Qiddist Gezaheny
Tayxehu heewote diri Itophiyu Atleetiksera baxxinoha ikke jeefamanni no. lamalate albaanni 18ki Origeni kalqoomu Atleetiksete shampiyooninni xaggeeffachishanno guma borreessiisatenni Ameerikunni aante dhaggetenni layinkita ikkite gumultinoti Itophiyu Atleetiksete gaamo coommado qeelle hawantukkinni wole hagiirsiisanno guma borreessiinsoonni. Origeni Shampiyooni gumulamanni hee’reenna Wodiidi Ameerika Kolombiya hodhitinoti Itophiyu wedellu Atleetiksete gaamo Kaali kalqete 20 diri woriidi shampiyooninni wole dhagge borreessiisa dandiitino.
Heewotenni Lee Culku, Onte Birrunna Mitto Camote meedaaliya borreessiisatenni kalqete sayikkirenna Afrikunni kayinni Umire ikkite gumula dandiitino. Sa’u Lee barrubbara harinsanni keeshshinoonni kalqoomu 20 diri woriidi Atleetiksete shaampiyoona 19 Atleetootinni seennunnino labballunnino 10 heewo aana calla beeqqitinori Atleetiksete gaamo xaphoomunni 12 meedaaliyinni kalqete gobbuwanni Ameerikunna Jamayikunni aante 3ki deerra amadde jeefissino. Kuni gumi techo geeshsha harinsoonni kalqoomu 20 diri woriidi Atleetiksete shampiyooninni jawiidiha ikkanna beeqqitino bikkantino heewo garinni la’niro gumu batinyoota hagiirsiisinoha ikkino.
Heewotenni Itophiyu amade gumulino deerri gobbaanni Shoolu Culkinna Lamu Birru Meedaaliyi shaampiyoonu jeefami yannara borreessamino gari batinyoota hagiirsiisino. Kuri meedaaliyubba Mittu hashshinni Mitte Sa’’aate wo’mitinokki yanna giddo borreessantanna labballu 800 Meetirenni Culku, labballu 3000 Meetire gufichunni Culkunna seennu 1500 Meetirenni Culkunna Birru Itophiyunniha ikkino.
Barrubbate albaanni 1500 Meetirenni Birru Meedaaliya adhinohu wedellichu Atleetichi Ermiyas Girmihu 800 Meetirenni ledote Culka adhatenni shampiyoonunni gotti yee leellinoha Itophiyu Atleeticha ikkino. 3000 Meetire gufichunni labballunni Saamueel Duguna Culku meedaaliya adhanna wolu Itophiyu Atleetichi Saamueel Firewuhu xageeffachishshanno ikkadimmanni Birru Meedaaliya adhino. Kaajjado heewo assinoonni 5 kume Meetire seennu heewonni Mediina Isanna Melknat Wuddu aantensannii Culkunna Birru meedaaliya adhanna, 1500 Meetire seennunni kayinni Atleet Worqe Hayyeloomi shampiyoonunni amadantino yanna woyyeessatenni culku Meedaaliya adhitara dandiitino.
Jeefote barri albaanni harinsoonni heewonni Itophiyu 5 nna 3 Kume Meetire labballunni Addisu yihunenna Melkeneh Azzezi Culku meedaaliya, 3Kume gufichu heewonni seennunni Simbo Alemayewuhu, 1500 meetire labballunni Ermiyas Girmihunna 3 kume Meetire seennunni Tsiyon Abbebeti Birru meedaaliya adhitinore ikkitanna; ledoteno seennu 3 kume Meetire gufichunni Atleet Meseret Yeshaanehi Camote Meedaaliya adhitinoti qaangannite.
Konne guma harunsite Itophiyu Meedaaliyu deerrinni Lee Culka, Onte BIrrunna Sase camote Meedaaliya xaphoomunni 12 meedaaliya adhatenni Ameerikunna Jamayikunni aante kalqete sayikkinna Afrikunni umi deerra amadde heewo gumultino.19 wedellu Atleetootinna 10 heewote dani beeqqonni calla afi’noonnihu kuni xaggeeffachishanno gumi Shampiyoonu dhaggenni Itophiyu wo’mu woyti jawiidi guma ikke borreessamino.
Bakkalcho Woxawaajje 5, 2014 M.D
