanni isi widira daggu. Ikkollana mitturino dino. Ge’reewu allaalaanchi manna mitturino noyikki basera raare woshsheenna giirantino albansa lae qecci yee oso`lanno. Insano “Moyichu noyikki basera moyichu dayi yitanni raartooti, wi`litooti” yite hanqitinori qaensa widira higgu. Shiima yanna gedensaanni “Xaano moyichu, moyichu dayi” yaanni raari. Olluu daga wirro doginsa. Mannootuno, beetto qorophisiisse, hanqite xaano wirro qaensara higgu.
Boode yanna gedenaanni, allaalaanchu widira addanka moyichu daanna la”anno. Huurosi gotti asse “Moyichu, moyichu ge’reewo shorre itaraati, kaa`le”e” yaanni raari. Ikkollana, tenne yannara kaa`lara dandaanno manni mittuno di-shiqino. Hashshi yannara, olluu manni allaalaanchu qae hige ge’reewo haa`re daynoikki daafira ‘Ma ikkeeti?’ yite yaaddu. Allaalaanchu ge’reewo bobbaase hosiisino basera ilaala fultu. Hattenne basera iillitu yannara allalaanchu ilaalu birxichira ofolle wi`lanni hindiiddo fii`ranni no. “Moichu ge’reewo itara shorranni noona kaa`le”e yee raaranna mayra daa gibbinoonni? Xa ge’reewu billaallino” yee lede wi`lanno.
Mittu olluu geerchi, “Mannu kaphaano di-ammananno. Halaale coydheennano nafa di-ammananno. Gereewo ga`a soodo guurate fulle hanseemmona, xa gotti yii minira ha`nona” yiisi. Tenne borroti qara amado, kaphu halaale maaxanno; ayino kaphaano di-ammananno; halaale coyidhanno yannara nafa ammanannonsahu dino. Konnira haariimoteno ikko kaphinummoyikkinni qarrammummo yannara kaa`laancho hoongeemmoki gede umonke seekkine agarro. Keerunni keeshshe.
Bakkalcho Onkoleessa 26/ 2013
