Addis Ababa:- Bayriiditi Haaroo`mate Kofatto way laayyo gobbuwa aana mitte gawajjo iillishannokkita buunxoommo yaanni Wodiidi Suudaane Dagoomu Hobbaatete Hajubba Amaalaanchi Kong Tiipiiteni Gaatilowaki.
Gargarooshshu Ministirenna Bayiiridi Haa`roommate Kofatto Boordete Gambisaanchi Dr Abrahaam Belayi; Haaroo`mate Kofatto ijaari Itophiyu dagara calla ikkikkinni Afiriku dagarano gutu pirojekteeti yiino.
Itophiyaho sasu barrira towaanyo assitinori Wodiidi Suudaane Hobbaatete Hajonna Siivilete Sooreeyye aliidi soqqamaano gaamo Itophiyu Haaroo`mate Kofattono towaanyo assitino.
Wodiidi Suudaane Pirezidaantichi Dagoomu Hobbaate Hajo Amaalaanchi Kongi Tiipitiini Gaatiluwaki tenne yannara xawisino garinni; Bayriiditi Haaroo`mate Kofatto way laayyote gobbuwarano nafa latishshu pirojekteeti yiino.
Itophiyu Mootummanni assinoonninsa woshshatto garinni dagge towaanyoassitanni noota xawiisnohu Pirezidaantichu, towaanyonsa yannara Haaroo`mate Kofatto olluu gobbuwa caabbichunni xaadisate pirojekte ikkitinota buunxoommo yiino.
Bayriidi Haaroo`mate Kofatto widoonni ka`anno hajubba yekkeeramatenni tidhama nooseta xawise; ‘’Assinoommo towaanyonni Kofatto gutu latishshi pirojekte ikkinnina mittu qarri noota dikkitino’’ yiino.
IFDR Gargarooshshu Ministire Ministerchinna Bayriidi Haaroo`mate Kofatto Boordete Gambisaanchi Dr Abrahaam Belay; ‘’Bayriidi Haaroo`mate (Abbay) Kofatto ijaari Itophiyaho calla ikkikkinni Afiriku dagara baxxinohunni olluu gobbuwara gutu latishshi pirojekteeti’’ yiino.
Itophiyu, Suudaanetenna Jibuutira caabbichu wolqa shiqisha hanaffino. Keeniyaho muli yanna kawa sonkeemmonsa; Wodiidi Suudaaneno caabbichu wolqa anje noonsa daafira hasatto noonsa; insarano shiqinsheemmonsa yiino.
Konne ikkinohura, Bayriidi Haaroo`mate Kofatto Itophiyu jawaata daga cigilenninna kakkalamanni jeefo afi`ranni nooha ikkanna, Abbay way laayyo gobbuwano horaaameette assannota xawisino.
Kofattote ijaari harinsho Abbayi way laayyo gobbuwa hedote giddo worre lame diro wo`ma way du`namanno tuubbo kalanqeenna way giddoseenni sa”anno gede assinoonnitano kulino.
Abbayi Way laayyo gobbuwa roduuwinke, kofattote ijaari daafira gobbaanni macciishitanno duduwinna konne basete la`nanni coy baxxinoha ikkino daafira, gutu latishshi pirojekitenke ikkitinota huwattanno yiino; Dr Abrahaam.
Itophiyu giddoydinna gobbaydi diinnanke, simintote faafirikkanke loossannokki gede, gobbaydinni uduunnicho eanokki gede assate loosono loossinota xawisino.
Dagoomu Mashalaqqenna Hobbaatete Owaante Dayrekterchi Jeneraalichu Temesgeeni Xiruneh; Bayriidi Haaroo`mate Kofatto giddonna gobbaydi diinnanni addi addi gawajjo iillitanno gede assinanni keeshshinoonni yiino.
Daga dhoohanna dila’ino; jironke horoonsi`neemmokki gede assate soqqamaasinensa diinna widoonni haammata fanjenna olu xagarro iillishshsara qixxaabbe heedheenna balanxde anfe shuffinshoommo; albilichono tenne kofatto agarate goxano diamaddannonke yiino.
Abbayi Kofatto ijaari Afiriku daga uminsa jiro uminsa dhukkinni loosidhe horoonsi`ra dandiitannota leellishinota Dayrekiteri Jeneraalichi xawisino.
Olluu gobbuwa Itophiyaho bacu way noota huwatte haqqu sircho kaasate looso loosse haanja haruma woratenni wole Abbayi kalaqa dandaa noonsa yaanni woshshatto assino.
Abbayi (Bayriidi Haaroo`mate) Kofatto sayikki doycho waa wonshate looso qinaawino garinni jeefisse, laynki Terbayne caabbicho burqisa hanaffinota Xaphoomu Ministerichi Dr Abiy Ahimedi noowa maassinsoonniti qaangannite.
Abrahaam Saamuel
Bakkalcho Woxawaajje 12, 2014 M.D
