Addis Ababa:- Itophiyu boowete goofimarchinni Sidaamu Buni Welayitta Dicha 2nna 1 te qeelatenni shampiyoone ikkino.
Addis Ababu xawira sa“i sanbatu barra harinsoonni godo`lenni Habtaamu Taaddesenna albi Itophiyu Bunu qeedaanchi Mesfin Taaffese Sidaamu Buni eubba kiirsiissino.
Dukkisaano nookkiwa assinoonni goofimarchu godo`lenni Karloos Daamixewu Wolayittu Dichunniha callicho eo afisiisino godo`laancho ikkino.
Sidaamu Buni Itophiyu boowe kayisasi harunse dheggetenni umikki yannara aananno dirinni KAFi Konfedereeshiine boowera Itophiya riqiwannota buunxoonni.
Tenne qeelle laise qoqqowu pirezidaantichi kalaa Desta Ledamo Sidaamu Buni Itophiyu boowe qeelatenni shampiyoone ikkasinni baalanti qoqqowu daga hawalle hagiidhitinoonni yaatenni sokka sayisino.
Pirezidaantichu, qoqqowu mootimma ispoortete handaarira uyitino illachinni gumu borreessamanni noota xawise; hanafantino loossa kaajjite suffanno yee wirro hawalle tashshi yiinonke yiino.
Sidaamu Buni kilawe boordete gambisaanchinna qoqqowu woga turizimenna ispoortete biiro sooreessi kalaa Jaggo Agenyehu isi widoonni; Sidaamu Buni kilawe Itiyophiyu boowe qeelatenni shaampiyoone ikkasinni hawalle hagiidhitini/hagii`nummo yiino.
Boordete gambisaanchi Ispoortete handaarira uyinoonni illachinni gumu maareekkamasi buuxise; hananfoonni loossa kaajjite suffannota egensiisino.
Abbebech maatewoos
Bakkalcho Ella 5, 2017 M.D
