Itophiyu lekkate kuwaasenni jawiidita heewote ba’re ‘’Pirimiyer Liige’’ yine su’minse mitte doogonni harisa hananfoonnihu 1990M. Dni hananfeeti. Lemoo dirra ali harinshonni addi addi shaampiyoonootanna qara ikkitino soorro leellishshino. Tayxeta lede 24 boowe babbaxxitino kilabbanni kaysa dandiitino. Tenne 24 boowennino Qiddus Giyorgisi tayxeta lede 15 gamba assi’ratenni jawiidiha ikkasinni aleenni co’o yitino aliidimma amadino. Gattinota 9 boowe wole kilabba adhitino.
Umi boowe kaysatenni su’mase dhaggete taje aana borreessiissinoti liigetenni dirrite tayxe higase buuxissinoti albi woshshattonni Mebrat Hayile xaa su’minni Itiyo Elekitrikete. Mebirat Hayile hattenne yannara 24 diri albaanni umi boowe kayissinohu 32 bixxille gamba assi’ratenniiti. Tenne bixxille gamba assidhinohuno 8 eo calla kiirsiisatenniiti.
Sa’u lamalara 15ki boowe kaysa dandiinohu Q.Giyorgisi; umi yannara boowe kaysinohu 1991niiti; 10 gaamo calla beeqqitino heewonni. Aanino dirono gaamotewiinni boowe adhinohu dino. Kilabbate kiirono hattenne yannara 12 iillitinonkanni. 1993M.
Dni Mebrat Hayile lame dirra gedensaanni wirro qeelaanchimmansa leellishshino. Mebrat Hayile tenne dirrara boowe kaysatenni Qiddus Giyorgisinni aante lame higge Shaampiyoona ikka dandiitino callicho Addis Abebu kilaweeti. Tenne qeelle gedensaanni wirro boowenniwa dihiggino. Hattenne yannara beeqqaano kilabba kiirono 14 iillitino. 1994M.D heewote dirinni Q.Giyorgisi wirro aliidimmansara higgino yanna assine qaanganni. Q.Giyorgisi Sase hige shaampiyoona ikkanna aanino dirono 4ki yannara liigete aliidimmansa leellishshino.
1996 M.D Pirimiyer liigete haaro ikkito haa’re dayno dirooti. Hawaasi kanami umi yannara Pirimiyer Liigete boowe kayissinota umita qoqqowu gaamo ikkitino. Shiimunni 2 dirinni mitte higge mootoo’ma rossinori Faradaasinu lame aante aantete qeellensa gedensaanni wirro shaampiyoona ikkitinohu 1997M.Dniiti. kunino 5ki qeellensa ikkite borreessantanna aanino dirono Shaampiyoona ikkatenni hoolinonsahu dino. 1998 heewote dirinni 1993 M.Dni hananfe 14 kilabba mereero harinsanni keeshshinoonni Pirimiyer liige 15 iillitino.
2003M.Dni liige wole haaro dhagge la’ino yannaati. Haammata irkisaano afi’rinohu Itophiyu Buni konni heewote dirinni 16 kilabba ledo heewisame irkisaanosira boowe kaysino. Shaampiyoonu dhaggenni Itophiyu Buni leda dandiinokki boowe xaa Waaliyootu qajeelshaanchi Wubetu Abaatehunni massagame haaro nugusa ikke borreessamino.
Faradaasinu 2004M.D heewote dirinni Shaampiyoona ikkite higgino. 14 kilabba mitte doogonni beeqqa hanaffino heewote dirinni Faradaasinu gollonsa higginohu 59 bixxille gamba assi’ratenniiti. Aanino dirinni kayinni Faradaasinu rossinonte gede qeelaano ikka didandiitino. Konninnino, Pirimiyer liigete wosincho ikkitinotinna beeqqa hanaffunkunni shoole dirra calla kiirsiissinoti Deddebite beeddakko eote kiirsiisaanchinna beeddakko godo’laancho ikke dooraminohu Geetaaneh Kebbede massagonni Liigete haaro shaampiyoona ikka dandiitino. Tini dhaggensa Pirimiyer Liige Faradaasinu gobbaanni kayissino 4ki kilawe assitinonsa. 2006M. Dni Faradaasinu mittu diri gedensaanni shaampiyoonimmate higgino yannaati. Aanino dirino Faradaasinu liigete lame godo’le gattannansa 12 higge mootoo’mansa soodotenni buuxxino yannaati. Aantino lame dirranni pirimiyer liige beeqqaano kilabba kiiro 14ni 16 iillishshino dirrara Faradaasinu mitii’mitukkinni aante aantetenni boowe kaysa dandiitino.
Tenne heewote dirra gedensaanni kayinni 2010M.D hanaffe pirimiyer liige haaruuddu shaampiyoonnanni wo’mitino. Sase heewote dirrannino babbaxxitinori qoqqowu kilabbano shaampiyoonna ikkite daggara dandiitino. Hatte yannahu Jimmu kanami xaa woshshattonni Jimma Abbaajifaari hanafinoha shaampiyoonimmate massagooshshe Meqele Quchuminna Faasili kanami karsante sa’u sase dirra boowe kaysa dandiitino.
Faradaasinuno tenne yanna gedensaanni sa’u lamalara 15ki boowe kaysatenni shaampiyoonimmansawa higgino.
Qiddist Gezaheny
Bakkalcho Ella 30 , 2014 M.D
