Danchummate Loosi Ganyete Assootenke Ikko!

Adda coyi`rate gutunni loose soorramate assinanni dodanshonni ale mittu wole tuge sa“ate assanno sharronna bunshe lowo geeshsha luphi yite leeltanno. Loosinoha maala`latenna kaajjishate budenkeno albira qaafisate dandiinokkinna badhe gatisinnonke danqaraati.

E`noommo buximanni fulate jawaate loosi`ra doorshu noosikki sufote doorsha ikkirono; kaa`lamannihu naaxxisiisanno budinke kayinni hudenke yannate geeshsha calla ga`labbisanno. Korkaatuno ninke Itophiyu daga buxane nafa ikkinumorono noonkehunni galante, noonkerichinni bande beehatenni barra xiiphineemmo busulootaati.

Konnirano mite lame yine kiirranni danchummate budinkenna dhaggenke ayidde ikkatenni haammata Itophiyu daga hudi`rinnohura chuucishatenni, kallinoha uddisiisatenninna uwinoha kayisatennino egennantino. Muli yanna kawano hallanyootunni assinanni danchummate loossanni sa“e miidiya horonsi`ratenni gaamotenni ikkatenni haammata danchummate fajjote owaante loossa batidhanni afantanno.

Baxxinohunnino gobbate daggino soorro harunse xaphoomu ministirchi Abiy Ahmedi kakkaooshshinni haammata danchummate fajjote owaante loossa loosantino. Loossano guma laalte batinyunnita xullo dibbino. Konne kaima assitino loossa harunsitinori dancha wodanna koyeno ko`ono kalaqantinota la`noommo. Danchummannihu fajjote owaante loosi mannootu dancha fajjo aana xintame manchu injiisi yannanna basera wolootaho assanno dancha coye ikkirono dancha looso bude assi`ratenni murroonni yanna giddo gumula dandiinanniha ikkinotano la“a dandiinoommo.

Xaphoomu ministirchi Abiy billoonyeho day yannanni hanafe haammata dancha loossa loosanni keeshshinota anfoonni. Mannihimmanniha ikkino akatoomisinni buxanete amuwu mine e“e heeshshonsa giddo xe“inonsare wonshino. Baxxinohunnino dirunniha wolqa nookkiri mine haaroonsa yitanno qixxaawonni qooxeessisinni hanafatenni kiirote ajjinokki amuwiha to“ara iillino mine haaroonsatenni caabbiicho la“a dandiitanno gede assino. Danchummate fajjote owaante murroonnise yannanni tayxeno suffino.

Diru tuqa hawadu eikkinni hanafamannohu kuni mine haaroonsate loosi tayxe dirirano Addis Ababaho Abuwaare qooxeessira 23 ikkitanno mannootira mine loosate xaphoomu ministirchi faajjetenni hanafisiisino.

Hiikko bikkaanchinnino ikkiro galatisiisannosihonna jawaachinshara hasiisannohu kuni xaphoomi ministirchihu dancha fajjo owaante loosi xa wolootu wodanirano e’’e leellanno. Ikkinohurano gobbate babbaxxitino qooxeessubbara kuni danchu loosi baxxinohunnino wolqiweellu amuwi mine haaroonsatenni hala`ladda loossa loosantinota televizhiinetenni la`ne maala`linoommo. Konninnino sa“e Itophiyu daga egennammeemmo mittee itatenna kaa`lamate bude sufino garinni harinse xaphoomu ministirchi hanafinohu danchu loosi mitto ikkirono qaru coy qooxeessubbankera cufantino nafarubba fana, to`ara ka`ino minna wirro uurrisa, hudidhinorenna kallitino daganke towaatanna heeshshote qarrubba tira mittu mittunku danchu wodanaaminni agarranniho.

Addaho dancha assitanno mannooti uminsa fajjonninna kakkaooshshinni daafurinsa waaga xa`mitukkinni woy loosinsa badheenni wole hedo amaddukkinni haammata dagoomitte hajubba aana beeqqitanno mannimmate assooteeti. Kalqenkera babbaxxitino gobbuwara dancha fajjo looso gumultanno hallanyooti, gaamubbanna uurrinshuwa batinyete. Itophiyahono danchu loosinni beeqqatenni dagoomitte yawonsa garunni fultanno qansooti batinye ikkiturono; massagaano calla agarte loossannoha ikkiro kayinni sufatto heedhannosikkihura hegersate aye woyteno ikkiro wodananke macciishshatenni qooxeessanke towaanto.

Itophiyu daga noonke yineemmore mitteenni itatenna kaa`lamate budenke jiro assi`ne keeshsha dandiineemmo gede aye woyteno ikkiro noonkere beenko; yannanna wole manna agarrummokkinni danchare assatenni naaxxisiisanno budenke kaajjinshe sufisa agarantannonke. Danchu loosira barrannokkiha ikkirono barru baala loonseemmo looso assate widoonni leeltanno foonqubba taashshi`ne noonke wolqanni qooxeessinkera hudirinoha itisatenni, kallinoha uddisiisatenni dagoomitte yawonke fullo.

Danchummate loosira seeru gadadishshi hee`ra hoogisirono tii“u gadadishshi kayinni dihooganno. Hudi’rinoha, kallinoha, minu aanaho xissannoha la`nanninna suume ga’mi’nanni sa“atenni seejjamme kaa`lamate budenke luphi assine loonso. Xaano danchu loosi aana bobbakkino wodanaammara noonke ayirrinye xawinsanni aanteteno gobbate babbaxxino handaarinni hala`linyunni hanafantino dancha fajjo owaante aana mittimmanke xabbe leeltanno hincilaallo ikkasinni qansichu baalu wolqasinni dancha fajjo looso kaajjishe sufa doorshu nookki hajooti. Konni daafira Danchummate Loosi Ganyete Assootenke Ikko!

Abbebech Maatewoos

Bakkalcho   Onkoleessa 11, 2014 M.D

Recommended For You