Qiddist Gezaheny
Yugaandu qixxeessonni Sette gobbuwa lamewa beehante heewisantinoti mereerimunna Soojjaati Afriki CECAFA seennu boowe bocu gumulo heewisamaano bandoonni. Heewo beeqqitanni afantannoti Itophiyu seennu biheraawe gaamo (Luusiyootu) Sase godo’le gedensaanni bocu gumulo heewisamaano ikkitino Shoole gobbuwanni mitte ikkitino.
Umi godo’le Zanzibaare Ontenna Zeerote/5-o qeela dandiitinori Luusiyootu; beehachinsata layinki godo’lensa Tanzaaniyuu ledo assite Lame taalo ikkino guminni baxxitinoti qaangannite. Luusiyootu sayikkinna goofimarchu godo’lensa tenne lamala giddo Wodiidi Sudaane xaadde shoolenna zeerote/4-0/ qeelansa harunsite bocu gumulo heewisamaano ikka dandiitino.
Luusiyootu beehachinsanni lamala bixxillenna honse e’’onni layinki deerra amadde bocu gumulo heewora sa’inoha ikkanna; konni beehachi giddo afamannohu Tanzaaniyu sayikki godo’le zanzibaare 12 na zeerote/12-o/ hala’lado e’’ote badooshshinni qeelatenni e’’otenni roore beehachinsanni umiha ikke bocu gumulo karsama dandiino. Konninnino luusiyootu wolu beehachinni umiha ikke jeefisinoha heewote qixxeessaanchonna kaajjado gaamo noosi Yugaanda bocu gumulora xaaddannoha ikkanno.
Beehachu godo’lensa wo’manta qeela dandiitinori Yugaandu baxxinohunni goofimarchunnita beehachu godo’le Burundi Sasenna Mittete/3-1/ qeelinoti qaangannita ikkitanna Burundi lame godo’le qeelasenni bocu gumulora heewisante sa’ino gaamo gumulote heewisamaancho Tanzaaniya xaaddannoha ikkanno.
Sasente beehachu godo’lenni onte e’’o marawete ledo xaadissinoti Tanzaaniyu godo’laancho Opah Kilamenti beeddakko e’’ote kiirsiisaanchimma heewo balaxotenni massagganno. Wodiidi Sudaane ledo assinoonni godo’lenni sase e’’o Luusiyootaho kiirsiisa dandiitinoti Areggaash Karsa hattono sasente godo’lera shoole e’’o kiirsiisa dandiitinoti Looza Aberra beeddakko e’’ote kiirsiisaanchimma heewo harunsite afantanno.
Yugaandu ontikki yannara qixxeessino CECAFA heewo gumulote heewisamaano ikkitanno yine agarranni gobbuwanni Itophiyu mittoho. Tenne gumulsate kayinni qixxeessaanchu Yugaandunni bocu gumulo kaajjado heewo agartannonsa. Haaru Luusiyootu qajeelshaanchi Firew Hayilegebrieelihu batinye aganna albaanni CECAFA 20 diri woriidi heewonni Luusiyootu riqiwaano massaganni heewote qixxeessaancho ikkino Yugaanda gumulote godo’le massagamatenni ka’e Sasenna Lamete/3-2/ qeelatenni Shaampiyoona ikkanno gede assinoti qaangannite. Qara biheraawe gaamo ledono Yugaandu heewote qixxeessaancho ikke bocu gumulora xaadino.
Qajeelshaanchu Firew 20 diri woriidi ‘’CECAFA’ boowe gummaamma wedellu gaamo ledo kayisi yannara Itophiyu seennu lekkate kuwaase dhaggenni jawa qeelle assine borreessinoonni. CECAFA coommado heewo gedensaannino hattenne gaamo massaganni kalqete 20 diri woriidi boowe filote godo’lenni goofimarchunna shoolki doyicho iillitinoti qaangannite.
Qajeelshaanchu wedellu gaamonni borreessiisino guma qara biheraawe gaamora borreessiisanno yine hexxo tungannisi gede assitino. Konnirano lamalate albaanni luusiyoota qara qajeelshaanchimmanni massagate yawo uynisi yannara gaamote gambooshshensa gummaamma ikkitino 20 diri woriidi gaamonni haammata wedella lossatenni rosichu noonsari albiri ledo karsiise qixxeessanni keeshshino.
Luusiyootu Yugaandu ledo heedhanno bocu gumulo heewo qeelte gumulote iilla dandiituro qajeelshaanchohono ikko biheraawe gaamora heewote dhaggenni jawa qeelle ikkite borreessantanno. Itophiyu sa’u Shoole CECAFA boowera faranjootu 2016 nni 2018 geeshsha Yugaandahonna Ruwaandaho qixxeessinoonni heewora sayikki deerra amadde jeefissinoti jawa guma ikkite borreessantino. Qajeelshaanchu Firewunna Luusiyootu Yugaandu ledo bocu gumulo heewo gedensaanni tenne dhagge woyyeessate woyi beehate kaayyo angansara afantanno. Techo hadhanno Luusiyootu godo’le illacha tunge agarrannita ikkaseno Isipoortete tittiraano xawissino.
Qiddist Gezaheny
Bakkalcho Ella 2/2014
