Kinsikkinni kissannokki gobba; amma’nosenni kaaliiqa waajjitanno gobba Itiyophiya! Kuni su’mi kolidda giira riqiwannota sodhinori kaa’aanni kawaanni hurqitanni bayichinni wodana kayissara hasidhanno.‘’Mitte sa’’ummoro mitte doogonni
Sheexaanu di gonxo ane duganni’’ yitanno faarso addankonni techo qaagantinoe. Itophiyu gobba xaaliyaanunni wolaphite techora iillita geeshsha yanna yannatenni jifo xaaddanna anga uyitukkinni techora iillitu. Babbaxxitino yannate fayya,moolle,hude, gobbayidi gobbuwwa yortote hekko,giddo kayinni biilloonyu hasatto hembeelsitanna;kayinni ubbukkinni techora iillitu.
Hembeelamanna shashshafama batidhanno wote co’ontanni ba’’a woy co’ontanni wolapha di gattanno. ‘’Booraawikkinni di xalalanno’’ Tini hembeellammenna canci booraambe xalalate ikkitanno.
Ikkireno ikkeenna Ameeriku batissuwe; ani xoxxiisse ani daahe ani sherkeemma’ne yitanniwe no. ninke xoxxiissine,ninkenni daanke,ninkenni sherki’neemmota mayira Adiwu olinni di qaagganno? Mayira Hiddaasete kofatto ninke woxinni,uminke baattonni burqinoha, uminke daganni konfanni jeefote iillinoommota qaagate deantu?
Ameerikunniti heedhona, Sudaanenna Gibitse doobbichimmanke mule heedhe affinotera mayi wodanansa beeshsheenna Itophiyu aana ka’ate wo’naaltu? Sodhinoonte! Hirphinke baatto milli assannota;xirchinke allagga gudannota afate hasidhiniro Xaaleena xa’me! Xa’me!
Ninke ninkenni Hiddaasete kofatto gatamarro ikkinnina; duuchanti woyi tayise sa’annonna du’namanno gobba horaameeyye ikkitannota kalqe naqqassanno! Itophiyu do’nittenna honqooqitte gobba ikkitinokkita buuxate baadiyye dirrite waajjuullu anganni waa xa’miteenna ado uyinannansa huwata dandiitannonkanni. Honqooqitte gobba ikkitinokkita Abbayi xashshi diro baala bushshase,shiilose mulqe hodhisanna ola fana hoogasenni hawata dandiitannonkanni. ‘’mixashshonnihu hee’reenna saffunnihu xoxanno’’ yaanno Sidaamu maammahanni. Ola fannoommero ninkenni biifanno.
Wi’linoommorono ninkenni. Korkaatuno 30 miliyoone ali amuwwinke wiliiletenni illensa xiwantanna Abbayi qaesi onche Gibitse xawisannni, gibitsete daga laalote juusenni lekkansa hayishidhanno gede assanni noo daafira!
Hay ate Abbay! Xa halaale coyi’ratto yannaati! Tutuma duqqite dowaatto yanna konne ikkitohe! Burqootto baattora kaayyo ikkoottohu,qullaawu maxaafi giddo ‘’giyoon’’ yine woshinannihu,xa ikkinohe yitanno Itophiyu amuwwikki! Asalu noohena halaalunniwa higi.
‘’Bashshonni masillaamoho manni muttaara adhinohu’’ yaanno Artist Addunya duumo sirbunni. Eewa manni waa hogoofidhanni keeshshitino gibitse xa massino. Konne masillensa awaawurate baca hayyo horonsidhanni cancishate wo’naaltanni afantanno. Gibitse calla ikkikkinni Galchimi gobbuwa Albisaanote yinoonniri xuqu xaadooshshinsanni hanaffe cancishate looso loossanni afantanno. Masillu bati’riro boono boonoho,bobbooddo bobbooddoho yinikkinni ikkinanni ikkito galchimi gobbuwa aana leeltanni no.
Roorrimmanke Konfe gundummokkinni reqecci yite leeltinota huwantanni hee’noommo yannaati. Kuni Itophiya baqqi assanno qilleessaati ikkinnina tuge hunara dikkino. Kayinnilla xa Itophiyaho hasiissanno hayyo hunda annuwwinke maltenna falte,gura qiniite la’e adhitanno qaafo callate. Shiimare layi’nayireno afidhino yannaati. Diinu soossore Itophiya gaangeesse noo yanna hiittoonni sa’no? yitanno xa’mo, ayyaanto ayyaantote garinni,cimeessu cimeessimmasinni, ejjeetto xirchinsanni,annuwwu gaarinsanni,ammanno’te massagaano ammano ammanote garinni hayyo kalaqa hasiissanno yanna xaati.
Annuwwinke mundeetenna miqichinsanni abbitino gobba Itiyophiya! Techo yortotenni dimbitino kokkaammanni di ba’anno. Ninke gobbayidi diina yinanna giddoyidi kokkaanchi reyino yinanna muqaaqanno gede kaa’lo assitanno gobbuw angansa kayisso! Xeertote diina agadhinanni, muli diina kayinni maganu agaro. Eemaranto insana gobbakki baxattohu mittu mittunku muli diina sayisse aatenni badhe higa hasiissannohekki yanna kuneeti!
Yaareed Geetaachew
