Barrunni mitto barra mittu lophanni no qaaqqi annasi “heeshshote waagi me`eho?” yee xa`misi. Annuno dawaro qola hasiissannasi qaaqqo togo yaatenni hajaji “hii“i konne kincho dikko haadhe massi, mannuno waagasi xa`mihero qubbekkinni lame kiiro calla leellishinsa ikkinnina mittoreno coyidhooti” yaannosi. Qaaqquno annu uynosi kincho dikko haa`re massi. Mareno dikkote mereero uurre hee`reenna mitte mancho daggu. Hakkiinni tini mancho qaaqquywa shiqqi yite “kunni kinchihu waagisi me“eho? Hirattoeha ikkiro ani hidheemma, masse qae`ya giddo wodheemmana” yitusi. Qaaqquno annu hajajo garinni manchote mittoreno coyrikkiinni lame qubbe leellishise. Iseno qoltannoti “lame birraati? adheemmana!!” yitu. Qaaqquno minira hige ha`ri. Dikkotte giddo xaadinosireno annaho kuli.
Annuno togo yiisi “xa kayinni kincho konne muuzeeme haadhe mari. Waagasi xa`mittuherono lame qubbeki leellishi” yaannosi. Hakkini qaaqquno kincho haa`re muuzeeme mari. Hidhaanchuno daye waaga xa`mannosi woyte kuni qaaqqi lame qubbesi leellishisi. Hidhara xa`mi manchino “lame xibbeeti?” hattootiro ani hidheemmohe! yiisi. Qaaqquno masillunni minira hige ha`re muuzeemete xaadinosi coye annisira kuli. Annuno qolannoti “hanni xa jeefote kayinni kincho konne wudde ikkitino shiilo hirranni suuqera haadhe massite suuqete annira leellishi” yaannosi.
Qaaqquno annu haadhe ha`ri yiinosiwa haa`re masse suuqete annira leellishanno woyte suuqete annino maala`lanni “kuni kinchi kalqete aana lowo geeshsha wudde ikkitino kinna giddonni mittohowe, ati hiikkiinni afidheeti?, maayyena me`u birrinni hi`ratoyya?” yee xa`misi. Qaaqqu mittore nafa coyrikkiinni lame qubbesi calla leellishannosi. Suuqete annino togo yiisi “konne kincho hirattoeha ikkiro lamu kumi birrinni ani hidheemmo”. Hakkiinni qaaqqu maala`latenni dodanni minira mare xaano ha`rinowa suuqete xaadinosire annisira kuli. Annuno “beetto`ya xa heeshshokki waagi xawinohe” yiinosi yinanni.
Mittu coy afa hasiisannohehu dawooto baychi, sirchikki, amma`nokki, maatekki jiro, ilamootto bayichi badooshshe dikalaqanno. Qaru coy umokki woratto bayichinna umikkira aatto waagaati ate woolootunni baxxoottoha assahera dandaannohu. Heeshokki wo`ma lamu birri kinchi waaginni calla keentanni heerootoha ikkara dandaanno. Wolootu babbaxxitino mannootino hatto heeshokki waaga lame birra calla fushshanno yitanni heddannori doyissitehe nooha ikkara dandaanno. Ikkollana kayinni mittu mittunku manni wudde ikkino kincho giddosi amadino.
Badooshshu noota afa dandiineemmohu giddonke nooha wudde ikkino kincho la`e dancha waaga uyitannonke mannooti mereero leella doodhinummorooti. Umonke dikkote giddo woy wudde ikkitino shiilo hirranni suuqera worate doorshi noonke. Wolootu mannooti giddo noohano wudde waaga la“ate doorshu uminkeholla. Wolootu mannootino wudde ikkino waagansa affanno gede assa dandiineemmo. Ledo hosatto manna buuxxe doodhi. Korkaatuno kuni heeshokki giddo badooshshe kalaqannohuraati.
Bu`e:- dagoomitte qoolinni
Abbebech Maatewoos
Bakkalcho Onkoleessa 11, 2014 M.D
