Abrahaam Saamueel
Soojjatinna Mereerimu Afiriki kilawete shaampiyoonira beeqqaano ikkitanni afantannoti Itophiyu Daddalu Baanke Seennu lekkate kowaase kilawe, layinki gaamote godo`le Birundi Foofillu Piieefi ledo assitannota qeellete guddanno yine agarranni. Jawaata kilawe mereero mitto ikkitinori Itophiyu Daddalu Baanke Seennu gaamo qelleetenni suffannota ammanoonni.
Afiriku Lekkate Kowaase Konfidireeshiine (Kaafi), sai dirinni kaayisse hanaffinoti tini godo`le, tayxe layinki dirono harinsanni hee`noonni. Itophiyu Daddalu Baanke seennu gaamo Birundi Foofiilla Piieefi gaamo ledo godo`litanno. Gaamonniti wole godo`le, Ruwaandu AAS Kiigaali Gaamonna Zaanzibaareeti Wariyersi Kuwinsi kilawe mereero harinsanni.
Itophiyu Dadalu Baanke kilawe niro Keeniyu qixxeessino shaampiyoonera boowe kaaysate gamba yite layinkiha ikkite jeefissinoti qaangannite. Ikkollana, Daddalu Baanke konne diro qasiisote gobbuwa ledo noo heewo qeelte Afiriku widira eate qixxaabbe heewote giddora e`ino. Konninni, 6 gobbate giddo godo`laano hidhite malaatisiisino. Kilawe Woxawaajje 7-22 geeshsha harinsanni heewora gumaamo ikkate Arayat Odongita, Nibo Nyi Yenita, Qidisti Zalaqqita, Mesay Temesgenita, Birqe Amaaretanna Naardoosi Geetinnetita malaatisiisino. Qasiisote gobbuwara Jawaata Seennu Lekkate Kowaase nookkitera Daddalu Baanke noonsa gade horoonsidhe tenne heewo qeeltanno yine hendanni.
Tayxe diro layinki doychonni harinsanni hee`noonnihu Soojjatinna Mereerimu Afiriki kilawete shaampiyoone Taanzaaniyu Quchumi Arushaho qixxeessineenna barrubba kiirantino. Heewote aana sette gaamo beeqqaano ikkitino. Lame gaamonni beenkeenna boowe kaaysate kaajjado heewo assitanni noo. Konni kaminni, umi gaamo Itophiyu Daddalu Baanke Seennu Lekate kowaase kilawe, Zaanzibaari Wariyersi Kuwinsiti, Birundi Foofila Piieesinna Ruwaandu AAS Kigaali, mitte gaamora gaammoonni. Wole widoonni, qixxeessitino gobba Taanzaaniyu kilawe Simba Kuwinsi, Jibuuti Gaardee Ripoobiliike, Yugaandu Sii Korporetinna Wodiidi Afiriki Yee Joyinti Istaare afantanno.
Gaamote godo`le lamalate hanaffe xaa geeshsha hadhanni no. 2014 M.Diro Itophiyu seennu Pirimeere Liige qeele boowe adhinohu Itophiyu Daddalu Baanke kilawe, haammata eo eesse heewo qeelletenni sufino. Umi yannara Zaanzibaari Wariyersi Kuwinsi ledo godo`linohu Itophiyu Daddalu Baanke Seennu Lekkate kowaase 9:0 qeeltino. Godo`lete aana lame godo`laano haatiriike loossino. Ambellite Rooza 5 eo, Mediina Awwoliti 4 eo eessitino. Kunino, heewisamaano hanafotenni kaayse luphiima eo eessitinore ikkansa a nfoonni.
Shaampiyoonete aana, Itophiyu Daddalu Baanke Seennu Lekkate Kowaase gaamo agurranna leme meyaa beetto kalqete Lekkate Kowaasera yooaancho ikke riqiwe no. Insano Kaafi woshshatoonni mitte qara Yooaancho ikkite godo`le massaggannoti Tsehayneshi Abbebete. Woleno, Kaa`laancho yooaancho ikkite doorantinoti Woynisheti Aberrite.
Itophiyu Daddalu Baanke Seennu Lekkate Kowaase gaamo, Keeniyaho qixxaabbino umi Soojjatinna Mereerimu Afiriki kilawete Shaampoyonera layinki deerra amadde guddino. Keeniyu Veegi Kuwinse boowe adhitino. Shaampiyoonete aana Itophiyunniti Looza Aberriti, 13 eo eessite su`misenni borreesiisse albisaancho ikkitinoti qaangannite.
Bakkalcho Woxawaajje 19, 2014 M.D
