Sidaamu Buni Lekkate Kuwaase Kilawe 1998 M.Diro xintantino. Sidaamu Buni Lekkate kowaase Kilawe Daarrate Woradi qacale oosonni beeqqaano assine qooxeessaho noo daga riqibbe heewisantanno kilawe yineenna Ispoortete baxillaanonni safantino gaamooti.
Tenne kilawe xintini yannara alba mittu woradi su`minni “Daarrate Kilawe” yine woshshinanni. Ikkollana, hattenne yannara tenne kilawera woxu anje xaaddinose daafira, su`ma soorri’rate gadadantino. 1999 M.Diro Itophiyu Qoqqowubbate kilawe Shaampiyoonira beeqqate xaaddinose womaashshu anje qarra tirate yine albi Sidaamu Zoone Amaale Minira irko assinanninsa gede shiqishshino xa`mo kaima assine kilawete su`ma “Sidaama Daarra” yine soorrinoonni. Ikkollana, konni su`minnino dikeeshshitino.
Tini kilawe qoqqowubbate kilawenni gobboomu (Biheerawete) kilawe widira lophite beeqqate kaayyo afidhu. Tenne heewo qoqqowunni qoqqowu widira doyinanni heewisammannihura, jawu womaashshi hasiisannonsa. Hattenne yannara Zoone tini kilawe mootimmate irkonni calla xiinbannita ikkitinokkita xawisse, sayikkimeeshshu deerrinni xaa yannara woshshamanno “Sidaamu Buna” yaanno su`ma afi`rate dandiitino.
Sidaamu Qoqqowi baxxe afamannohu bunu jironniiti. Bunu jironni haammata dureeyye noo daafira tenne kilawe irkisate
konni su`minni woshshama hasiissanno yine gumulloonnita kilawete dhaggenni buunxoonni.
Sidaamu Buni Lekkate Kuwaase Kilawe, sa`u dirrara Itophiyu Piriimiyeer liige e`u yannanni kaayse xaa geeshsha kaajjado godo`lenna heewo assitanni afantanno. Xaa geeshsha gummaame godo`le assitanni leeltannoti Sidaamu Lekkate Kuwaase Kilawe, Piriimiyeer liigete boowe kaaysate kayinni kaayyo diafidhino. Tayxe 2014 M.Diro Betikingete assinanni hee`nooni heewo giddono boowe kayissanno yine hendanni kilawe giddo umita ikkite gugguuffanni no. Xaphoomunni Sidaamu Buni Lekkate kowaase Kilawe tayxe dirinni assitanni noo heewonna uurrinsha lainohunni Kilawete Qaru Loosu Harisaanchi Bakkalcho gaazeexi ledo hasaawa assino.
Sidaamu Buni Lekkate Kuwaase Kilawehu Qaru Loosu Harisaanchi Kalaa ErmiyaasTesfayehu Bakkalcho gaazeexi ledo assino hasaawinni xawisinonte gede, 2014 M,diro kaajjado balaxote qixxaawo assinni gedensaanni heewote giddora e`inota xawise, umi doycho lamalanta godo`lete yannara hasi`nanni guma abbitukkinni sa`inota coy`rino. Umi dooychora assinoonni godo`le giddo Onte taalo ikkino guminni fulatenni, lame qeelte lametenni qolte qeelantinota kulino.
Kilawetea tayxe diri giddo noose qarranna duucha laafa midaado seekkine filatenni hattono godo`laano soorratenna amanyootu qarri noo godo`laano geegisatenninna baara widinni boode ooso karsine kaajjado heewo assinoonniha nafa ikkiro, mixi`noonni mixo gafa ganate mommodda leeltannotano Kalaa Ermiyaasi qummi assino.
Ikkollana, umi doychora abbinoonni guminni dagate giddo gugurto kalaqantinota xawisnohu Kalaa Ermiyaasi, giddo leellannoha laafa midaado seekkine keenne xiinxallo assinummo gedensaanni woyyaawino gumi leellanni daynota xawisino.
Tenne yannara heewo 21ki lamala iillitinota qaagiissinohu Qaru Loosu Harisaanchi, Diredaawahonna Adaamaho no godo`lenni kilawe duucha gumu soorro maareekkisinota kulino.
Kalaa Ermiyaasi, “Xaa geeshsha assinoonni heewonni alba 12ki deerra, woyyanbanni 9ki deerranna 7kiha ikkine heewisammanni, tenne yannara 3ki deerra iilline boowete assinanni heewisaamanchimma kaajjinshe sunfanni hee`noonni” yiino.
Layinki deerra amaddino kilawe ledo nooha gumu badooshshe ruukkisatenni, dagganno lamala heewora noo godo`le qeelle layinki deerra amadate qixxaanbe kaajjillunni godo`lineemmo yaanni kalaa Ermiyaasi xawisino.
Kalaa Ermiyaasi yaatto garinni, “Dagganno lamala heewo godo`line qeelletenni jeefinsummoronna dancha guma maareekkinsummoro Faasili kanami baycho adhatenni Afiriku Shaampoona woy Konfidireeshiinete kaappe beeqqaano ikkate mixo amande ha`nanni hee`noommo” yiino.
Tenne yannara Sidaamu Buni Lekkate Kuwaase kilawe Yiggezu ledo halame eo eessannoha Saalaadiini Seyidiha soorratenni kilawete giddora karsine kaajjado heewo assinanni hee`noonnita kulinohu Kalaa Ermiyaasi, Saalaadiini godo`la hanafinkunni 4 eo eessatenni kilawe kakka`anno gede assinota buuxisino.
Sidaamu Buni Lekkate Kowaase Kilawe xaa geeshsha baxxitukkinni kaa`litanni noore irkisaanonna qoqqowu mootimma wodaninni galatanni, 2014 M.Dirita boowe kaaysate assinanni mixo gumaame ikkkitanno gede xaano mootumma, irkisaanonna kilawete baxillaano irkonsa kaajjishshe sufisa hasiissanonsa yee sokkasi saaysino.
Abrahaam Saamueel
Bakkalcho Dotteessa 27, 2014 M.D
