Olompiikete ispoorte biifadonna daga hagiidhitannota assannohu fannanninna cunfanni barri amanyooteeti. Itophiyu babbaxxino diro olompiikete heewo kalqennita duucha yannara harisate wo`naalsha assino. Tayxe umi yannara Hawaasa hananfoonnihu Itophiyu wedellu olompiike kaima assine harinsoonniti hanafote pirogiraame shiimu xeeni ruxxi assa hoogeemmero ma kulo’ne maala’lissannote! Barraho dhaggeefantanni leellishsho leellishshinori Itophiyu Diilallote Wolqa horophilunni assitino daa”atto hattono Sidaamu faradaasini shiima yanna giddo addi addi daa’’atto biifadu garinni daa”atiise wedellu ledo asinoonnihu fanote amuraati ma kulonn`e afoo amaxxine dhaggeefantanniho. Hawaasi Yuniversite seyinohanna qinaawinoha wedellu olompikete heewo beeqqaano hanqaffe biifisse tenne dhagge harissino.
Kuni fanote amuraati olompiike olompiike yite su`niitanno garinni daa’aatate callate ikkikkinni kalqete deerrinni beeqqaano ikkitino wosinnanni dukkisantinote. Baayiriidihu Itophiyu olompiikete bareedi Atileetichu Haayle G/silaassehu, dhaggete hettisamaanchi Atileetichi Keeniyu Olompiike Pirezidaantichi Pool Teergaati, qoleno Afiriku Olompiikete Komite Maamari Qaru Boreessaanchi Ahimedi Hashiminna wolootu kalqete wosini hattono Mootummanniti alidi massagaano konni amuraatira beeqqaano ikkitino.
Heewote basera leelle afii fanote hasaawa assinohu IFDR Federeeshinete Amaale Mini Songaafichi Kalaa Agenyehu Teshaagerihu, olompiikete heewo kalqete macciishantunkunni xibbee diro ale ikkino. Olompiike keeru bati’rino kalqe kalaqate, taalo ikkitino heewonna sumimme, qeelamatenni sae beeqqo balaxisannoha ikkinota qaagiisse, baalanka mitte battalara gamba assitanno ispoortete heewo wedella togoo ispoortenni xaadisa jawa horo noota coy`rino. “Olompiike Itophiyaho diqeelameemmo yaate malaaleetti” yiinohu Songaafichu, Abbebe Biqiihu Roomete qeelasi techora lawishshaho yiino.
Olompiikenna Itophiya badannohu dino. Konne Abbebe Biqilihu qeelle gedensaanni haammata bareedda jajjabba kalqete battalara qeelte Itophiya gotti assite sa`ino. Konnira; Yaanno Songaafihu, konnira ilama ilamateni biifanni daynohu Itophiyu olompiikete heewo albillicho sufisate wedellunni hananfoonni olompiike jawa qeecha afidhino yiino.
Tenne battalara wedellu hasiissannonsa dirinni heewisantanno gede assa, qara olompiikera beeqqaano ikkite gobba riqibbanno atileetoota laashshate ikkinota huwachishino.
Sidaamu Qoqqowi Pirezidaantichi kalaa Desta Ledamohu assino hasaawinni, olompiikete egenno giddo heedhunkero mitte babbadama nookkiha mittimmatenni mimmitu ledo baxamate egenno ikkinota qaagiisse, olompiikete illachinna timo xa noo Itophiyira jawa sokka saayissannota xawisino. “Roduuwimmanna mittimma olompiiketenni rosa hasiissannonke” yinohu Pirezidaantichu, olompiike wedellu uminsanni sa`e gobbansara balaxo aate rosicho afidhanno battala ikkitinota huwattine, tenne battalara beeqqaano ikkitinoonni wedelli kaayyataamoho yiino.
Barru wosincho ikke battalate afaminohu Afiriku Olompiikete Komite Maamari Qaru Boreessaanchi Ahimedi Haashimi isi widoonni, Itophiyu wedellira jawu olompiikete dhuki noonsata xawise, noonsaha dhukansa togoo battalara horoonsi`ra hasiissannonsata qummeessino. Konninni sae, tenne wedellu olompiikera Itophiyu mittimmansa kalqete dagoomira leellisha hasiissannonsata huwachishe, Afiriku gobbuwa lawishsha assite adhitannota assa noo`ne yee xawisino.
Itophiyu Olompiikete Komite Pirezidaantichi Dr Ashshebbiri Wolde Giyoorgisihu, ajanni daynoha Itophiyu Olompiikete guma woyyeessate rosu minna ispoorte riqibbannore assine laashshatenni wedellu olompiikete battalara dagge heewisante sa`anno gede wo`naala hasiissanno. Tini wedellu olompiike Itophiyunniha dancha su`ma egensiisatenna coy`nannihu baalu duduwi kapho ikkinota kalqete leellishshate kaayyo kalaqqanno battala ikkitinota coy`rino. Mittimmanna halamme mageeshshi geeshsha horonna kaajjille afidhinoro tenne wedellu battalanni rossannota buuxisino.
Ella 04/2014 M.Diri geeshsha keeshshitannoti wedellu olompiikete heewo qoqqowubbanna quchummate gashshootinni filloonniri 6 kume ikkitannori olompiikete ispoortenna olompiike ispoorte ikkitinokki ispoortenni beeqqaano ikkitanni afantanno. Olompiikete heewonni Atileetikise, lekkate kowaase, Marawete kowaase, Gimboolu kowaase, Angate kowaase, Shalleette, Tuntu`mo, Jiminastiikenna kalqete tekowaandonni heewo assinanni hee`noonni ispoortete dana ikkanna, olompiikete gobbaanni ikkitino ispoorte kayinni Cheeze, Interinaashinaale Tekowandonna Wushshu Maarshaalennnino jwaata heewo assinanni hee`noonni.
Abrahaam Saamueel
Bakkalcho Onkoleessa 25, 2014 M.D
