Doobbichu, Gotiichunna Yeedaalchu woshshaadaanote gaamo safidhe ayee woyte mitteenni woshshaaddannonka. Hige mitto barra woshshaaddanni heedheenna Doobbiichu Gaala amadi, Gotiichu saa hattono Yeedaalchu Meicho amadi.
Minensa higganni doogote aana fooliishsho adhate hasidhe ofoltinowa Gotiichu goxa hasi`ranno woyte Yeedaalcho togo yitusi “Afittonte gede Doobbiichu ayee woyteno umisira roorsi`ra baxanno. Lowo geeshsha kaajjado ikkinohura calla isi callisi Gaala itanno, ati saa itatto, anera kayinni mitticho shiima Meicho calla iillitannoe yaate. Konni daafira xaano woshshaadate ha`reemmo, mitore afi`rummoro atinna ani beeqqineemmo” yiisi.
Togo yii gedensaanni yeedaalchu wo`manka coye Gotiichoho agure ha`ri. Doobbiichuno goxanosinni baqqi yii gedensaanni togo yii; “Ane huudiissinoena, tenne sagale hiitto assine beeqqinammora has`ratto?’’ yee xa`misi. Gotiichuno qolannoti “Ati Gaala amadoottohura Gaala iti; ani saa amadoommohura tenne saa iteemmo, Yeedaalchuno Meichosi ita dandaanno” yiisi.
Doobbichuno togo yii; “Koo haariimaancho kalaqama! woshshaadanna amada dandoottohu ani qooxeessaho noommohuraatiwe. Tenne sagale saseho ikkine bebbeeqqino yite hiitto afookki wonshite coyi`ratto?” yee Gotiichunniha umo gananno woyte Gotiichu umi ta’’e haqqichote aana rarrai. Hakkiinni Yeedaanchu la’’annokki gede Doobbiichu reynoha Gotiicho balete madaari. Yeedaalchuno woshshaaday noowiinni higanno woyte Gotiichunniha umo xeertote haqqichote aana rarrainoha la’’anno.
Tenne yannara Doobbiichu; “Maahoyyena kalaa Yeedaala tenne sagale hiittoonni beeqqino yaatto?” yee xa`misi. Yeedaalchuno togo yii; “Umihunni ane amaale xa`makkinni naaxxillu macciishshamannoe. Ati dubbu mootichaati. Hasi’rittore adhattora dandaatto. Ane amaale hasi`rittoro kayinni aammohera dandeemmo”.
Doobiichuno, “Ee! maa assa nooero kulie” yiisi. Yeedaalchuno, “Maahoyyena! Gaala shoo’maho, Saa barri sagalera hattono Meicho hashshi hurbaatira saga`littoro dancha lawannoe” Yiisi.
Doobiichuno, “Ati maa itatto`ya?” yee xa`misi. Yeedaalchuno togo yii; “Dee’ni! Mittu qarri dino. Ani atewiinni giggilinoha woy gatinoha iteemmo”. Doobiichuno “Bi’re ati jallaagahonka. Hiittoonniiti busule ikkite togoota busultino dawaro aattoera dandoottohu?” yee xa`misi. Yeedaalchuno “Togoonni busule ikkoommohu umi’ya surre calla ikkikkinni Gotiichu surreno horonsi`reeti” yee xooqanni ha`ri.
