2013 Beetkingete pirimiyer liige Shaampiyoona ikkinohu Faasili kanami woxu dhukasi lossate Sharaaten Addis hoteelera woxe gamba assate amanyoote harisino. ‘’Ispoorte Itophiyu mittimmara’’ yaanno massagote qaalinni Sharaaten Addisi hoteelera harinsoonni tenne e’’o gamba assate qixxaawo aana jajjabba mootimmate loosu sooreeyye, Qoqqowu gashshaano, dureeyye, lekkate kaase aliidi bissanna koyisantino wosinna afantino.
Konni amanyooti aana mootimmate bissanni lekkate kuwaase lainohunni sokka sa’’asenni aleenni gobboomu sumiimma kalaqanno hasaawi addi addi mootimmate loosu sooreeyenni saino. Faasili quchumi qajeelshaanchi Siyyum Kebbedehu qeellete badheenni cinca gudisiissanno sharro hiittoonni sa’inoro xawisihu gedensaanni gaamote riqiwamaanchi Yaared Baayyehu isi widoonni ‘’Tini sewo mitto ikkatenni mitteenni loonse sharramme abbinoommo qeelleeti. Faasili quchumi ‘’shiimiidi Itophiya’’ afi’nanni gaammooti.’’ Yaatenni xawisino doogo qixxawote aana afantino wosinna anga gansiissino.
E’’o gamba assate amanyooti aana babbaxxitino bissanni 155 miliyoone ali birra irko assate qaale e’noonniha ikkanna, Itophiyu lekkate kaase federeeshiine pirezdaantichi kalaa Isayyaas Jirahu, lekkate kaase babbaxxino qarrinni bebbeehantino tenne yannara massagote dayinota kule, Baxxinohunni Amaarunna Tigrayete gaamo mereero doye godo’late hasatto nookki yannara konne qarra tirate assinoonni sharronni Faasili gaamo kaa’lo luphiima ikkase coyi’rino.
Baxxinohunni federeeshiinete harinsho yannaasincho assate assinoonni soorro liigete kampaane kalaqqe tayixe heewo baxxino garinni lekkate kaase luphiima woxe abbitanno gede dandiisino guma borreessiisansanni liigete kampaane massagaano galate, lekkate kaase mannu irkiraanchimmanni fulte dagate safo amaddanno gede assate togoo qixxaawo hasiissannota ikkase coyi’rino.
Wolootu gaamo tenne ba’renni roso adhitanno gede qummi assatenni Qiddus giyorgisi ispoortete maamari woxu irko assasi jawachishinno. Jeefoteno albillitte lekkate kaasewiinni agarrannihu lowo mini loosi noo daafira yannate hagiirrinni fulatenni aantino annimmara qixxaabbanno gede sokka sayise Federeeshiinete su’minni 500,000 birra aate qaale e’’ino.
Qiddus giyorgisi ispoortete maamari boordete gambisaanchi kalaa Abinnet Gebremesqelihu, lekkate kaase keeru ba’re ikkase xawise; ‘’sharronkenni gumaho iilla’nenni Faasili kanami hawalle tashshi yino’ne’’ yaatenni Midrok Itophiyu su’minni lame Miliyoone birra irko assate qaale e’’ino.
Amaaru qoqqowi 20 Miliyoone, Oromiyu qoqqowi 25 Miliyoone, Wodiidi qoqqowi 10 Miliyoone, Sidaamunna Somaalete qoqqobba annu annunku Onte Miliyoone, Faasili kanama woxunni irkisatenni afamannohu kalaa Worqu Aytenewuhu 10 Miliyoone birra, kalaa Belayneh Kinde Onte Miliyoone birra aate qaale e’ino mannootinna uurrinshuwa mereerinni afantannoreeti. irko assaranna Mootimmano hasiissanno kaa’lo assitara sokkosi saysino.
Qiddist Gezaheny
Bakkalcho Onkoleessa 19/2013
