Qeelle Borreessiissino
Haammata Itophiyu Atileetooti dirrate kiiro maaratoonetenni hallanyu heewonni gummaamma ikka dandiiturono kalqete shaampiyooni bare aana kayinni albaagge fula dandiitinokkita sa’u heewo guminsa xawishsha ikkanno. Tenne barehunna Itophiyu callichu Culku meedaaliyi Faranjootu 2015 Beejingete kalqoomu shaampiyooni Maare Dibaabanni borreessaminoho. Konni gobbaanni kullara dandiinannihu callichu meedaaliyi Faranjootu 2009 Berliinete shampiyoona Asselefech Mergiya borreessiissino camooti. Kuri lamunku meedaaliyi calla Itophiya kalqetenni 6ki deerrira worte keeshshitino.
Hattono Keeniyu 4 culkinni, 4 birrunna
1 camonni umi deerra amadino. Jaapaane 2 culki, 5 birrunna 3 camonni laynki deerra
amaddanna Portugaale 2 culkunna 2 birru meedaaliya umi yannara borreessiissino. Xaa yannara Origeni harinsanni hee’noonni kalqoomu Shaampiyooninni tenne dhagge soorritino qeelle Atileet Goyititom Gebresillaasenni borreessantino. Uminni kayisse jeefote geeshsha Itophiyunna Keeniyu Atileetooti hayyote olinni jawaata heewonni dukkisantino meentu maaratoonete heewo Culku meedaaliyi Itophiyaho fooliishshi’rino.
Atileet Goyititomi heewotenni Itophiyaho laynkiha xeertinyu meedaaliya borreessiissanna Ingilizete Atileetitte Pawula Radkilifinni seeda dirrara amadante keeshshitinoti shaampiyoonu yanna 2:18:11 ikkitino yannanni hiiqqantino.
Goyititomi heewote mereero xisso macciishshantinoseha ikkirono jawa cincanni goofimarchu geeshsha jeefisatenni badhera dihiggino. Kunino Faranjootu 2007 Osaka kalqoomu shaampiyoona ikkitinoti Xirunesh Dibaaba godowase cu’midhe qeellete iillitinonte gede Goyititomino labbanno dhagge leddino.
Amadaminohunni labballu maaratoonenni Atileet Taammiraat Tola Itophiyaho Culku meedaaliya abbanna shaampiyoonu yanna woyyeessasinni qeelle eronnita ikkitino. Mittu shaampiyooninni Itophiyu meentunnino labballunnino maaratoonete culka adhanna dhaggetenni tini umi yannaati.
Bakkalcho Maaja 14, 2014
