Sidaamu Dagoomu Qoqqowi Mootimma Lekkate Kaase Federeeshiine ha’rissanni keeshshitinoti 17 diri wori heewo tenne lamala gumultino.Sidaamu Dagoomu Qoqqowi Lekkate Kaase Federeeshiine La/Pirezidaantichi Kalaa Ambesse Abbebehu, 17 diri wori lekkate kaase konni gedensaanni Sidaami giddo afantanno gaamubba gobbaydi godo’laano hidhitanokki gede loosatennino sae gobbate ikkitanno godo’laano kalaqate loonsanni hee’noonita xawisino. Amadisiiseno Kalaa Ambesse, konni gedensaanni qaaqquullu aana ammana tunge loonsanni hee’noomono yee, konni gobbaannino dhuku noonsa qaaqquulli qaera higge ba’anni noohura Sidaamu Buni Lekkate Kaase Gaamono ammante qaaqquullu aana loossanno gede assate sharro assinanni hee’noommo yiino.
Federeeshiinete La/Pirezidaantichi, Sidaami giddo hexxo tunganni qaaqqulli nootano lede huwachishe; Itophiyu Lekkate Kaase Federeeshiine ledo tini heewo uurritannokki gede kaa’lo assitankera xa’mi’noommo; insano irkissankera sheemaate e’inonke yiino. Tini 17 diri wori lekkate kaase heewo “Qacale Wedella Gobbate” yaanno massagote qaalinni massagantannotanna Sidaaminnino sae gobbate ikkanno qaaqquulle kalaqate illacha tuge loosate mixo amandoonnita xawisino.
Ledoteno konni gedeensaanni heewo Hawaasi giddo calla ikkikkinni baalunku Sidaamu qarqarira ikkitannota coy’rinohu Kalaa Ambesse, Woraddate towaanyo assinummo yannara duucha woraddara qaaqquullu godo’lanno xawinna kaasete qarri noo gede la”ate dandiinoommo yee Konne taashshateno woraddate ledo loonsanni hee’noommo yiino.
Jeefote xayxe heewora 20 diriri Sidaamu qaaqquulli shampiyoona ikkitinota kayse konninni sunfummoro Sidaamu ooso umise Sidaamu Buni Lekkate Kaase amaddanno gede mixi’ne loonsanni hee’noommono yee; konnira baalu hedotenni kayse agarrannisi irko assaranna Mootimmano hasiissanno kaa’lo assitara sokkosi saysino.
Addisu Adoola
Bakkalcho Onkoleessa 19/2013
