Hawaasi Quchumira Onkoleessa 21/2014M.D Sanbatu barrinni hananfe harinsanni Olompikete heewora balaxote qixxaawo loossa jeeffinota Qoqqowunniti Ispoortete Komishiine xawissino.
Qoqqowu Isipoortete Komishiine Komishiinerichi Firewu Areerihu Onkoleessa 21/2014M.D hananfe gobbate deerrinni Hawaasa harinsanni Olompikete heewora balaxote qixxaawo loossa jeeffino yiino. Tenne heewo balaxote qixxaawo lainohunni xawishsha uyno.
Komishinerichu Firewu Areerihu, heewote qinaawora komite uurrinse qixxaawote looso hananfe keeshshinoonnita xawise; heewo 18 isipoortete dana amaddinota ikkase coyrino.
Heewote xawo lainohunni isipoortete dani garinni qixxeessate harinsho roore jeeffino yiino.
Olompike umiseha ikkino amanyootinna harinsho nooseta ikkitinota xawisinohu Komishiinerichu, liuukaane mitte basera galatenni mimmitinsa woganna bude; hattono hee’nanni garanna wole rosicho soorridhanno isipoorte ikkase xawisino.
4,000 ale ikkitanno heewisamaano beeqqaano ikkitannoha ikanna, fooliishshidhanno base qixxaabbinotano Komishiinerichu coyrino.
Keeraanchimmansa agarate Qoqqowu Fayyimmate Biiro ledo halamatenni komite uurrinse loonsanni hee’noonnitano xawishsha uy yannara kayse; qoqqowu dagano rosantino Dawoe Bushshu amanyootinni wosina adhatenni ga’labbo agadhitanno gede qaagiissino.
Hawaasi Quchumira togoo heewo harisa daa”attote bayicho ikkasi leellishatennino sae budenna rosicho soorri’rateno jawu qeechi noose yiino Komishinerichu.
Fanote amuuraate Hawaasi Yuniversite Istaadiyeemera Sidaamu woga leellishanno garinni qeexaalunni, farado gulufatenni, maarshi baandetenni, serkesetenni, tekuwaandotenninna labbino ikkituwanni harinsannitano buuxisino.
Qoqqowu daga Onkoleessa 21/2014M.D Sambata soodihunni 4:00 saatenni hanaffe Hawaasi Yuniversite Istaadiyeemera leellite fanote amuuraate beeqqitanno gede koynsoonniha ikkanna; heewo 15 barrubbara keeshshitannoha ikkinota Komishiinerichu buuxisino.
Abrahaam Saamueel
Bakkalcho Onkoleessa 18, 2014 M.D
