Albisaano gobbuwa Itophiyu aana xiiwo kalaqqara wo’naaltannohu uminsa horo calla shallagganniiti yaanni Sidaamu dagoomu qoqqowi mootimma pirezidaante kalaa Desta Ledamohu Itophiyu pireesete uurrinsha ledo assino keeshshonni egensiisino.
Kuri gobbuwara murritte ikkitinoti Ameeriku Afriku buudi gobbuwanni hasidhannori bacuri noota la’’a dandiinani yinohu kalaa Desta; baxxinohunni Gibtsenna Arawete gobbuwa ledo halamatenni Itophiyu giddoydi hajubbara angase wortara hasidhanni noota coyi’rino.
Gobbuwate jawa yaaddo ikkinohuno Chayinu, Afriku gobbuwa nooseha dancha xaadooshshe giwisi’ratenninna Afrikano hasidhu gede kadde gashshate hasattonsa kaiminniiti yinohu pirezidaantichu; gobbanke aanano jawa xiiwo assitanni noohu Itophiyu Galchimi gobbuwa hajajonna kadote gashshootira anga uyitannokki mootimma ikkase huwattinohuraati yino.
Giddoyidi wolquwano ikkituro shiimmaaddu coyinni koffi yitanni aantanno ilamara iqqi’neemmota ayirradonna lattino gobba horonna ayirrinye diinaho sayisse aatenni qorophite dagankenna mootimmate ledo halantara hasiisannota huwachishino.
Galchimi gobbuwano ikkito qachu gobbuwanni gobbanke aana qarra ganate assinanni hee’noonni hekko xiinxalline la’’atenni gobbanke keerenna ga’labbo teessanno gede, haaroo’mate kofattonke loosinna doorshu harinshonke garunni gumulanteenna gobbanke jireenya buuxisiisateno qoqqowu daganna mootimma agarranniha annimmate qeecha baala fultanno yino.
Ikkinohurano gobboomitte horonke gobbanke kisannohanna ayirrinyese shollishate wo’naaltannota gobbayidita ikkito giddoyidi wolquwa sharramatenni iillannike noo qarrinni sa’’ateno qoqqowunniti ikkito wo’manti gobbanke daga giddoyidi mittimmanke kaajjishi’ranna halamme diinnanke shollisha hasiissannota kalaa Desta amadisiise sokkasi sayisino.
‘’Xa Ameeriku iillishanni noonke hekko koroonnu fayya shetisa hooggoommenkero; timbilqe dira fulatenni abbooshshi’ranke kalqete leellinsheemmonkanni’’ yee xawisatenni; tenne hekkote ilaala diigate mittimmake agadha doorshu nookki hajooti yiino.
Kalaa Desta Ledamohu ledo assinoommo wo’ma hasaawa qoola 5-6 aana nabbabbe.
Yaareed Geetaachew
