Beetto aye woyte dagganni caaccaabbanno. Heeshsho diseekkinoe, diwo`mitinoe, minaanni`ya qarrisannoe, loosu base keeru dinoe, olliichu waadie, xisso kaajjitue, woxi`ya atoota giwi, jaalla`ya he`mitannoe, ooso`ya qarrissannoe. Sharranyu daafira, xagarrote daafira, gojaamu daafira yitannokki coy dino. Annise babbaxxitino dhaggubba kullanni seejjasera, galfachishaseranna jawaachishasera wo`naali. Ise kayinni aaramase diuurrissino. Hanqise barru barrunni lexxanni; heeshshoseno gibbanni, jifoseno waajjitanni daggu.
Mitto barra cee`misheennase, qarrunna mitiimmaseno kaajjiteenna, hanqiseno qacce iilleenna daggu. “Ikkanno, konni ka`a hee`ra dihasi’reemma, togoonni mayra jifameemma, mayrano qarru bati’rannoe; baalanti coyibba shokkitannoe; ikkannoe ani hee`ra dinoe” yitanni wi`litannonkanni. Annise seejjinose seejjo baala loossinokkita, kulinnosere baala deantinota huwati.
“Harunsie” yeese kusheena e“i.
Ofoltanno barchima eese isi sagale rainsanniwa ha`ri. Komodiino fane quuphicho, dinnichanna udulamino buna haa`re abbi. Isera kayinni cincase gooffinonka. Wodanisennino “Ane heeshsho caacceessitinoena isi sagale koyisaera hasi`ranno” yitannoka. “Anni`ya qarrayya dihuwatino yaate; hudi’re hanqoommaha lawinosi’’ yitu. “Ani sagale dihasi`reemma, bunano diageemma; ikkanno! Isonni hareemma” yitusi. Sammi yiise.
Sasente baccubba aana shae ganfanni moqonqora wori. Mittu aana quuphicho, layinkihu aana dinnicha, sayikkihu aana udulamino buna wori. Hakkiinni beettosiwa daye qotese ofolli. “Ma loossanni noo; ane qarranna sagale may xaadisinsa; mini`ya giddo wo`minowe; mittore affinokki qaaqqo assattoenso; uynoereeti, ati massite afatto hige” yitanni caaccaabbanno; hanqitanno. Annise kayinni sammi yee macciishshannose. Wi`la hanaffu. Qotese amammadanni sammi yiise. Afiisinni qaale difushshi`rino.
Booso worino way hufa hanafi. Sa“e sa“eno way hufanni fule giirate aana coccoanno woyte “Tishshi” yitanno huuro macciishshantannoka. Annise hedeweelcho uurri. Massinoti mite ofoltinowa heedhe iimillite la`usi. “Kai” yiise. Shiima geeshsha ofoltinowa taxxi yite ka`u.
“Sasenkanni shaete moqonqorubba fani” yiise. Coy gurcho ikkeennase “Mayra?” yitu.
“Qarru dinona fani hanni” yiise. Xelleqqissanni baccubbanniwa martu.
“Sasente maqonqorubba giddo noo coyibba fushshi” yiise. Quuphichonna dinnicha chilfunni kooffe fushshite saannansa aana wortu. Buna siinete aana xorshitu gedensaanni “Hiissoxa?” yite annase xa`mitu.
“Dinnicha saanete aana wori, quuphicho sholooli, bunano qamasi” yiise.
“Lai; dinnichu waay giddora e“asira albaanni kaajje noonka. Hufino waay kayinni kaajjado dinnicha butukulsisi. Quuphichu waay giddora e“asira albaanni gobbayidosi kaajjado giddoyidosi kayinni du`namaanchohonna shotahonka. Waay hufita kayinni giddoyidosi du`namaanchonna shota ikkino quuphichi kaajjado ikki. Bunu hufi woyte mine foolisinni su`naado assi, qooxeessu fooleno soorri; nyamessino baxxitinota ikkitu.
“Sasunku giirate aana mitte yanna giddooti gafantinohu. Qarrinsa mittoho; mittu dani qarrira uytino tumo kayinni babbaxxitinote. Dinnichu kaajjillesi hoogi, quuphichu giddo kaajji, bunu su`niillesinna nyammesi roore fushshanno gede assisi. Beetto`ya ate qarrino noohu xaadinohe qarrinna jifo giddo dikkino. Xaadinohe qarriranna jifora aatta tumonni ikkinnina. Babbaxxino manni mittu dani jifo xaaddansara dandiitanno; isonni heeshshote giddo jifamannokki manni dino. Ikkolla ikkinnina mannootu qarrahonna jifote uytanno tumo babbaxxitinote.
“Tini jifo mito mito dinnichu gede kaajjillesi hooge tatta“anno gede assitanno. Mito mito mannano quuphichu gede giddoyidosi kaajjishshanno; mooraalesi
dhaabbe, wodanasi jawaachishshanno. Giira siwiilu cilaatte huntannohu gede jifono mitu mitunniha cee`millu cilaatte huntanno, giddoyidosi kaajjado assitanno. Mito mitoho kayinni mitiimmasi, jifosinna shettosi giddoyidi su`niillenna nyammesi bunu gede fushshitanno gede assanno. Giddoyidi dandoosi, dhukasi, xawo fulinokki aamamooshshesi, wolootaho galtara dandiitanno eltosi fushshitanno.
“Doorshu angakki aana no beetto`ya; qarru daannokki gede, jifono heedhannokki gede, mitiimmano xaaddannokki gede qarruno iillannokki gede assa didandiinanni. Meessaneeto dinnicha, woy buna woy quuphicho assa kayinni dandiinanni. yiise seejjise”
Beettono kichesi sunqite goowase shaffanni fultu. Giddoyidiseno “quuphichu, dinnichunna bunu” gede ikki.
Bue:- Diyaqoon Daanieel Kibret
Abbebech Maatewoos
Bakkalcho Onkoleessa 18, 2014 M.D
