Qiddist Gezaheny
Atileetootunniwa jawa ayirrinyenna baycho uynanni heewo mereerinni kalqoomu Atileetiksete shaampiyooni mittoho. Kaajjado heewo assinanni tenne heewonni woloota qeelle meessineetiranna gobbate guma borreessiisa meedaaliyu aleenni ikkino ayirrinye uysiissanno. Konninni afantannori Afriku Atleetooti gobbansa su’ma qeelletenni woshshiishshanna Baandiiraseno wolootunni aleenni gotti assiissanni seeda dirra kiirsiissino.
18ki kalqoomu Atileetiksete shaampiyooni aanano Itophiyu Atileetooti rosantino qeelle addi addi xeertinyinni borreessiissanni afantanno. Itophiyu xaa geeshsha gamba assidhino meedaaliyooti batinyinni qixxeessaancho gobba Ameerika harunsite laynki deerra amaddanno gede assitinoseri lamu Birru meedaaliyubba hagiirru lallawa ikkitno. Labballu 3000 Meetire gufichu qolchanshonna 1500 Meetire meentu heewo meedaaliyubba afi’noonni heewooti.
Umo assine harinsoonni 3000 Meetire gufichu qolchansho balaxote hedo uynoonninte gede qeelaanchimmate heewo Aliyyenna Soojjaati Afriku Atileetooti mereero iibbitinonkanni. Tenne heewonni xeertinyunni seeda dirrara aliidimma amadde keeshshitinori Keeniyu Atileetooti heewisamaano ikkitanno yine agarroonniha ikkirono qeelaanchimmate hedo kayinni Olompikete shaampiyooni Morokote qansichi Sofiyan El Bakalinna Olompikete birru meedaaliya adhinohu Lemecha Girma mereero gattanno yine agarroonninkanni.
Geetinnet Waalenna Hayilemariyam Amaare Itophiyu widoonni heewote mitiimmanna Meedaaliyu qolchamaano ikkitanno yine hende kaajjado heewo assinoonni tenne heewonni agarrannihu Bakali konni xeertinyinni 200 Meetire gattannasi alba hige fule maala’lissanno ikkadimmanni qeelanna Itophiyunnihu Atileet Lemecha Girma kayinni birru meedaaliya adhino. Dohaho harinsoonni kalqoomu Atileetiksete shaampiyooninni, Tokyo Olompkenni, hattono Belgredete mini giddi kalqoomu shampiyooni aana birru meedaaliya gamba assi’rinohu Lemecha; Origeni laynki deerra amade birru meedaaliya gobbasira abbino. Heewotenni balanxe assinoonni heewonni culku meedaaliya adhate gaabbotenni base ha’rannota egensiisinohu Lemechi; heewote gedensaannino wole gaabbo aana noota leellishino.
Heewote gedensaanni kalqoomu Atileetiksete qooli ledo assino hasaawinni ‘’lowo geeshsha diggi yitino qolchansho ikkitino daafira dodansho’ya hayyo soorrate wo’naalummorono hedoommo garinni dodeemmokki gede agabbinoe. Kunino Culku aneha ikkannokki gede assinoe. Aantete culku meedaaliyi calli’yaho; qixxaawo’ya xaanni hanafeemmo’’ yaasi nabbawisiisino.
Aantetenni harinsoonniti wole gumulote heewo meentu 1500 Meetire heewo ikkitanna konninnino birru meedaaliyi Itophiyunniha ikkino. Kaimunni shiima Atleetooti albaanni balaxxe fulatenni kaajjishshino tenne heewonni kalqete shaampiyooni dhaggenni lowo geeshsha gummaame Atileetitte Keeniyunniti Fez Kipyegooni wole qeelle borreessiissino. Belgreedi mini giddi shampiyooninni xeertinyinni culku Meedaaliya adhitinoti Itophiyunniti Gudaaf Tsegaye kayinni gobbasera sayikkiha birru meedaaliya kiirsiisa dandiitino. Atleetitte Keeniyunnite ledo jawaata heewo goofimarchu geeshsha assitanni keeshshiturono heddino garinni Culku meedaaliya umiseha assi’ra didandiitino.
Yujininna Doha Camotenna Birru meedaaluya adhitinoti Gudaafi; tenne heewonni sayikkiha birru meedaaliya adhitino. Heewote gedensaanni ‘’Tenne heewonni woyyaawino guma agadhoommankanni; ikkollana heewisamaancho’ya woyyaawino rosichi noosete. Birru meedaaliya adha’yanni hagiidhoomma’’ yitanni hedose uytino. Atleetitte 5 kume Meetire heewo beeqqaancho ikkitinoti qaangannite.
Bakkalcho Maaja 14, 2014
