Kalqete 20 diri wori Atileetksete wedelli Kolombiyu qaru quchumi Kaalira lewu barrira harinsanni keeshshinoonni heewonni jawa guma borreessiisse gaamote massagaano sa`u Arbete soodo Itophiya e`ino. Atileetiksete gaamo Itophiya e`u yannara Boole Kalqete Rophilu Hoowe iillitu yannara luphiima mootimmate sooreyyenna Itophiyu Atileetiksete Federeeshiine massagaano ledo bareeda gede dukkinse haa`noonninsa.
Haa`ninsa amuraati aana Budunna Ispoortete Ministire Ministerchi Kalaa Qajeeli Merdaasihu; Ispoortete Handaari Deetichu Ambaasaadderi Mesfiini Cherinnet, Itophiyu Atileetiksete Federeeshiine Pirezidaanticho Komaanderi Deraartu Tullu, hattono wolootu ispoortete handaari aliidi massagaano afantinoha ikkanna, heewote hadhe higgino gaamora daraarote lado goowaho shembe assinoonni.
Qidaamete soodo, Atileetiksete gaamo fano kaameelinni Addis Ababu Quchumira addi addi dooggara doytanni dagate ledo hagiirrensa xawiissino. Iskayilaytete Hoteelera qixxeessinoonni pirogiraamera afamishshanna babbaxxino baraarsha uynoonninsa. Tenne Shaampiyoneera addi baraarsha uynoonnihu 800 meetirera Culqa hattono 1500 meetirera birru meedaaliya abbino wedellichi Ermiyaasi Girmihura baraarsha mootimma 500 kumi birra uytinosi. Xaano Culku meedaaliya abbitinorira mittu mittunkura 300 kumi baraarsha afanshinoonni. Birru meedaaliya abbitinorira mittu mittunkura 200 kume baraarsinoonninsa. Camote meedaaliya abbitino Atileetootaho 100 kume birra baraarsinoonninsa.
Shaampiyoonete dipoloomu deerra afidhe qeeltino Atileetootira 50 kumi birra baraarsinoonninsa. Heewote aana guma abbitinokki heewisamaanora beeqqonsa daafira 30 kume baraansoonninsa. Gaamo massaggurenna gaamote ledo hadhu loosu sooreeyyera 30 kumi birrinni kayse 75 kumi geeshshi baraarsha afidhino.
Federaalete mootimma aguranna Addis Ababu Quchumi Gashshooti bareedda Atileetiksete wedelli gaamora deerru deerrunkunni woxu baraarsha uynonsa. Konninni, Culkanna Birru meedaaliya goowaho wodhinohu Atileetichu Ermiyaasi Girmihu 250 kume baraarino. Culku meedaaliya goowaho wodhitinori wolootu Aatileetiksooti kayinni 150 kumi birra baraansoonninsa. Birrete meedaaliya abbitinorira 1 xibbi kumi birra, Camote meedaaliya afidhino atileetootaho qolle 75 kumi birra baraansoonninsa.
Baraarshu amuraatira battalate leellinohu Woganna Ispoortetete Ministerchi Kalaa Qajeeli Merdaasihu assino hasaawinni; Itophiyu Ispoorte alba qiidde noowinni fulte tayxe diro jawa guma borreessiissanni leeltannota xawisino. Babbaxxitino kalqete gobbuwa albaanni Itophiyu su`mi gotti yee leellanno gedee gumi afamino dirootinna dagano hagiidhitino yannaati yiino. Bayiruuddinsa Atileetooti faale harunsite wedelluno 12 meedaaliya borreesiisse gobbansara keerunni daansanni hawalle tashshi yiinoo`ne yiino. Mootimma ikkadda, qeeltannorenna wole riqibbanno Atileetoota laashshate ragaanni illachiinshoonni doogo seekkinota ikkasenni togoo gumi borreessamino yiino, Ministerchu.
Federeeshinete Amaale Mini Songaafichi Kalaa Agenyehu Teshaageri; “Itophiyunna Atileetikse babbadantannokkireetinna mittoho” yee kuni loosi kaajje sufiro xaano jawa guma abba dandiinannita xawisino. Konnira, mootimma atileetootu qote uurrite hasiissanno kaa`lo assitannota qaale eino.
Komaanderi Deraartu Tullu assitino hasaawinni; sai Tookiyote Olompiike gede Federeeshiine mereero e`ukkinni mimmitu ledo sumuu yaatenni loonse abbinoonni gumaati yitino. Atileetootu riqiwamaancho ikkitnoti Atileeticho Meselechi Melkaamu, dhaggeenfantanni doogonni dukkinse haa`noonninke daafira wodaninni galaxxanni, wedellu Aatileetooti borreessiissino gumi Itophiyaho baxxitanno dhaggeetinna jawa gumaati yitino. Wedellu Atileetootu heewote yannara qajeelshaanonsanni uynanni amaale adhite loosu aana hosiisse, baaruuddu Atileetootinsa faale harunsitenna buusante qeechansa garunni fulte guma abbitinota coydhino. Kunino aju wedelli aana loosa hasiissannota qummi assite, wedellu Atileetoorira albilicho irko assinanni gede xa`mitino.
Wedellu Atileetiksete gaamo heewote dhaggenni 6 Culka, 5 birranna 1 Camo borreesiisatenni kalqetenni sayikkita Afirikunni umkkita ikkite jeefisa dandiitino. 19 Atiletooti callunni lamunku koo/teenni 10 heewote loossanni calla beeqqaano ikkitino Atileetiksete gaamo xaphoomunni 12 meedaaliya borreessiissinoha ikkanna, mittu Atileetichi ka`a wolootu diipoloomanna meedaaliya abba dandiitino. Tini gaamo kalqete gaamonni Ameerikunna Jamaayikunni suffe sayikki deerra amadde jeefisa dandiitino.
Tenne shaampiyoonera, 1500 meetirenni birru meedaaliya goowaho wodha dandiinohu Atileetichu Ermiyaasi Girmihu 800 meetirenni ledote Culka abbatenni jawa Itophiyu beetto ikka dandiino. 3 kumi meetire sarraaqote dodanshonni Saamueel Digunihu Culku meedaaliya abbino. Wolu Atileetichi Saamueeli Firewu birru meedaaliya adha dandiino. Jawa heewo harinsoonnitenni 5 kumi meetire seennu dodanshonni Mediina Iisanna, Melkinaati Wuddu Culkunna Birrete meedaaliya goowinsara wodhitino.
1 kuminna 500 meetirenni seennu Atileeticho Birqe Hayyooleemiti 4:04.27 ikkitanno yannanni shaampiyoonete basete kibire wosene woyyeessatenni Culku meedaaliya qeela dandiitino. 5na 3 kumi meetirenni labballu dodanshonni Addisu Yihunenna Melkeenehi Azezi Culqa, 3 kumi sarraaqote dodanshonni seennu Siimbo Alemaayyoti, 3 kumi meetirenni seennu Tsiyooni Abbebeti birru meedaaliya qeeltinoha ikkanna, qoleno seennunni 3 kumi meetire sarraaqote dodanshonni Atileeticho Mesereti Yeshanehit Camote meedaaliya qeela dandiitino.
Abrahaam Saamueel
Bakkalcho Woxawaajje 12, 2014 M.D
