Addis Ababa:- Mootimma diriirsitino kaajjado loosu amanyootinni mittu diri giddo shiqqinno 130 pirojektuwa giddonni 30 xibbuunni woy 40 meddi yitanno pirojektuwa mootimma horontanni loossara hasiissannokkinna hallanyu handaarinni loosama dandiitanno pirojektuwa ikkansanni ittinsoonnita pilaanenna latishshu ministere ministircho Dr Fitsum Asaffiti xawissu.
Dr Fitsum Itophiyu Pireesete uurrinsha Zemen Maxaafichoo ledo assitino hasaawinni xawisino garinni; horo aate xiinxallo keenantukkinni mitte pirojekiterano woxe digaammoonni.
Albi loosu amanyootinni pirojekitete horo, loosama noosehu hallanyu handaarinniitinso mootimmatenni yitannonna amadisiisantino hajubba dila“antannonkanni yitino Dr. Fitsumi.
Mootimmate latishshu pirojekituwa gashshooti lallawinni kaajjihu gedensaanni pilaanenna latishshu ministire shiqqanno mitte mittenti pirojekte hedote kaiminni hananfe wo`ma xiinxallote harinsho geeshsha keenamanno lee dirima sa“a agarantannosita loosu harinsho diriirsinoonnita buuxissino.
Mitte pirojekite lee/6/ dirima sa`uhu gedensaannino gobbate latishshu mixo ledo hadhannota ikkase; hallanyu handaarinni loosantara dandiitannokkitanna mootimmatenni calla loosama nooseta ikkase; noonke bikkantino jironni xa loonsiro woyyannonso? aantino dirrara loonsiro woyyanno? hattono horote xiinxallo widoonni miinjunnita calla ikkitukkinni qooxeessu dagoomira uytanno horonna qooxeessu aana noo xiiwo qorqorranni yitino.
Tenne baala wonshitanno pirojekitubba calla sufa dandiitanno yineenna pilaanenna latishshu ministerenni adhamooshshe afidhanno. Womaashshu ministereno woxe gaantanno. Konni garinni 2014 M.D hanafe konni amanyooti giddo sa`ukkinni woxe gaammoonnise pirojekte mitteno dino.
Ise xawishshi garinni; haaro loosu amanyootinni horo uytannokki pirojektuwa agura dandiinoonni. Horo noonsare ikkitenni hallanyu handaarinni loosa dandiinanni gattino pirojekituwa no. Babbaxxitino loosu minnara tatta`e loosantanni keeshshitino mittu dani amado noonsa pirojekituwa mittowa gamba assine loosantanno gedenna gummaamma ikkitanno gede assinoonni.
Hiittenne gobbarano bikkantino jiro noota buuxissinoti Dr Fitsumi; noonke bikkantino jironni pirojektuwate aante agarsiisate umisi qeecha fulino. Mootimmate latishshu pirojekituwa gashshooti lallawi kaajje loosu aana hosasi gummaamma ikkitino riformete loossanni mitto assine adhinannitano coyidhino.
Haaro lallawa kaajjinshe haaro loosu amanyoote diriirsa hoongoommero pirojektuwa loosu giddora e`e woxe garimale fushshiishshannonkanni. Xa loosamino loosi gedeehu alba loosama hoogasinni hasaawunni ammansiisate dandiini geeshsha hiittenne pirojekitennino woxe afi`nanninkanni yitanni buuxissino.
Abbebech Maatewoos
Bakkalcho Onkoleessa 18, 2014 M.D
