Barru tewo soodooti. Umo woroommowiini baadiye’ya gute fule ha`ranna hudiissie lawannoena mite gede shaqqisheennae mitto basara durinshanni mine e’e gaffi asse anga ganganeemmo. Mitte mafuuda uddanno uddidhe alba kolossi yitinoti iillitino beetto kubbite kaddanni anewa higge dagge “Min litaazzez” yitanno’e.
Quchumu sagalete dana bade ofoommokkihura hakko manchi itanno gedeeta doru baccichinni durinshoonni durishame abbi’e yeenna, daggunte gedeenni kubbite kaddanni ca’lamaddi! ca’lamaddi! assitanni suntoonni basariwa marte durinshanniwa massite shiima keeshiishshe abbitanno’e. Kaliiqa galate ka’e haxo gotti yee baccicho la’eemmo woyte abbinoonni’ehu lame guma maalchooti.
“Intinkinni minshiro hafuurranni” yinanni daafo saale malcho’ya corqanni beetto’ya waa abbie yeemmo woyte “Sint liitr?” yite xa’mitue. Beetto’ya baadi waa abbi’e hallohono lowore diamadoommona yeemmo woyte “Yellem” yite hara geeshshaho. Qoxeessa’ya kawa ka’a lae saalummoti ishi “Shiimidi koddiha abbie” yee hajacce age ka’e amo “Isaawa” adhi yeenna iso shotisse “Meto semaniya birr newu” yitannoe.
Beetto’ya maricho horonsireenna hakeesha mari yuummotera “Kefellekk derresenyi lamexallih ichilaalehu” yite, saanteno adhitukkinni ko’o shiimiccu hincilaallote mini giddo ofollino manchiwa hara geeshaaho. Ane ba’ummohu tewooti! yee hereenna wonaase gede kubbite kadanni agoodase shaffanni kambali anewa yite “Biil kefellekk yihewu” yite karicho ta’ino waraqaticho tuga geeshshaho. Tenne afoommokki ani beetto’ya may iteenna mariwaati yee qora qonxoo`reemmo geeshsha “Abo atcheqichiqenyi” yite mite gede gaara usurtutera, techo shollito ane! yee rahe qora’ya qonxoore baaxxe fule baadiye’ya haroommo yeemo’ne.
Abebech maatewoos
Bakkalcho Onkoleessa 19/2013
