Addi Ababa:- Itophiyu pirimiyerliige 1990nni haaro gede harisama hanfinku kawa tayixe heewote dirihu gede jefoosi agarrannitanna coommitannota ikkitino hedeweelcho muli dirra giddo leelte degentino.
Umihunni kayse champiyonimmate harinshosi mitte kilawe calla assitanno sharro lawinohu 2014 betkiing Itophiyu pirimiyerliige lemoo lamala amuraati godo`le gedensaanni hendoonnihu gobbaanni ikkitino gumma borreessantanni hadhino. Kunino jawiidi boowe sunqate kaayyo mitte kilawe widira calla alba higgannokki gede asse liigenniha jeefishshu godo`le quqquxotenni wo`minoha assinosi.
Liigennita sa`u ontenna hakku ale lamala godo`le umihunni kayse hala`lado bixxillete badooshshinni massaganni noohu qiddus giyorgiisinna harunsaanchosi faasil kenemu mereero noo heewo kaajjitanni jeefote lamalate amuraati geeshsha suffino. Jeefonnihunna sajjiikki lamala amuraati godo`le Bahirdaarete xawira ha`ranno woyteno faradaasinenna Atseri boowe kaysate hexxonsa amadde xawo e`anno.
Niriha liigete champiyoone qeelaasine ikkitinori atsootu dhaggensanni layinki boowe sunqate hanafonsa laaffinota labburono liigete goofimarchi gedensaanni maala`lisannonna tolanno hodho assite faradaasinete ledo noonsaha hala`lado bixxillete badooshshe mittu widira ruukkisatenni champiyoonimmate heewo agarrannitanna quqquxammannita ikkitanno gede assitino.
Faradaasine seeda lamalara massagaanchimmansa agarsiisse qaaffurono atserinni iillitinonsa umi qeelamanna wirro higge bixxille tugansa tonaaontikki doyichora boowe kaysate albankeenni nooha jeefote amuraate agartanno gede gadachinonsa. Ikkollana champiyoonimmate kaayyonsa mitte bixxille badooshshinni harunsitannonsa atseyootinni woyyinoha ikke jeefote heewora iillishinonsa. Faradaasine boowe sunqate jeefote godo`lenni Addis Ababu quchuma qeelate gadachi giddora e`e xaaddanno. Qeelate gobbaanni taalo ikkitino guma nafa kaysa difushshitannonsa. Wole widoonni atseyootu faradaasine tugganno bixxille agartanni liigetenni dirrannokki gede sharramannoha Dirre Daawu quchuma qeela calla boowete hexxonsa ikkanno.
Liigete boowe lame heewisamaanonni mittu angara e“ase buuxantinote. Kunino daanno diro Itophiya riqibbe Afikaho jajjabba heewubba beeqqitanno kaayyo balaxxe angansara eessitanno gede assinonsa. Konni ledo amadisiisameno CAF Afrikunnita jajjabba kilewete heewubba lainohunni kilewennihanna godo`laasinete borreessamme hattono heewubbate barrubbaha mashalaqqe faajje assino.
Afriku champiyonsliigenna konfedereeshiin kaappe diru tuqa gobbuwate liigete qeelaanonna layinkiha fultinore hattono tuge sa“ate kaayyaataamma gobbuwate giddoyidi liigete seerubba garinni beeqqisanni afamannota anfoonni. Itophiyunnino hiittenne heewora hiitti kilawe beeqqitannoro bandannita ikkiturono qiddus giyorgiisinna faasiil kanamu harissanno heewo liigete champiyoonimmara calla ikkikkinni jawiidi Afriku champiyoonsliigera beeqqateno sharrantanno heewo ikkitino. Liigete boowe kaysannohu Afriku champiyonsliigera godo`lanno. Layinkiha ikke jeefisannohuno Afriku konfedereeshiine boowe aana beeqqannoha ikkanno.
CAF 2022/23 gobbuwate godo`le lainohunni babbaxxitino mashalaqquwa barrubbate albaanni faajje assinoha ikkanna, lamente heewubba aana beeqqitanno kilawe beeraawe federeeshiine egensiissanno barri maaja 24 (July 31) widira shiqqi yiinota buunxoonni. Umihunni balaxote filote doyicho beeqqitanno kilawe horonsidhanno godo`laasine eessitanno barri maaja 25nni hanafe wocawaajje 9 geeshsha ikkinota kulloonni.
CAF kilewete heewo deerrinni umiha 12 bayicho amaddinori Aljeeriya, Angoola, D R Kongo, Gibitse, Giini, Liibiya, Moroko, Nayijeeriyu, Wodiidi Afriki, Suudaane, Tanzaaniyunna Tuniiziyu lamente heewubbara lame lame beeqqaano kilawe riqibbannota anfoonni. Itophiya lede woloota gobbuwa kayinni deerri deerrinsanni umihunni balaxote filonni hanafe godo`le assitanni qara heewora qixxaabbannoha ikkanno.
Umiti balaxote filo xawunni woy xawu gobbaanni assinanni godo`le fooqa 4nni wocawaaro 1geeshsha/ wacawaaro 6-8 geeshsha assinanniha ikkanna layinkiha balaxote filo xawunni woy xawu gobbaanni assinanni godo`le kayinni wacawaaro 27-29/ birra 4-6 geeshsha gumullannita fulino amuraati leellishanno. Champiyonsliigete layinki balaxote filora ubbino kilawe konfedereeshiinete kaappenni birra 23-30 ledote filote godo`le assitannoha ikkanno. Xawinsoonni doyichubba sa`anno kilawe sadaasa 23- arfaasa 23 geeshsha ledote godo`laasinete borreessamme gumulte ammajje 3-5 geeshsha umi godo`le assate qara heewo widira e`annota buuxinsoonni.
Kilawe heewote horonsidhannore 40 godo`laasine borreessiisa dandiitannoha ikkanna soorrante e`anno godo`laasine ofoltanno base aana 9 godo`laasine worte godo`lete 5 godo`laasine soorirate qoosso noonsata xawinsoonni.
Abbebech Maatewoos
Bakkalcho Ella 23, 2014 M.D
