Itophiyu Atleetiksetenni su’ma fultinohu 10 kume Meetire heewonniiti. Konni xeertinyinni dhaggenniha ikkino Miruts Yifxerinni kayise dirra dirratenni riqiwantannokkiri muxxe Atleetooti meentunnino labballunnino Itophiyaho kalqete xawo Culka uddisiissino. Muli dirra kawa kayinni konni xeertinyinni Itophiyu Atleetooti culkunni xeertidhe keeshshitino. Sa’u Tokiyo Olompikenni kayinni xeertinyu ayirrinye Atleet Selemoon Baaregga jawa sharronni Itophiya qolino.
Tokiyo Olompike gedensaanni ga’anni hananfe harinsanni Origeni kalqoomu Shampiyooninni Itophiyu heewotenni 12 diri gedensaanni ayirrinyisewa higganno yine agarranni. Kunino korkaatunni irkisa dandiinanni balaxote heewo ikkinnina hexxote aana safantinota ikkitinokkita mashalaqqe kultanno.
Olompikete shampiyooni Selemooni tayixe xeertinyunni haammata heewote doorsha afi’re xaggeeffachishshanno ikkadimma aana afamannota hige hige leellisha hoogirono albiidinke Sambati hashsha harinsanni heewonni Culka adhate dhuki noosi yine ammannanni. Mittu agani albaanni Hengilo Itophiyu heewisamaanonsa qeeltino doogo selemooni xaano xeertinyunni beeddakko ikkasi xawoho leellishanni afamanno. Selemooni Hengilo filote heewonni shotunni qeelinonsari Itophiyu Atleetooti yanna yannatenni xeertinyunni rosichunna dandoonsa bowirtanni dagginotanna wedella ikkansa bikkinni Atleetichu ikkadimma xawisse leellishshinote. Selemooni albiri gede xeertinyu beeddahe Hayile Gebre sillaasenna Qenennisa Beqqele mereerimu xeertinyinni hattono mini giddo heewonni gummaamo ikkasi tayixe heewote diirinni leellishino. Kunino 10 kume Meetirera noota jawaatanna daafurikkinni xaggeffachishanno ikkadimmanni heewo jeefise Culka adhate heewisamaanosinni woyyannoha assitannosi yine agarranni. Dirisinnino aja wedellicha ikkasinnino Olompikete qeelaancho ikkasi ledo amadaminohunni hettisamaanosinni woyyaabbino buqqeete jawaante aana afamanno gede assannosita ikkasenni faranjootu 2011 ni kalqete shaampiyooni Ibrahim Jeyilan hambannikki qeelle gedensaanni Itophiyu konni xeertinyinni qeellenniwa higanno gede assanno yine agarranni.
Konni xeertinyinni Selemooninni gobbaanni Itophiyu Meedaaliya agadhitanno wedellichi Atleet Berrihu Aregaawinna Taaddese Worquhu shota hexxo tungannire di ikkitino. Baxxinohunni xeertinyunni jawaata heewisamaancho ikkanno yine agarrannihu xeertinyu qeelaanchi Yugaandu Atleetichi Joshuwa Chiptegeni; tayxe diro 5km qeelaancho ikkinoha Berrihu; Sambatu heewonni baxxino coye kalaqqara dandiitanno yite batinyootu hexxo assitinno. Berrihu hettisamaanosinni dirunni shiima Atleeticha ikkirono babbaxxino xeertinyinni leellishannoti xaggeeffachishshanno ikkadimma heewisamaanosira yaaddo ikkitinno. Sai diro Riyo Olompikenni Selemooni worqe baraarinoha ikkanna Shoolkiha ikke gumulinohu shiimaadda hayyote soronninna rosichu anjenniiti. Xa kuni Atleetichi umosi woyyaawino deerra iillishasi Hengilo Selemooni harunse Dayimend Liighete heewo aana leellishino. 20 dirihu Taaddese Worquhuno Itophiyu Atleetooti gambooshshe waajjishannoha assitanno korkaatta mereerinni mittoho. Sai diro kalqete 20 diri woriidi Shampiyooni 3 kume meetirenni Culka baraarinohu kuni wedellichi ;Atleetichu harancho yanna giddo umosi ikkado asse Sambatu heewonni Culka baraara hoogirono Culku korkaata ikkara dandaanno.
Itophiyu Atleetooti gambooshshi konni deerrinni waajjishannoha ikkirono baxxinohunni Yugaandu Atleetooti agartannonsati kaajjado heewo maanxannita di ikkitino. Baxxinohunni xeertinyu kalqete shampiyooninna qeelaanchu Joshuwa Chiptege selemooninni ajjinokkiti Culku kaayyo noosi Atleeticha ikkasinni Itophiyu Atleetootira shota qarra ikkannokkiti xawoho. Qidaamete hashsha 5 Sa’’aatenni harinsanni meentu konni xeertinyinni gumulote heewonni Itophiyaho jawa Culku hexxo noose. Baxxinohunni xeertinyu kalqetenna Olompikete Shampiyoona ikkitinoti ilamaternni Itophiyunni ikkite Neetherlandete Atleetitte Sifen Haseniti tayixe heewisamase huluullissannota ikkase Itophiyu Atleetootira jawa kaayyo ikkitanno. Sifeni heewote diro gawajjotenni saysase yannate uurrinsha aana huluullo kalaqqino. Konninnino heewisanturo nafa Itophiyu Atleetootira sau dirra gede qarra ikkitara dandiitanno kaayyo ruukkadote. Kunino Dohaho Birru Meedaaliya adhitino xeertinyu qeelaancho Letesembet Gideyira hagiirru duduwo calla ikkikkinni shaampiyoonimmate higate dancha kaayyooti.
5 na 10 kume meetire qeellese aana tayixe diro boco maaratoone qeelaancho ikkitinoti 24 diriti Letesembet Gidey; Hengilo balaxaancho ikkite gumula hooggurono xeertinyu aana noose ikkadimma dihuluullissanno. Sa’u heewose aana noosehu rosichu anje qarri tayixe gatara dandaannota ammannanni. Tayxe diro Belgireedi kalqoomu mini giddo shampiyooninni 3 kume Meetire Camote meedaaliyi qeelaancho Atleet Ijigaayyehu Taayyeti meedaaliyu heewo dhuki noose Atleetitte ikkitanna Letesembeti ledo hettisama dandiitannota muli yannanni leellishshino. Konni aana 20 diriti Atleet Bosena Mulaate haaro Itophiya riqibbannota ikkite fultino. Kunino kaajjado heewisamaancho ikkanno yine agarrannni Keeniyu Atleetoota qeelate Itophiyu Atleetootira haaro dhuka ikkanno yine agarranni.
Teshoomehu bashsho kowaase godo`lanni sai yannara, Sidaamu Bunira, Hawaasi Kanamira hattono Hadiyya Hosaanu kilawera guracho widoonni gargaraancho ikke godo`linota odoo qaagiissitino.
Tayxe heewote diro godo`le hananfi yannanni kaayise kaa`laancho, jeefoteno yannate geeshshi qajeelshaancho ikke gumaame yanna sayisino daafira qara qajeelshaancho assine mootoonsinoonnita buuxinsoonni.
Qiddist Gezaheny
Bakkalcho Maaja 7, 2014 M.D
