Bi’re waro manchi beetti bisu macciishamme baala ganba yite daa”atote mitte giddichote basera hadhu. Akatinsa garinni baalunku dancha yanna sayissanni keeshshitu. Hedeweelcho kayinni lowo danballi kae hagiirrensa booreessinsa. Rahotenni giddichotewiinni fula hasiissannonsata lallawu kuli. Mittu mittunku loosonsa uurrisse yowolonsa widira rakke doda hanaffu.
Baalanti bisu macciishamme umonsa gatissara lekka’ya fushshie yite doddu yannara, baxillu kayinni rahe maaxamara di-hasi’rino. Lowohu loosannohu loosu noosi daafira giddichote giddo kawa ka’a, kabbi facci yaanna hashshi. Aganu eanna lae, baxillu giddichotenni fula hasiissannosita huwati; kayinnilla baalanti yowolo wole bisu macciishshamme hogobbe hadhino. Hexxotenni gaangawasi seekke lai mittuno gatisannosihu dino. Hedeweelcho, Jiro, biiffanno yowolonni giddicho taysse sa’anna lai; “Jiro, eeggatena yowolokkinni haarie” yee raari. Jiro kayinni togo yite dawartu “Didandeemma, yowoloya culkunna camotenni (በወርቅና በብር) wo`mitino atera ikkitanno base dinoe” yitu.
Shiima geeshsha keeshshite, Naaxxa, biifanno yowolonni tayse sa”anna lai, baxillu woshshesi ”Naaxxa eeggatena, tenne giddichora ani calla’yaati, kawiichinni fushshannoeha hasi`reemmo; yowolokki aana hogowie” yee huucci’ri. Naaxxa kayinni togo yitu “Didandeemma, koattekki sabbi yowolo`ya xursiisannoe” yite huntesi hadhu.
Qoleno Yaaddo yowoletenni sa”ana, xaano Baxxillu woshshi; “Yaaddo eeggatena, maganyetena yowolokkinni haarie” yiise. Yaaddono togo yitu ‘’Techora sao xa`mi’reemma daddillu aana noommana callimma hasi’reemma” yite haadhusikkinni hunte hadhui. Hakkiinni suffe, Hagiirru giddicho taysse sa’’ara dayi; Baxillu xaano kaa`lote woshshi`ri. Hagiirru kayinni danna sae hagiidhanni noo daafira Baxille laikkinni sae ha`ri.
Baxilleho coy baalu gurcho ikkisi; kaa`lannosihu noyikki daafira lowota qarrami. Hedeweelcho hiikkinni dayro anfikkinni mitte huuro su`ma woshshitanno “Baxille amo; ani yowolo`yanni haa`rehe ha’reemmona” yii. Yowolo uurrise Baxille hogowi. Yowolote giddora e’’anno woyte Egenno ofolte heedheenna lai. Baxillu lainore ammana hooganni “Egenno, lowo gede yaade noommoha shooshanqesinni tenne yowolo uurrise yaaddotenni fushshe haa`riehu isi ayeeti’’ yee xa`mise.
Egennono qolte “Eewanni, yowolo uurrise haadhuheti Yannate” yiisi. Baxilluno “Yanna togoonni shooshaqa mayra ikkitue anera” yee wirro xa`mi. korkaatuno, Baxxillu waaga affinoti Egenno callate. Baxillu Hagiirrena Keere abbannota affinoti Yannate” yite dawartu. Yaaddote yannara Baxille xoonqeemmo, Hagiirru yannara illete nafa di-la`neemmo, Jiro heedhunkero Baxilleho base ruukkitanno, meessaneetenke bikkunni aleenni banxummoro Baxilleho heeshshi yaa ginbeemmo. Baxillu huucci`ranni barru baala waalchi`nera raataawa di-batidhino? Baxille haadhe hadhanno yowolo ba”a noose?
Qulaawu maxaafino togo yaanno. “Baxillu, hexxonna amma`na sasunku kaajje hee`ranno” yaanno. Konni sasunkurichi giddo roorannohu Baxilleho. Sidaami giddo sirbunni macca fulinohu Adunyi Duumohuno “Baxille roori yoommo” yee sirbino. Wolootuno baxillu daafira baca yannara sirbitino.
Gobbate Xaphoomu Ministirichino tenne yannara goboomu deerrinni ka`anno gaancera, togo yaanni leellanno; ‘’Gibbo agurro; baxille roorsino; Baxlilu, huninoha gatona yaanno” yaanni gosa gosanniwa ka`anno gaancera daga araarantanno gede kulanno. Konnira baxilleho yanna uyno. Minenke baxillu hee`riro baaluri wo`me hee`rannonna. Rooru baxillehona baxille calla roori yino.
Abrahaam Saamueel
Bakkalcho Onkoleessa 26/ 2013
